Pa jakoj canie pradajuć kvietki ŭ Minsku napiaredadni 8 Sakavika
Pryjšoŭ toj dzień, kali Biełaruś pačynaje nahadvać Niderłandy i akazvajecca zavalenaj tonami ciulpanaŭ. Pa varjackich cenach siońnia nie adšukaješ, ale miljony kvietak pieraśledujuć ciabie paŭsiul.
Blizko.by pahladzieŭ, jak arhanizavany handal da Mižnarodnaha žanočaha dnia i kolki kaštujuć kvietki ŭ troch punktach Minska.
Uschod
Na Uschodzie la stancyi mietro vyraśli niekalki paviljonaŭ, ale bolšaja častka handlaroŭ raźmiaściłasia prosta na łaŭkach i raskładnych stolikach. Niahledziačy na jarkaje sonca, z ranicy staić maroznaje nadvorje, pradaŭcy sahravajucca napojami z termasaŭ.
Nie skazać, što a 9 ranicy mocny ažyjataž. Zdajecca, mnohija prosta pryceńvajucca i spuskajucca ŭ mietro. Choć, viadoma, zusim užo biez pakupnikoŭ pradaŭcy nie zastajucca. Ciulpany addajuć pa 3-3,5 rubla, zahornutyja ŭ papieru abo plonku.
Vakzał
Na vakzale tradycyjna raskinuŭsia kvietkavy haradok. Jon ciahniecca na dobruju sotniu mietraŭ: praktyčna ad Leninhradskaj da Uljanaŭskaj vulicy.
Pry hetym adrezak ad Leninhradskaj da Kirava pakul zasieleny handlarami nie tak mocna, jak učastak ad Kirava da Uljanaŭskaj.
A voś tam užo sucelna zabudova z paviljonaŭ, amal biez pramiežkaŭ.
Adboju ad pakupnikoŭ niama, choć čym dalej ad padziemnaha pierachodu i čym bližej da Uljanaŭskaj vulicy — tym radziej siudy zachodziać pakupniki. Zatoje milicyjanty praviarajuć dazvoł na handal.
Pakolki pradaŭcoŭ šmat, to čerhaŭ amal nie ŭźnikaje: zaniaty adzin — padydzi da inšaha: asartymient i ceny buduć takimi ž.
Ciulpany tut možna znajści i pa 3 rubli, ale čaściej ceny kruciacca kala 4 rubloŭ za štuku. Adzin z pradaŭcoŭ tłumačyć:
— My sami vyroščvajem va ŭłasnaj haspadarcy, tamu nie možam sabie dazvolić handlavać pa try.
Siarod bahaćcia roznakalarovych ciulpanaŭ jarka-žoŭtyja mimozy amal hublajucca, ale i na ich jość svoj pakupnik. Kaštujuć jany ad 8 rubloŭ za maleńkuju halinku da 20 za razłapistuju. Pradaviec śćviardžaje, što mimozy z hadavalnika.
Z hłybokich kardonnych karobak pradajuć ciulpany bukietami — pa 10, 15 i 20 rubloŭ. Ciulpančyki maleńkija, jašče nie raspuścilisia. Zatoje bukiet — dla tych, chto šukaje mahčymaść zekanomić, heta niadrenny varyjant.
U padziemnym pierachodzie i biez 8 sakavika zaŭsiody ažyŭleny handal kvietkami. Amal usie kramki tut zaniatyja strukturaj DorORSa — heta značyć, padraździaleńniem BČ, jakoje samastojna vyroščvaje kvietki. Mabyć, heta adzinaje miesca ŭ horadzie, dzie ceny na kvietki vyviešany ŭ adkrytuju — va ŭsich astatnich łatočnikaŭ davodzicca pierapytvać.
Z ružami ŭsio vyrazna i pa roście: niestandartnyja pa 2,5 rubla za štuku, a dalej ad 3,2 rubla za 40-santymietrovuju da 5,5 rubla za 80-santymietrovuju.
Pry zamovie ad 35 rubloŭ abiacajuć biaspłatnuju dastaŭku. U hetyja paviljony vystrojvajucca čerhi pa 5-10 čałaviek.
Piatroŭščyna
La adnajmiennaj stancyi mietro prykładna toje ž, što i na ŭschodzie: razroźnienyja łatočniki tut i tam, usiaho kala paŭtara dziasiatka. Ad centra dalej — ceny nižejšyja: ciulpany ŭ siarednim pa 3 rubli.
Mimozy i pa 5, i pa 8 rubloŭ za halinku. Ale, kažuć pradaŭcy, samyja-samyja pyšnyja kaštujuć 30 rubloŭ. Choć tut i nie vakzał, ale kvietki nie horš za centr!
Ciapier čytajuć
Dziaržaŭnyja kanały niečakana pakazali, jak vyhladajuć rezidencyi Łukašenki znutry. Raniej kamiery tudy nie traplali4
Kamientary