Cichanoŭskaja sustrełasia z pradstaŭnikami dypłamatyčnych misij u Varšavie. Śpis udzielnikaŭ sustrečy ŭražvaje
Na sustrečy sa Śviatłanaj Cichanoŭskaj prysutničali pradstaŭniki kala 35 krain. U tym liku dypłamaty Armienii, Arhienciny, Čyli, a taksama Ukrainy.
Śviatłana Cichanoŭskaja, pradstaŭniki Abjadnanaha pierachodnaha kabinieta Valer Kavaleŭski, Pavieł Łatuška, Volha Harbunova, Alina Koŭšyk praviali bryfinh dla dypłamataŭ, jakija znachodziacca ŭ Varšavie. Bryfinh prajšoŭ u pasolstvie Kanady.
Cichanoŭskaja raskazała pra situacyju z palitviaźniami, asabliva pra tych, kaho trymajuć u režymie inkamunikada, i zaklikała da bolš rašučych dziejańniaŭ dla ich vyzvaleńnia z pryciahnieńniem mižnarodnych arhanizacyj, paviedamlaje pres-słužba palityka.
Cichanoŭskaja paprasiła trymać Biełaruś na paradku dnia i nie dazvolić Rasii pahłynuć Biełaruś. Jana ŭźniała pytańnie jeŭrapiejskaj budučyni dla Biełarusi, a taksama toje, što dla biełarusaŭ vielmi važna bačyć pazityŭnuju alternatyvu «ruskamu śvietu».
Cichanoŭskaja zaklikała aktyvizavać mižnarodnyja miechanizmy pa pryciahnieńni režymu da adkaznaści.
Taksama jana paprasiła ŭsie krainy spraścić pracedury lehalizacyi biełarusaŭ: vydaču viz, dazvołaŭ na žycharstva, statusu mižnarodnaj abarony. Jana taksama raskazała pra novyja biełaruskija pašparty.
Padčas dyskusii słova ŭziali pasły Hiermanii, Šviecyi, inšych krain. Pytańni ŭ asnoŭnym tyčylisia znachodžańnia biełarusaŭ za miažoj, novaha pašparta, situacyi ŭ Biełarusi.
Na sustrečy prysutničali pasły Ispanii, Niderłandaŭ, Irłandyi, Vialikabrytanii, Šviecyi, Čechii, Litvy, Ukrainy, a taksama Armienii, Arhienciny, Čyli, źmieny ŭ jakich ciapier pryciahvajuć uvahu śvietu.
Asobna Cichanoŭskaja praviała sustreču z kanadskim pasłom, na jakoj abmierkavali mahčymy vizit u Atavu, padtrymku hramadzianskaj supolnaści i instrumienty cisku na režym i pryciahnieńnie jaho da adkaznaści.
Kamientary