Syna Džo Bajdena Chantera pryznali vinavatym u sudzie pa spravie ab kupli im zbroi. Jamu pahražaje realny termin
Prysiažnyja ŭ sudzie ŭ štacie Dełaver railisia ŭ aŭtorak try hadziny i vyrašyli pryznać Chantera Bajdena vinavatym pa ŭsich troch punktach abvinavačvańnia.
Sud prysiažnych pryznaŭ syna prezidenta ZŠA Džo Bajdena, Chantera Bajdena, vinavatym u tym, što jon schłusiŭ adnosna ŭžyvańnia narkotykaŭ pry kupli ahniastrelnaj zbroi, piša Bi-bi-si.
Sutnaść vystaŭlenaha 54-hadovamu Bajdenu-małodšamu abvinavačvańnia ŭ tym, što jon u 2018 hodzie, budučy narkazaležnym (jon užyvaŭ krek), schavaŭ heta pry kupli pistaleta.
«Toje, što Chanter Bajden pryznany vinavatym u chłuśni pra ŭžyvańnie narkotykaŭ pry padačy zajavy na licenziju na zbroju, naŭrad ci paŭpłyvaje na chod prezidenckaj kampanii i na toje, jak amierykancy prahałasujuć na listapadaŭskich vybarach […] ale abvinavaŭčy vierdykt napeŭna stanie ciažkim asabistym udaram dla prezidenta ZŠA», — ličyć ahladalnik Bi-bi-si pa Paŭnočnaj Amierycy Entani Zurkier.
Paśla abviaščeńnia vierdyktu sudździa skazaŭ tolki, što prysud moža być vyniesieny na praciahu 120 dzion, i kankretnuju datu nie pryznačyŭ.
Bajdenu tearetyčna pahražaje da 25 hadoŭ turmy, ale na praktycy, na dumku jurystaŭ, kali jon i budzie adpraŭleny ŭ turmu, to naŭrad ci bolš, čym na paru hadoŭ.
Jak tłumačyć prafiesar jurydyčnaha kaledža Paŭdniovaha Techasa Dru Styviensan, pa samym surjoznym z abvinavačvańniaŭ — u tym, što jon vałodaŭ zbrojaj, budučy spažyŭcom zabaronienych narkotykaŭ — maksimalnaje pakarańnie składaje 10 hadoŭ, ale pa jaho, prafiesara Styviensana, nazirańniach, pa hetym artykule realny pryznačany termin nie pieravyšaŭ piaci hadoŭ, i jaho atrymali tolki siem čałaviek, sapraŭdy niebiaśpiečnyja złačyncy.
Što tyčycca iłžyvych danych u ankiecie na zbroju, to realnych terminaŭ pa takim abvinavačvańni prafiesar Styviensan naohuł nie pamiataje.
U vieraśni Bajdenu-małodšamu treba budzie iści ŭ sud pa patencyjna značna bolš važnaj u palityčnym sensie spravie — ab sychodžańni ad padatkaŭ z dachodaŭ u 1,5 młn dalaraŭ.
«Hety praces, jaki pačniecca za paru miesiacaŭ da vybaraŭ, moža być, budzie nie takim emacyjnym, jak toj, što prajšoŭ u dełaverskim sudzie, ale zamiežnyja ŭhody Chantera i jahonyja finansavyja suviazi z baćkam źjaŭlajucca pradmietam pilnaj uvahi z boku apanientaŭ Bajdena, respublikancaŭ. Z narkazaležnaściu i jaje nastupstvami sutykalisia ŭ žyćci mnohija amierykancy. Ale voś padazreńni ŭ finansavaj nieprystojnaści i padatkovym machlarstvie mohuć vyklikać u hałasujučaj amierykanskaj hramadskaści mienš spahady», — tłumačyć Zurkier.
Ciapier čytajuć
Knyrovič raskazaŭ, čamu były dyrektar aršanskich zavodaŭ paśla vyzvaleńnia pajšoŭ vajavać za Rasiju, dzie i zahinuŭ1
Kamientary