Aŭtamabili taksi treba budzie zachoŭvać tolki na achoŭnych parkinhach. Za vykarystańnie ŭ asabistych metach — štraf
Z 1 žniŭnia pačnuć pracavać novyja praviły dla pieravozčykaŭ. Dniami ŭ Minsku adbyłasia sustreča ź pieravozčykami, na jakoj abmiarkoŭvali, jak treba budzie pracavać pa-novamu. Padčas sustrečy z pradstaŭnikami Mintransa i Transpartnaj inśpiekcyi vyśvietlilisia novyja padrabiaznaści.
Svaja mašyna pierastaje być svajoj?
Aproč taho, što aŭtamabil taksi nielha budzie vykarystoŭvać dla asabistych pajezdak, na sustrečy vyśvietliłasia, što zachoŭvać takija aŭtamabili nieabchodna budzie na achoŭnych stajankach.
Kali Transpartnaja inśpiekcyja vyjavić, što aŭtamabil taksi budzie vykarystoŭvacca dla pryvatnych pajezdak, to dla kiroŭcaŭ praduhledžana adkaznaść za parušeńni pravił darožnaha ruchu. Pa jakim artykule płanujuć pryciahvać da adkaznaści — pakul nie zrazumieła.
Zabarona na vykarystańnie aŭto ŭ asabistych metach i patrabavańni zachoŭvać ich vyklučna na achoŭnych stajankach vyklikajuć najbolšuju niezadavolenaść.
Aproč taho, što patrabavańnie zachoŭvać aŭtamabili na achoŭnych stajankach niasie dadatkovyja vydatki, taksisty skardziacca na toje, što miescaŭ na parkoŭkach moža chapić nie ŭsim, dy i nie ŭ kožnaha niepadaloku znojdziecca achoŭny parkinh.
Surazmoŭca ź liku taksistaŭ vykazaŭ mierkavańnie, što praz novyja patrabavańni ŭžo hetaj vosieńniu ličba aŭtamabilaŭ taksi moža skaracicca napałovu.
Što jašče patrabujuć ad pieravozčykaŭ?
Taksistam, jakija zachočuć zastavacca ŭ prafiesii, daviadziecca vykanać šerah umoŭ.
Pracavać zmohuć tolki tyja, chto budzie zaniesieny ŭ dziaržaŭny rejestr. U im musić być jak dyśpietčarskaja słužba, tak i transpartny srodak i kiroŭca.
Dadavać u rejestr z 1 žniŭnia pa 31 kastryčnika 2024 buduć biaspłatna. Paśla treba budzie płacić dziaržpošlinu.
Za transpartny srodak — 2 bazavyja, za kiroŭcu — 1 bazavuju, za dyśpietčara — 100 bazavych. Uniasieńnie źmianieńniaŭ taksama budzie płatnym — pa 1 bazavaj za źmienu źviestak pra transpartny srodak abo dyśpietčara i pa 0,5 bazavaj za źmienu źviestak pra vadziciela.
U sałonie aŭtamabila taksi ŭ abaviazkovym paradku musić vieścisia videanazirańnie. Pieravozčyk abaviazany zachoŭvać videafajły ciaham 10 sutak.
Kiroŭcy pavinny kožnyja 5 hadoŭ pavyšać kvalifikacyju, a taksama znachodzicca ŭ pracoŭnych adnosinach ź pieravozčykami (pracavać pa damovie padradu budzie nielha).
Ciapier čytajuć
Cichanoŭskaja jedzie ŭ Ńju-Jork. Jana moža pierasiekčysia z pradstaŭnikami Łukašenki, ale hałoŭnuju intryhu pakul nie raskryvajuć27
Kamientary