«Pieraśledujuć za ažyćciaŭleńnie svabody dumki». «Viasna» patłumačyła, čamu pravakatara Kakojtu pryznali palitviaźniem
U dačynieńni da Jaŭhiena Katlarova było dapuščana najhrubiejšaje parušeńnie pravoŭ čałavieka, tamu jon pryznany palitviaźniem, paviedamili pravaabaroncy vydańniu «Pozirk».
U adkazie na zapyt «Pozirku» adznačajecca, što Katlarova sudzili pavodle art. 369-1 (dyskredytacyja Respubliki Biełaruś) i 369 (abraza pradstaŭnika ŭłady) KK. Hetyja dziejańni dziaržavy źjaŭlajucca «advolnym abmiežavańniem prava na svabodu vykazvańnia mierkavańnia»: u adpaviednaści z art. 19 Mižnarodnaha pakta ab hramadzianskich i palityčnych pravach kožny čałaviek maje prava na svabodnaje vykazvańnie svajho mierkavańnia; hetaje prava ŭklučaje svabodu šukać, atrymlivać i raspaŭsiudžvać usialakaha rodu infarmacyju i idei, niezaležna ad dziaržaŭnych miežaŭ, vusna, piśmova ci z dapamohaj druku abo mastackich formaŭ vykazvańnia, ci inšymi sposabami na svoj vybar.
Karystańnie hetymi pravami moža padlahać abmiežavańniam, jakija pavinny być ustanoŭleny zakonam i źjaŭlacca nieabchodnymi dla pavahi pravoŭ i reputacyi inšych asob, achovy dziaržaŭnaj biaśpieki, hramadskaha paradku, zdaroŭja abo maralnaści nasielnictva, havorycca ŭ kamientary.
«Lubyja abmiežavańni nie pavinny padryvać sutnaść samoha prava, i ŭ hetym sensie pazbaŭleńnie voli za takoha rodu dziejańni, jakija pastavili ŭ vinu Katlarovu, — heta najhrubiejšaje parušeńnie pravoŭ čałavieka», — ličać pravaabaroncy.
Taksama, u adpaviednaści z Kiraŭnictvam pa vyznačeńni paniaćcia «palityčny źniavoleny», kali pazbaŭleńnie voli było ŭžyta vyklučna z-za palityčnych, relihijnych ci inšych pierakanańniaŭ, a taksama ŭ suviazi ź niehvałtoŭnym ažyćciaŭleńniem svabody dumki, sumleńnia i relihii, svabody vykazvańnia mierkavańniaŭ i infarmacyi, svabody mirnych schodaŭ i asacyjacyj, inšych pravoŭ i svabod, harantavanych Mižnarodnym paktam ab hramadzianskich i palityčnych pravach, asoba pryznajecca palityčnym źniavolenym.
«Akramia taho, asudžeńnie Katlarova supravadžałasia hrubym parušeńniem pryncypu spraviadlivaha pravasudździa — jaho sprava była razhledžanaja na zakrytym pasiadžeńni biez adpaviednych padstaŭ», — adznačyli ŭ PC «Viasna».
20 listapada biełaruskaja pravaabarončaja supolnaść pryznała palitviaźniami jašče 13 čałaviek. Siarod ich Katlaroŭ, viadomy taksama jak internet-pravakatar. Jon adznačyŭsia i tym, što śviedčyŭ suprać pravaabaroncy Leanida Sudalenki na palityčna matyvavanym pracesie, pa vynikach jakoha toj byŭ pryhavorany da troch hadoŭ źniavoleńnia, raniej ładziŭ pravakacyi suprać niezaležnych ŚMI, padajučy im iłžyvuju infarmacyju pad vyhladam aktyvista apazicyi.
Taksama, pavodle źviestak pravaabaroncaŭ, jaho danosy stali padstavaj dla abvinavačvańnia niekalkich inšych hamialčan pa administracyjnych i kryminalnych artykułach.
Katlaroŭ byŭ zatrymany viasnoj 2024 hoda paśla publikacyi niekalkich videazapisaŭ, dzie jon krytykavaŭ dziejańni čynoŭnikaŭ Homielskaha abłvykankama.
Pryhavor — 1,5 hoda pazbaŭleńnia voli-vynies sud Navabielickaha rajona Homiela sioleta 8 kastryčnika (sudździa Hienadź Kałacej).
Kamientary
Mnie ni padabajecca vašaja pazicyja ale addam žyćcie kab vy jaje vykazali..40 -35 hod tamu jaje prasoŭvali pad čas Harbačova Jak vynnmk??
Tut albo kryžyk źniać, albo majtki nadzieć.