Stała viadoma, jakija z palitykaŭ najbolš papularnyja i nienavisnyja ŭ Jeŭropie
Apytańnie pravodziłasia ŭ krainach Jeŭrasajuza vydańniem Euronews i francuzskim centram daśledavańnia hramadskaj dumki Ipsos. Siarod 26 tysiač apytanych 47% stanoŭča acanili asobu Uładzimira Zialenskaha, jon staŭ najbolš papularnym palitykam. A voś na druhim polusie, jak najbolš nienavisny palityk, prahnazavana apynuŭsia Uładzimir Pucin.
Pa kolkaści pazityŭnych acenak prezident Ukrainy Uładzimir Zialenski apiaredziŭ lidaraŭ krain ES — Ołafa Šolca, Emanuela Makrona i Donalda Tuska. Adnak asoba Zialenskaha vyklikała kantrasnyja acenki, bo siarod apytanych niamała i tych, chto aceńvaje jaho niehatyŭna: 32%. Jašče 21% skazali, što mała što pra jaho viedajuć.
Najbolš pazityŭnyja vodhuki Zialenski atrymaŭ u krainach Skandynavii, dzie 70-80 pracentaŭ apytanych acanili jahonuju dziejnaść stanoŭča. A horš za ŭsio, pavodle danych sacapytańnia, da prezidenta Ukrainy staviacca ŭ Vienhryi, Hrecyi i Słavakii, dzie tolki ad 15 da 25 pracentaŭ respandentaŭ vykazalisia pra Zialenskaha stanoŭča.
Emanuel Makron zaniaŭ druhoje paśla Zialenskaha miesca, nabraŭšy kala 41% stanoŭčych acenak siarod respandentaŭ z krain ES. Ołaf Šolc idzie śledam za Makronam, jon atrymaŭ 38% uchvaleńnia. Charakterna, što najmienšuju kolkaść uchvalnych acenak Šolc i Makron nabrali siarod respandentaŭ sa svaich ułasnych krain.
Najmienš uchvalenymi palitykami, pavodle sacapytańnia, stali lidary Rasii i Vienhryi — Uładzimir Pucin i Viktar Orban. Dziejnaść Orbana pazityŭna acanili tolki 15 pracentaŭ apytanych jeŭrapiejcaŭ, a Pucina — uvohule tolki 10. 79% jeŭrapiejcaŭ akreślili svajo staŭleńnie da Pucina jak niehatyŭnaje.
Adnosna lepš pazicyi rasijskaha kiraŭnika vyhladajuć u mierkavańniach žycharoŭ Bałharyi, Słavakii i Hrecyi, dzie stanoŭča jaho acanili ad 22 da 37 adsotkaŭ respandentaŭ. U krainach Paŭnočnaj Jeŭropy stanoŭča da Pucina staviacca ličanyja adzinki apytanych.
Horš za ŭsio Pucina acanili ŭ Finlandyi (94%), Šviecyi (91%), Danii (91%), Polščy (91%), Ispanii (90%), Partuhalii (89%), Niderłandach (88%) i Francyi (80%). Tolki ŭ čatyroch krainach jaho asudžajuć mienš za 60%: u Hrecyi (59%), Vienhryi (57%), Słavakii (56%) i Bałharyi (48%).
Najbolš z krain Jeŭrasajuza lubiać Pucina ŭ Bałharyi: 37% respandentaŭ adtul aceńvajuć jahonuju asobu pazityŭna. Taksama dobra dumajuć pra Pucina 28% udzielnikaŭ apytańnia z Hrecyi, 22% — sa Słavakii, 20% — ź Vienhryi.
Adkazu adnosna staŭleńnia da Łukašenki heta apytańnie nie dało.
Biełarusy horača spračajucca, ci varta pryviazvać dapamohu na dzicia da zarobku maci51
Biełarusy horača spračajucca, ci varta pryviazvać dapamohu na dzicia da zarobku maci
U Biełarusi zaćvierdzili praviły evakuacyi kaštoŭnaściaŭ na vypadak vajny: cehłu z Bresckaj krepaści z nadpisami buduć ratavać pierš za karciny Šahała i Sucina1313
Kamientary