Z aŭkcyjonu amal za miljon dalaraŭ pradajuć kaliści znakamity zavod
Na aŭkcyjonnaj placoŭcy Biełaruskaj univiersalnaj tavarnaj biržy vystaŭlenyja niekalki łotaŭ, što adnosiacca da viadomaha ŭ minułym biełaruskaha zavoda. Havorka idzie pra viciebskuju fabryku KIM. Spačatku heta aznačała «Kamunistyčny internacyjanał moładzi», a ŭ časy niezaležnaści abrevijaturu stali rasšyfroŭvać jak «Kłasika industryi mody», piša Blizko.by.
Kompleks budynkaŭ znachodzicca ŭ Viciebsku pa vulicy Maksima Horkaha, 42.
Na tarhi vystaŭlenyja nastupnyja budynki, nivodzin ź jakich nie vykarystoŭvajecca:
- Hałoŭny korpus z prybudovaj (trochpaviarchovy budynak 1949 hoda pabudovy ahulnaj płoščaj 10.700 kv. m);
- Farbavalny korpus (1952) i dva składskija pamiaškańni (1981);
- Prybudova da farbavalnaha cecha (piacipaviarchovy budynak 1949 hoda);
- Budynak kandycyjanieraŭ (1977);
- Transfarmatarnaja padstancyja z abstalavańniem (1932);
- Kanalizacyjnaja, vodapravodnaja sietka, prava na dobraŭparadkavańnie terytoryi.
Pačatkovaja cana hałoŭnaha korpusa — 1 056 459 rubloŭ, farbavalnaha korpusa — 671 987 rubloŭ, prybudovy da farbavalnaha korpusa — 174 981 rubiel, budynka kandycyjanieraŭ — 606 542 rubli, transfarmatarnaj padstancyi — 131 349 rubloŭ.
Z ulikam kroku tarhoŭ i nieabchodnaści kampiensavać vydatki na praviadzieńnie tarhoŭ pakupnik pavinien budzie zapłacić za hałoŭny korpus minimum 1 110 912 rubloŭ, abo 345 550 dalaraŭ pa aktualnym kursie Nacbanka.
A košt usich piaci asnoŭnych łotaŭ z kampiensacyjaj vydatkaŭ składzie 2 777 298 rubloŭ, abo 863 883 dalaraŭ ZŠA.
Fabryka KIM pačała pracu jašče ŭ 1931 hodzie jak pančošna-škarpetačnaja fabryka. Paśla asvoiła vypusk trykatažnych vyrabaŭ, spartyŭnych kaściumaŭ, žanočaj bializny i inšych tavaraŭ. Zavod byŭ vialikim, budavaŭ internaty dla svaich supracoŭnikaŭ, a dom kultury kambinata (1988) ciapier viadomy jak kancertnaja zała «Viciebsk» — heta adna z asnoŭnych kancertnych placovak mižnarodnaha fiestyvalu mastactvaŭ «Słavianski bazar».
Z kanca 1990-ch kambinat pieražyvaŭ mocny zaniapad, sproby rearhanizacyi nie nadta dapamahli, i ŭ 2019 hodzie fabryka była likvidavana z-za bankructva.
Tarhi projduć 15 kastryčnika 2024 hoda.
Ciapier čytajuć
«Čamu my pavinny niejak uščemlivać siabie?». Dyrektarka RTBD patłumačyła, čamu pastaviła śpiektakl pavodle Puškina ŭ adnym z apošnich teatraŭ krainy, jaki pracavaŭ pa-biełarusku5555
Kamientary