U Biełarusi mohuć istotna padaražeć aŭtamabili. Usio praz novyja jeŭrapiejskija patrabavańni
Patrabavańni, jakija litoŭskaja mytnia ŭviała ŭ dačynieńni da mašyn, maładziejšych za 5 hadoŭ, jakija honiać ź Jeŭropy i ZŠA ŭ Biełaruś, paŭpłyvajuć na ceny na aŭtarynku. Padličyli, nakolki mohuć padaražeć mašyny.
Sakavickija patrabavańni akazalisia kvietačkami
Pačynajučy z kanca sakavika, pryvozić u Biełaruś aŭtamabili ź Jeŭropy z abjomam ruchavika, bolšym za 1,9 litra, stała značna składaniej.
Spačatku Polšča, a zatym Łatvija pierastali vypuskać u Biełaruś mašyny, jakija nielha ekspartavać u Rasiju, choć na našu krainu hetyja sankcyi farmalna i nie raspaŭsiudžvajucca.
Adzinaj krainaj, praź jakuju da niadaŭniaha času praciahvali pastupać aŭtamabili z abjomam ruchavika, bolšym za 1,9 litra, i daražejšyja za 50 tysiač jeŭra, zastavałasia Litva. Dla paśpiachovaha vyvazu patrabavałasia vykanać šerah umoŭ, jakija byli całkam vykanalnyja, kali mašyna sapraŭdy nakiroŭvałasia ŭ Biełaruś.
Adnak pačynajučy z 4 červienia Litva ŭzmacniła kantrol za vyvazam aŭto, maładziejšych za 5 hadoŭ, niezaležna ad abjomu i cany.
Ciapier dla ekspartu aŭto ź ES u Biełaruś mytniki patrabujuć pakazać jašče i dekłaracyju ad vytvorcy. A taksama vypisku z rachunku transpartnaj kampanii z paćviardžeńniem atrymańnia apłaty za dastaŭku aŭto.
Što možna pryhnać?
Hetyja patrabavańni nie raspaŭsiudžvajucca na mašyny, starejšyja za 5 hadoŭ. Tamu kazać pra poŭnuju zabaronu na ekspart aŭto ź Jeŭropy ŭ Biełaruś prynamsi pakul nielha.
Ale tut važna razumieć, što mienavita aŭto va ŭzroście da 5 hadoŭ uvozili čaściej za ŭsio, bo na takija mašyny dziejničali samyja nizkija mytnyja staŭki.
Kali z momantu vypusku aŭtamabila prajšło bolš za 5 hadoŭ, to prymianiajecca pavyšany kaeficyjent.
Mytnaja pošlina za aŭtamabil va ŭzroście ad 3 da 5 hadoŭ z 2-litrovym ruchavikom składaje 5400 jeŭra bieź ilhoty i 2700 jeŭra, kali razmytniać aŭto budzie lhotnik.
A voś kali mašynie ŭžo bolš za 5 hadoŭ, to razmytnić taki aŭtamabil budzie kaštavać užo 9600 jeŭra bieź ilhoty abo 4800 jeŭra pa 140-m ukazie. Navat z ulikam ilhotnaha afarmleńnia roźnica składaje minimum 2100 jeŭra.
U vypadku z trochlitrovymi aŭto roźnica jašče bolšaja. Pošlina na aŭto ad 3 da 5 hadoŭ składzie 9000 jeŭra bieź ilhoty i 4500 jeŭra ź ilhotaj.
Za bolš uzrostavyja aŭtamabili daviadziecca zapłacić 15 000 i 7500 jeŭra adpaviedna. Pierapłata navat pa lhotnym taryfie składaje 3000 jeŭra.
Najmienšaja roźnica atrymlivajecca z mašynami z matoram 1,6 litra. Pošlina za 3-5-hadovy aŭtamabil pa lhocie składaje 2000 jeŭra, a za mašynu, starejšuju za 5 hadoŭ — 2800 jeŭra.
Praź nievialikuju roźnicu ŭ mycie mašyny z 1,6 pad kapotam, starejšyja za 5 hadoŭ, davoli aktyŭna pryhaniali i da źjaŭleńnia novych abmiežavańniaŭ.
