Palitviaźniu Vadzimu Husievu dadali jašče adzin hod źniavoleńnia
U Vaŭkavysku 22 studzienia razhladzieli kryminalnuju spravu suprać palitźniavolenaha Vadzima Husieva, asudžanaha raniej za «abrazu pradstaŭnika ŭłady». Hetym razam jaho abvinavacili pavodle art. 411 Kryminalnaha kodeksa («Złosnaje niepadparadkavańnie patrabavańniam administracyi kałonii»), piša «Viasna».
Raniej žychar Ščučyna adbyvaŭ termin u papraŭčaj ustanovie adkrytaha typu pavodle art. 328 Kryminalnaha kodeksa (niezakonny abarot narkatyčnych srodkaŭ, psichatropnych rečyvaŭ), dzie jamu zamianili pakarańnie z abmiežavańnia voli na pazbaŭleńnie voli terminam na dziesiać miesiacaŭ i siem dzion.
U lipieni 2023 hoda ŭ Ščučynie nad Vadzimam adbyŭsia sud pavodle art. 369 Kryminalnaha kodeksa (abraza pradstaŭnika ŭłady). Zhodna z abvinavačvańniem, budučy ŭ PUAT, jon napisaŭ «abraźlivyja» kamientary, za što jaho asudzili na adzin hod i try miesiacy pazbaŭleńnia voli va ŭmovach strohaha režymu.
Termin Vadzim adbyvaŭ u papraŭčaj kałonii № 11 u Vaŭkavysku. Adrazu pa prybyćci va ŭstanovu jašče na «karancinie» za parušeńnie «praviłaŭ unutranaha rasparadku» (PUR) jaho pazbavili doŭhaterminovaha i karotkaterminovaha spatkańniaŭ, a taksama źmiaścili ŭ štrafny izalatar na piać sutak. Paśla heta Vadzima adrazu pryznali «złosnym parušalnikam režymu».
Pavodle materyjałaŭ spravy, paźniej Vadzimu Husievu vypisali jašče šeść spahnańniaŭ. Tak, naprykład, jaho adpravili na adzin miesiac u pamiaškańnie kamiernaha typu za toje, što nie pradstaviŭsia načalniku apieratyŭnaha adździeła pa ŭstanoŭlenaj dla hetaha formie. Taksama palitviaźnia karali za toje, što jon lažaŭ na padłozie ŭ kamiery ŠIZA, admoviŭsia rabić prybirańnie.
Za nieadnarazovaje parušeńnie PUR administracyja kałonii inicyjavała zaviadzieńnie suprać palitviaźnia kryminalnaj spravy pa art. 411 KK («Złosnaje niepadparadkavańnie patrabavańniam administracyi kałonii»). Sud nad im adbyŭsia ŭ Vaŭkavysku 22 studzienia.
Sudździa Mikałaj Siarhiejka asudziŭ Vadzima jašče da adnaho hoda kałonii, a z ulikam nieadbytaha raniej pakarańnia kančatkova pryznačyŭ jamu pazbaŭleńnie voli terminam na adzin hod i try miesiacy va ŭmovach strohaha režymu.
@nashanivanews Ninie Bahinskaj prysudzili hihancki štraf za značak #biełaruś #bčb #žyviebiełaruś #bčbściah #biełarusy #minsksiejčas #našaniva ♬ DESTRUCTION - SCXR SOUL & NONTHENSE
Ciapier čytajuć
«Ja asasin, bł*!» Ekśpiert-juryst z STB nieadekvatna pavodziŭ siabie na Zybickaj. Videa sabrała miljony prahladaŭ — chto jon7
Kamientary