150 rubloŭ za karobku «Łui Viton»: jak biełarusy sprabujuć zarabić na prodažy ŭpakoŭki luksavych brendaŭ

Pahladzieli, jakija prapanovy jość na «Kufary». Adna ź pieršych abjaŭ, jakuju vydaje placoŭka, — brendavy pakiet Chanel. Pradavačka ź Minska choča atrymać za jaho 10 rubloŭ i paznačaje, što vykarystoŭvać jaho možna jak afarmleńnie dla padarunka, dadatak da pradukcyi Chanel ci elemient dekoru.

Žančyna z Rečycy handluje papiarovymi pakietami tańniejšych brendaŭ — Zara dy H&M. Košt treba ŭdakładniać, ale pradavačka hatova dasłać tavar u luboje miesca Biełarusi poštaj.

Jašče adna žycharka biełaruskaj stalicy vystaviła na prodaž šmat papiarovych pakietaŭ — jość brendy Nike, Adidas, Tommy Hilfiger, Victoria's Secret, Ralph Lauren, Intimissimi, L'Occitane. A voś Gap užo niechta nabyŭ. Za luby z pakietaŭ žančyna prosić 5 rubloŭ.

Pavialičyć

Ale bolš za astatnich prapanoŭvaje niechta sa staličnaj Hrušaŭki. Tam vybar brendaŭ i pamieraŭ pakietaŭ uražvaje. Pradaviec padyšoŭ da prodažu z usioj adkaznaściu i navat paznačyŭ pamier kožnaha łota ŭ santymietrach. Pakiet Yves Rocher kaštuje ŭsiaho rubiel, skrynka Gold Apple — 3 rubli. A pakiety Lacoste — pa 10 rubloŭ.

Dziełavy mužčyna z Navapołacka pradaje dzieviać pakietaŭ adnosna biudžetnych brendaŭ kštałtu Pull and Bear za 20 rubloŭ. Jon udakładniaje: «Idealny stan, pakietam roŭna tydzień. Padyduć dla fotasiesij i ŭ cełym dekoru. Prodaž tolki kamplektam, biez handlu».

Brendavyja skrynački taksama možna znajści ŭ prodažy. Naprykład, kali vam dla čahości patrebna karobka 15-ha ajfona, to takija pradajuć u Centralnym rajonie Minska pa 10 rubloŭ za štuku. A voś karobku ad telefona Huawei P9 dy jašče razam ź silikonavym zavodskim čachłom ułaśnik hatovy addać usiaho za 5 rubloŭ.

Fanatka ŭpryhožańniaŭ Pandora z Mahilova prapanoŭvaje nabyć 7 pustych skrynačak optam za 10 rubloŭ. A ŭ Homieli niechta pradaje pakiet z łahatypam Pandora za 3 rubli.

Pradaviec z Homiela hatovy addać karobki z-pad brendavaha abutku. Prapanoŭvaje Gucci, Lacoste, Balenciaga, Adidas: «Abutak zachoŭvaju ŭ inšych kantejnierach, karobki nie patrebnyja. Košty ad 5 da 10 rubloŭ za skrynku (u zaležnaści ad jaje stanu). Taksama jość pyłaviki ad brendavaha abutku i sumak i etykietki».

Ale najbolš darahija prapanovy znajšlisia ŭ Centralnym rajonie Minska. Tam žančyna pradaje vialikuju karobku Louis Vuitton až za 150 rubloŭ. Da jaje ž možna dakupić pakiet za 30. A za brendavuju karobku Hermes pradavačka choča 50 rubloŭ.

Ci jość popyt na taki tavar? Vyhladaje, što tak, bo čas ad času ŭ abjavach sustrakajucca ŭdakładnieńni, što toj ci inšy łot z fota ŭžo niechta nabyŭ.

• 0
• 0
• 9
• 0
• 1
• 0
• 0
• 0