Dla mašyn z matoram 1,5 roźnica budzie bolšaja, niahledziačy na mienšy abjom. Tak, lhotnaja staŭka za aŭto, maładziejšaje za 5 hadoŭ, składaje 1275 jeŭra, a kali mašynie ŭžo spoŭniłasia 5 hadoŭ, to 2400 jeŭra. Pierapłata — 1125 jeŭra.
Z hetaha vynikaje, što kali status kvo zachavajecca, to najbolš vyrastuć u canie mašyny z ruchavikami abjomam ad 1800 sm³.
- Aŭtamabili z 3,0 vyrastuć u canie na 3000 jeŭra.
- Aŭtamabili z 2,0 vyrastuć u canie na 2100 jeŭra.
- Aŭtamabili z 1,6 — na 800 jeŭra.
- Aŭtamabili z 1,5 — na 1125 jeŭra.
- Aŭtamabili z 1,2 — na 900 jeŭra
- Aŭtamabili z 1,0 — na 750 jeŭra.
Niekatoryja kampanii, jakija zajmajucca pastaŭkaj aŭto na zamovu, užo pačali prapanoŭvać klijentam varyjanty kupli aŭto, z momantu vypusku jakich prajšło bolš za 5 hadoŭ.
Fota: skrynšot z telehram-kanała WESTMOTORS
Kali ceny mohuć pačać raści?
Pierahonščyki ličać, što kali i dalej budzie całkam niemahčyma ŭvozić aŭtamabili, maładziejšyja za piać hadoŭ, to ceny pačnuć raści vielmi chutka.
Užo ciapier pradaŭcy śviežych mašyn pačynajuć reahavać na novaŭviadzieńni i admaŭlajucca handlavacca, choć na rynku i nazirajecca peŭny zastoj.
Kali zachodnija miežy zastanucca zakrytymi dla śviežych mašyn, to adzinym šlacham dla padsankcyjnych aŭto zastanucca alternatyŭnyja maršruty praz Turcyju abo Hruziju. Ale ŭ takim vypadku vydatki na łahistyku buduć pryblizna na 5 tysiač jeŭra bolšymi, čym raniej.
Naturalna, što praz Turcyju abo Hruziju buduć dastaŭlać tolki vielmi darahija aŭto. Bo kali mašyna kaštuje 100-200 tysiač jeŭra, to dadatkovyja 5 tysiač i navat 10 tysiač nie tak užo i šmat. Ale kali mašyna kaštuje 20-30 tysiač jeŭra, to jaje dastaŭka takim šlacham budzie niemetazhodnaj.
Niechta hublaje, a niechta znachodzić
Jość hulcy aŭtamabilnaha biznesu, dla jakich jeŭrapiejskija zabarony ŭ radaść.
Rost cen na mašyny ź Jeŭropy i ZŠA ŭ pieršuju čarhu budzie spryjać rostu prodažaŭ biełaruska-kitajskich Geely, rasijskaha AŭtaVAZa, a taksama tych kitajskich brendaŭ, jakija naładzili zborku mašyn na zavodach u Rasii, što raniej naležali suśvietnym aŭtavytvorcam.
Nahadajem, što pa vynikach krasavika aficyjnyja dylery vyjšli na davajenny ŭzrovień prodažaŭ novych aŭto.
Jašče da niadaŭnich źmien pradstaŭniki Biełaruskaj aŭtamabilnaj asacyjacyi adznačyli, što pierahledziać prahnozy na 2024 hod u bok pavieličeńnia prodažaŭ na fonie ŭźnikłych dadatkovych pieraškod na šlachu aŭto ź Jeŭropy.
Dadatkovyja abmiežavańni pa imparcie mašyn ź ES z abjomam ruchavika bolš za 1,9 litra jany nazyvali istotnym faktaram, jaki pazityŭna ŭpłyvaje na rynak dylerskich prodažaŭ. Patrabavańni, jakija ŭviali z 4 červienia, mohuć stać dadatkovym i jašče bolš istotnym faktaram, jaki pazityŭna adabjecca na prodažach aficyjnych dyleraŭ.
«Naša Niva» — bastyjon biełaruščyny
PADTRYMAĆ
Kamientary