Na što Polšča patracić $2,5 miljarda, pryznačanych na ŭmacavańnie miažy ź Biełaruśsiu?
U Polščy pradstavili prajekt uzmacnieńnia miažy «Ščyt Uschod». Jon budzie achoplivać učastak praciahłaściu 700 kiłamietraŭ, u tym liku 400 kiłamietraŭ miažy z Rasijaj i Biełaruśsiu, i zapatrabuje inviestycyj u pamiery 10 młrd złotych (kala 2,5 młrd dalaraŭ). Što budzie ŭjaŭlać ź siabie sistema ŭmacavańniaŭ, piša Most pa materyjałach polskaj presy.
Raboty pa ŭzmacnieńni miažy pavinny zaviaršycca da 2028 hoda. Jany buduć vieścisia nie tolki ŭ niepasrednaj blizkaści ad miažy, ale i zakranuć adlehłaść ad 50 da 100 kiłamietraŭ uhłyb krainy.
Prajekt budzie ŭklučać aharodžy i sučasnuju sistemu manitorynhu prastory, u tym liku sistemu raspaznavańnia Barbara, nabytuju za 1 młrd złotych (kala 250 młn dalaraŭ). Sistema budzie ŭklučać siarod inšaha spadarožnikavy kampanient, a taksama drony i antydronavyja sistemy.
Miarkujecca, što prajekt budzie składacca z čatyroch elemientaŭ.
1. Uzmacnieńnie mahčymaściaŭ supraćdziejańnia raptoŭnamu napadu
Hety kampanient budzie ŭklučać u siabie sistemu vyjaŭleńnia, papiaredžańnia i adsočvańnia, uklučajučy bieśpiłotniki, źniščalniki F35 i spadarožniki.
Taksama jon pavinien uklučać bazavyja stancyi-mačty, — raźmieščanyja ŭzdoŭž miažy, stancyi dla biaśpiečnaj vajskovaj suviazi i elemienty vidavoj dy radyjoelektronnaj raźviedki — IMINT i SIGINT.
Akramia taho, tut płanujecca ŭzmacnić łahistyčnyja vuzły i stvaryć infrastrukturu dla antydronavych sistem.
2. Abmiežavańnie ruchomaści praciŭnika
Hety kampanient praduhledžvaje stvareńnie supraćtankavych ravoŭ, žalezabietonnych vožykaŭ, uładkavańnie daroh i stvareńnie inšych abjektaŭ.
3. Pavyšeńnie biaśpieki vajskoŭcaŭ i abarona cyvilnaha nasielnictva
Hety kampanient praduhledžvaje stvareńnie schoviščaŭ dla vajskoŭcaŭ i cyvilnych asob, a taksama składoŭ i bunkieraŭ dla zbroi i bajavych srodkaŭ.
4. Zabieśpiačeńnie mabilnaści ŭłasnych vojskaŭ
Hety kampanient praduhledžvaje padrychtoŭku daroh i mastoŭ, a taksama adaptacyju inžyniernych zbudavańniaŭ da značnych nahruzak.
Ciapier čytajuć
Milicyja zatrymała taho samaha rasijskaha turysta, jaki kinuŭ niedakurak na vulicy. Zaŭtra sud31
Kamientary