Rasija masava pieravodzić svaje naftavyja tankiery pad ściah Habona, śviedčać padliki ahienctva Reuters. Pa stanie na pačatak lutaha ŭžo 42 sudny rasijskaj kampanii «Saŭkomfłot», jakija raniej chadzili pad ściaham Libieryi i Panamy, źmianili rehistracyju na habonskuju.
Źmiena rehistracyi źviazanaja z pahrozaj sankcyj ZŠA. U kancy 2023 hoda ZŠA, Jeŭrasajuz i Vialikabrytanija papiaredzili Libieryju, Panamu i Maršałavy astravy ab nieabchodnaści ŭzmacnić nahlad za tankierami, kab harantavać zachavańnie cenavaj stoli na rasijskuju naftu na ŭzroŭni $60 za barel.
Libieryjski sudovy rejestr LISCR asabliva ŭraźlivy da sankcyj, bo jahonaja štab-kvatera znachodzicca nie ŭ Libieryi, a ŭ ZŠA. Miž tym kala 80% tankieraŭ «Saŭkamfłotu» byli zarehistravanyja pad ściaham Libieryi i kiravalisia dubajskoj kampanijaj Sun Ship Management (jana ž SCF Management Services). Ich rehistracyju i absłuhoŭvańnie rabiŭ LISCR, što dazvalała sudnam padsankcyjnaj kampanii pieravozić rasijskuju naftu. U suviazi z hetym LISCR navat byŭ u pieraliku «mižnarodnych sponsaraŭ vajny».
U kancy lutaha Nacyjanalnaje ahienctva Ukrainy pa praduchileńni karupcyi paviedamiła, što ŭsie sudny rasijskaha «Saŭkamfłotu» pakinuli libieryjski rejestr.
Ministr transpartu Habona Łoik Muduma paćvierdziŭ Reuters, što mnohija tankiery ź libieryjskaha rejestra pierarehistravalisia ŭ rejestr Habona.
Pry hetym jon zapeŭniŭ, što jany buduć vyklučanyja z rejestra, kali buduć zajmacca niezakonnaj dziejnaściu. «My sami raspačniem kroki pa źniaćci ściaha z hetaha karabla, budzie jon rasijskim ci inšym», — adznačyŭ ministr.
U Habonie ŭ 2023 hodzie adbyŭsia dziaržaŭny pieravarot, krainu ŭznačaliŭ hienierał Brys Alihi Nhiema.
Ciapier čytajuć
Biełaruska raspačała čelendž «40 spatkańniaŭ», ale ŭžo na siaredzinie nie chavaje rasčaravańnia ŭ mužčynach54
Kamientary