U Kitai stvaryli «amal viečnuju» batarejku dla smartfonaŭ. Jana jadziernaja
Kitajski startap Betavolt pakazaŭ novuju jadziernuju mini-batarejku, pryznačanuju dla pracy telefonaŭ, dronaŭ, štučnych sercaŭ i šmat čaho inšaha. Ale ci biaśpiečnaja jana dla čałavieka? U kampanii adkazali.
Pavodle aficyjnaj zajavy kitajskaha startapa Betavolt, im stvorana pieršaja ŭ śviecie jadziernaja mini-batarejka, jakaja ŭžo pačała testavacca ŭ roznych pryładach.
Jak śćviardžaje Betavolt, batarejka madeli BV100, pamieram mienšaja za manietu, składajecca sa štučnaha izatopa 63 (nikiel) i ałmaznych paŭpravadnikoŭ 4-ha pakaleńnia, što dazvolić trymać adzin zarad minimum 50 hadoŭ i mieć mocnuju ŭstojlivaść da marazoŭ i śpiakoty.
Sieryjny vypusk i prodaž jadziernych batarejek BV100 płanujecca na 2025 hod.
«Jadziernyja enierhietyčnyja batarei Betavolt zadavolać patreby ŭ amal viečnaj pracy aerakaśmičnych pryładaŭ, sistem štučnaha intelektu, miedycynskaha abstalavańnia, mikrapracesaraŭ, smartfonaŭ, nievialikich bieśpiłotnych latalnych aparataŭ i mikrarobataŭ», — havorycca ŭ pres-relizie kampanii Betavolt.
Prakamientavali ŭ startapie i zaściarohi ad mahčymaj škody BV100 dla čałavieka «z-za jadziernaha vypramieńvańnia». Pa słovach pradstaŭnikoŭ Betavolt, ich batarejki całkam biaśpiečnyja nie tolki dla ludziej, ale i dla navakolnaha asiarodździa.
«Batarejki absalutna biaśpiečnaja, nie majuć vonkavaha vypramieńvańnia i padychodziać dla vykarystańnia ŭ miedycynskich pryładach, takich jak kardyjostymulatary, štučnyja sercy i słychavyja aparaty.
Jany taksama źjaŭlajucca ekałahična čystymi, bo štučny izatop nikielu-63 pry raspadzie pieratvarajecca ŭ stabilny i nieradyjoaktyŭny izatop miedzi», — adznačyli pradstaŭniki Betavolt.
U startapie ŭpeŭnieny, što dadzienaja inavacyja dapamoža Kitaju atrymać lidarstva ŭ novaj technałahičnaj honcy i ŭ raspracoŭcy štučnaha intelektu.
Kamientary