Pastavilisia da filma 94-hadovaha Istvuda jak da śmiećcia. A jon uznačaliŭ rejtynhi
«Juror #2» Klinta Istvuda ździviŭ śviet. A jašče bolš — jahonaha partniora, kinakampaniju Warner Bros.
Klint Istvud (Clint Eastwood) — žyvaja lehienda Halivuda. Jon atrymaŭ viadomaść dziakujučy vesternam i režysiorskim šedeŭram, siarod jakich «Nieprabačany», «Mistyčnaja raka» i «Małyška na miljon».
Jak piša polski partał Onet.pl, apošnija hady dla 94-hadovaha metra byli niaprostymi. Dźvie jaho niadaŭnija stužki, «Richard Jewel» i «Cry Macho», paciarpieli finansavuju niaŭdaču, nie sabraŭšy čakanych srodkaŭ. U vyniku kinakampanija Warner Bros. pierastała vieryć u jaho i vyrašyła nie davać jaho novamu filmu «Juror #2» šyrokaha prakatu ŭ ZŠA dy inšych krainach.
U miedyja šyroka abmiarkoŭvałasia takoje staŭleńnie da vieterana režysury: mnohija ličyli, što studyja pavinna była z bolšaj pavahaj pastavicca da Istvuda, z ulikam jaho zasłuh. Ale nie heta zaraz samaje istotnaje.
Na dziva ŭsim, «Juror #2» staŭ sapraŭdnym chitom, kali 20 śniežnia stužka źjaviłasia na stryminhavaj płatformie Max. Krytyki i hledačy vysoka acanili ideju dy režysiorskuju rabotu. Na Rotten Tomatoes rejtynh składaje ažno 93%, a ahulnaja adznaka karystalnikaŭ — 91%.
Bolš za toje, film uznačaliŭ śviatočnyja rejtynhi prahladaŭ u 16 krainach, u tym liku ŭ ZŠA, abahnaŭšy navat hučnuju premjeru «Džokier: šalenstva na dvaich».
U šerahu jeŭrapiejskich krain, u tym liku ŭ Francyi, «Juror #2» źjaviŭsia ŭ kinateatrach i zarabiŭ kala 12 miljonaŭ dołaraŭ, trapiŭšy na 20-je miesca samych prybytkovych filmaŭ hoda. Analityki ličać, što pry bolš šyrokim prakacie ad Warner Bros. stužka ź vialikaj vierahodnaściu ŭžo adbiła b svoj 35-miljonny biudžet.
Siužet «Juror #2» razhortvajecca vakoł Džaścina Kiempa (Nikałas Chołt), jaki stanovicca prysiažnym u rezanansnaj spravie ab zabojstvie. Niečakana hieroj razumieje, što mienavita jon datyčny da hibieli achviary. Pierad im paŭstaje ciažkaja maralnaja dylema: albo manipulavać rašeńniem svaich kalehaŭ, kab schavać udzieł u złačynstvie, albo pryznacca i panieści adkaznaść.
Akramia Chołta, u filmie zdymajucca takija zorki, jak Toni Kalet, Zoi Dojč, Łeśli Bib, Kifier Sazierlend i łaŭreat «Oskara» Džej Kiej Simans.
«Naša Niva» — bastyjon biełaruščyny
PADTRYMAĆCiapier čytajuć
«Čamu my pavinny niejak uščemlivać siabie?». Dyrektarka RTBD patłumačyła, čamu pastaviła śpiektakl pavodle Puškina ŭ adnym z apošnich teatraŭ krainy, jaki pracavaŭ pa-biełarusku5959
Kamientary