Homielskaha treš-błohiera abjavili ŭ vyšuk u Rasii i zaviali kryminalnuju spravu ŭ AAE
MUS Rasii abviaściła ŭ vyšuk Andreja Buryma, bolš viadomaha jak błohier Melstroy. Pryčynaj dla hetaha stała jahonaja admova iści słužyć u biełaruskaje vojska. Za heta strymieru moža pahražać da dvuch hadoŭ pazbaŭleńnia voli. Ale daŭsia ŭ znaki jon užo nie tolki ŭ Biełarusi i Rasii.
Błohier Mellstroy, jaki pachodzić z Homiela, viadomy svaimi treš-strymami. U studzieni 2017 hoda im zacikavilisia biełaruskija siłaviki. Pa ich źviestkach, chłopiec, jakomu tady było 18 hadoŭ, płaciŭ dziaŭčatam za rapranańnie pierad kamieraj u Skype, a sam tranślavaŭ heta na YouTube. Tady na kanale błohiera było kala 50 tysiač padpisčykaŭ.
Nieviadoma, čym skončyłasia hetaja sprava, ale paźniej Mellstroy pierabraŭsia ŭ Rasiju, dzie praciahvaŭ stvarać šok-kantent dla internetu. U 2020 hodzie padčas strymu ŭ Maskvie błohier niekalki razoŭ udaryŭ dziaŭčynu Alenu Jafremavu hałavoj ab stoł. Sud pakaraŭ Buryma 6 miesiacami papraŭčych rabot, jašče jon musiŭ vypłacić dziaŭčynie kampiensacyju. Taksama jon vykładaŭ tranślacyi pjanak i pahulanak z tratami vialikich sumaŭ hrošaj.
Ciapier stała viadoma, jak paviedamlaje telehram-kanał Mash, što ŭ Biełarusi na strymiera raspačali kryminalnuju spravu za ŭchileńnie ad terminovaj słužby. A ciapier maładoha čałavieka šukajuć i ŭ Rasii, kab pieradać biełaruskamu boku. U krasaviku minułaha hoda kanały błohiera na roznych płatformach zabłakavali pa rašeńni Raskamnahladu.
Ale Burym tamu ŭ Rasii i ŭ vyšuku, što daŭno tam nie žyvie. U tych ža miaścinach, kudy jon padaŭsia, jamu taksama nie vielmi radyja.
Spačatku Burym palacieŭ žyć u Dubaj, ale i tam asieści ŭ jaho nadoŭha nie atrymałasia, pakolki ŭstupiŭ u kanflikt ź miascovymi zakonami.
Jość infarmacyja, što ŭ Dubai strymier publična abraziŭ musulmanina: incydent adbyŭsia ŭ adnym z kłubaŭ, dzie Burym abazvaŭ naviedvalnika žyviołaj. Videa z hetym momantam chłopiec apublikavaŭ u siabie ŭ storys. Paźniej abražany mužčyna ŭbačyŭ heta storys i napisaŭ zajavu.
Kažuć, što paciarpieły navat zaklikaŭ svajho kryŭdziciela paprasić prabačeńnia ŭ sacsietkach, ale toj rabić hetaha nie zachacieŭ i apieratyŭna rełakavaŭsia ŭ Turcyju. A ŭ AAE na jaho zaviali kryminalnuju spravu.
Takim čynam, ciapier u vychadca z Homiela kryminalnaja sprava ŭ Biełarusi za ŭchileńnie ad słužby ŭ vojsku, eks-kryminalnaja sprava i vyšuk u Rasii, a ciapier i kryminałka ŭ AAE.
Čytajcie taksama:
Aktyvisty, žurnalisty, palityki, dobraachvotniki. Kaho ź biełarusaŭ abviaścili ŭ vyšuk u Rasii
«A jak my jaho pra***li?» Padrabiaznaści treš-strymu ŭ Viciebsku, u vyniku jakoha pamior čałaviek
Kamientary