U Minsku chutka pačnuć sudzić piać čałaviek pa hučnaj spravie za «padrychtoŭku teraktu ŭ Dzień Pieramohi»
U Minskim haradskim sudzie 26 lipienia raspačniecca sud pa hučnaj spravie za «padrychtoŭku teraktu ŭ Dzień pieramohi pad kuratarstvam Kijeva». Padrabiaznaści spravy ahučvalisia ŭ prapahandyskim filmie ANT «Zabojnaja pasyłka śmierci: chto i jak chacieŭ ździejśnić terakt u Dzień Pieramohi».
Pa spravie prachodziać adrazu piać čałaviek: 24-hadovy Valer Vodzin, Andrej Hryhorjeŭ, 30-hadovaja Viktoryja Vołčak, 25-hadovaja Hanna Savačkina i jaje maci Taćciana Rusak, piša «Viasna».
U vinu im staviacca takija ciažkija artykuły:
- «zdrada dziaržavie» (č. 1 art. 356 KK), č. 2 art. 289 (akt teraryzmu),
č. 1 art. 361-3 (udzieł na terytoryi zamiežnaj dziaržavy va ŭzbrojenym farmiravańni abo ŭzbrojenym kanflikcie, vajennych dziejańniaŭ, viarboŭka albo padrychtoŭka asob da takoha ŭdziełu),
č. 4 art. 295 (niezakonnyja dziejańni ŭ dačynieńni da ahniastrelnaj zbroi, bojeprypasaŭ i vybuchovych rečyvaŭ), č. 3 art. 361-1 (stvareńnie ekstremisckaha farmavańnia albo ŭdzieł u im),
č. 2 art. 333-1 (niezakonnaje pieramiaščeńnie praź dziaržmiažu Biełarusi bojeprypasaŭ, a taksama inšych vidaŭ uzbrajeńnia i vajennaj techniki).
Praces u zakrytym režymie budzie vieści Siarhiej Chrypač, viadomymi svaimi žorstkimi prysudami pa palityčnych spravach.
15 maja 2023 hoda na ANT vyjšaŭ prapahandyści film «Zabojnaja pasyłka» śmierci: chto i jak chacieŭ ździejśnić terakt u Dzień Pieramohi», dzie raspaviali padrabiaznaści spravy. Tam paviedamlałasia, što nibyta KDB da Dnia Pieramohi 9 maja 2023 hoda «praduchiliŭ terakt pad kuratarstvam Kijeva».
Tam zajavili, što vybuchoŭka znachodziłasia ŭ elektryčnych plitkach, jakija dasłali zatrymanym praz pasyłki.
Arhanizataram akcyi nazvali 23-hadovaha biełarusa Valeryja Vodzina, jaki vajavaŭ va Ukrainie. Kurjerami stali maładyja ludzi, jakich ciapier buduć sudzić. Zajaŭlałasia, što ŭsie zatrymanyja dajuć pryznalnyja pakazańni.
U videa raspaviali pra toje, što pasyłki z elektraplitami, u jakich była vybuchoŭka, dastavili ŭ minski punkt SDEK u Kamiennaj Horcy 21 sakavika 2023 hoda z Kijeva praź Italiju.
29-hadovaja Viktoryja Vołčak paćvierdziła na dopycie, što jana atrymała pasyłku — jaje paprasiŭ atrymać pasyłku Valer Vodzin.
Studentka BDU Hanna Savačkina i jaje maci Taćciana Rusak uziali plitku ŭ Voŭčak i zakapali jaje na mohiłkach u Kałodziščach. Druhuju plitku zabraŭ zubny technik Andrej Hryhorjeŭ i advioz u sadovaje tavarystva «Aŭtaramontnik 124» pad Alachnovičami.
Načalnik Hałoŭnaha ŭpraŭleńnia śpiecyjalnych ekśpiertyz Uładzimir Atraškoŭ zajaviŭ, što ŭ plitkach znachodzilisia płastyčnyja vybuchovyja rečyvy masaj kala dvuch kiłahram i elektradenatary, jakich dastatkova, kab «sabrać niekalki vybuchovych pryład».
Što charakterna, u filmie taksama pakazali siabra Hanny Savačkinaj — Jaŭhien Bahdanienka, ale jaho pa hetaj spravie sudzić nie buduć. Los jaho pravaabaroncam nieviadomy.
Kamientary