Žanočyja ślozy źnižajuć mužčynskuju ahresiju? A mužčynskija? 

Jak piša The Times, izrailskija vučonyja praviali ekśpierymient, u časie jakoha vyśvietlili, jak ślozy žančyn uździejničajuć na ahresiju mužčyn. Papiarednija daśledavańni pakazali, što žanočyja ślozy ŭtrymlivajuć chiemasihnał (fieramon), jaki źnižaje ŭzrovień testasteronu ŭ mužčyn.

Vučonyja adznačyli, što jany nie imknulisia da zboru vyklučna žanočych śloz. Prosta tak atrymałasia, što na zaklik ab donarstvie śloz adhuknulisia adny žančyny. Padčas pieršapačatkovaha testa dobraachvotnikam prapanavali pahladzieć sumny film na svoj hust.

Zatym byli adabranyja samyja płaksivyja, ad jakich byli sabranyja ślozy. Zbor adbyvaŭsia pad čas taho, jak ślozy ciakli pa ščokach. Dla taho, kab vyklučyć uździejańnie chimičnych rečyvaŭ, jakija mahli ŭtrymlivacca ŭ skury žančyn, fizijałahičnamu rastvoru taksama davali mahčymaść ściačy pa ščokach pierad zboram.

Zatym hrupu mužčyn paprasili pryniać udzieł u ekśpierymiencie, nakiravanym na vymiareńnie ahresii ŭ adkaz na pravakacyju. Udzielnikam prapanoŭvali syhrać u kampjutarnuju hulniu, u jakoj prysutničali padziei-pravakacyi, kali va ŭdzielnika «niespraviadliva» adbiralisia hrošy, i padziei-pomsty, kali ŭdzielniku pradstaŭlałasia mahčymaść adniać hrošy ŭ supiernika bieź jakoj-niebudź asabistaj vyhady.

Pierad pačatkam ekśpierymientu kožnamu prapanoŭvali 13 razoŭ ź pierapynkam u 35 siekund paniuchać pachi-stymulatary. Pieršyja try razy — fizijałahičny rastvor, nastupnyja 10 — razdražnialnik (ślozy ci sabrany fizijałahičny rastvor). Paśla hetaha da vierchniaj huby ŭdzielnika prymacoŭvałasia padušačka, nasyčanaja ślaźmi ci fizrastvoram. Jana zastavałasia tam na praciahu ŭsioj hulni.

Jak adznačyli vučonyja, u 43,7% mužčyn, jakija niuchali žanočyja ślozy, nazirałasia zaŭvažnaje źnižeńnie ahresiŭnych pavodzin.

Dla taho, kab vyśvietlić, ci moža sistema niuchu čałavieka niejak apracoŭvać chiemasihnały śloz, u časie nastupnaj hulni mužčynam było praviedziena MRT-skanavańnie mozha. Ekśpierymient pakazaŭ, što dźvie vobłaści mozha, źviazanyja z ahresijaj, stanavilisia bolš aktyŭnymi, kali adbyvałasia pravakacyja. Adnak jany nie prajaŭlali nijakaj aktyŭnaści ŭ tych ža situacyjach, kali mužčyny niuchali ślozy.

Aŭtary daśledavańnia, vyniki jakoha apublikavanyja ŭ časopisie PLOS Biology, dapuskajuć, što padobny efiekt mohuć mieć i ślozy mocnaj pałovy čałaviectva.

Viadoma, što i chłopčyki, i dziaŭčynki płačuć adnolkava. A ŭ vypadku niemaŭlat, jakija nie majuć vierbalnych sihnałaŭ dla strymlivańnia ahresii, ślozy zastajucca adzinym efiektyŭnym sposabam. Papiarednija daśledavańni na hryzunach pakazali, što chiemasihnały śloz źnižajuć ahresiju.

«My miarkujem, što ślozy — miechanizm mlekakormiačych, jaki zabiaśpiečvaje chimičnuju abaronu ad ahresii», — zajaŭlajuć aŭtary.

Čytajcie jašče:

Zvyčku rana ŭstavać ludziam pieradali nieandertalcy — vučonyja

U tryvožnych baćkaŭ dzieci zdolniejšyja — vučonyja

Mikrachimieryzm śviedčyć, što kožny z nas nosić čaścinku inšaha

• 8
• 0
• 2
• 0
• 4
• 1
• 4
• 0