Viarchoŭny sud ZŠA schilajecca da zachavańnia raniejšaha rašeńnia nakont TikTok

Viarchoŭny sud ZŠA, zdajecca, hatovy padtrymać zakon, jaki zabaraniaje ŭ krainie płatformu dla stvareńnia karotkich videa TikTok pa pryčynach nacyjanalnaj biaśpieki, kali kitajskaja maciarynskaja kampanija nie pradaść płatformu da 19 studzienia, piša Bi-bi-si.

Słuchańni ŭ Viarchoŭnym sudzie nakont losu TikTok u ZŠA doŭžylisia ŭ piatnicu kala dźviuch z pałovaj hadzin. Za hety čas vystupili advakaty płatformy, pradstaŭniki ŭrada ZŠA i stvaralniki kantentu ŭ TikTok.

U krasaviku 2024 hoda Kanhres ZŠA pryniaŭ zakon, jaki abaviazvaje kitajskaha ŭładalnika TikTok, ByteDance, pradać płatformu amierykanskaj kampanii albo sutyknucca z zabaronaj sacsietki na terytoryi ZŠA z 19 studzienia 2025 hoda. Kampanija zajaviła, što nie budzie pradavać płatformu.

Amierykanskija čynoŭniki śćviardžajuć, što, budučy kitajskaj kampanijaj, TikTok patencyjna daje Piekinu mahčymaść źbirać danyja pra amierykancaŭ i ŭpłyvać na hramadskuju dumku.

U śniežni minułaha hoda apielacyjny sud ZŠA, jaki składajecca z troch sudździaŭ, padtrymaŭ zakon, zajaviŭšy, što hetaja miera była apraŭdanaja jak «častka bolš šyrokich namahańniaŭ pa supraćstajańni abhruntavanaj pahrozie nacyjanalnaj biaśpieki», jakaja pachodzić ad Piekina.

Rašeńnie najvyšejšaj sudovaj instancyi ZŠA pavinna być pryniata ŭ bližejšyja niekalki dzion.

Na słuchańniach u Viarchoŭnym sudzie ŭ piatnicu advakaty, jakija pradstaŭlajuć TikTok i stvaralnikaŭ kantentu, zajavili, što zabarona płatformy budzie parušeńniem svabody słova dla bolš čym 170 miljonaŭ karystalnikaŭ TikTok u ZŠA.

Urad ZŠA znoŭ nahadaŭ, što biez prodažu TikTok moža być vykarystany Kitajem jak instrumient dla špijanažu i palityčnych manipulacyj. Juryst Ministerstva justycyi Elizabet B. Prełohar nahadała sudu, što Piekin «u luby momant moža vykarystoŭvać TikTok u jakaści zbroi, kab nanieści škodu ZŠA».

U TikTok nieadnarazova admaŭlali, što kitajskaja kampartyja vykarystoŭvaje kampaniju dla raspaŭsiudžvańnia svajho ŭpłyvu, i zajaŭlali, što pryniaty ŭ ZŠA zakon parušaje pravy karystalnikaŭ na svabodu słova ŭ adpaviednaści ź Pieršaj papraŭkaj da amierykanskaj Kanstytucyi.

Nael Francyska, były hienieralny prakuror ZŠA, jaki vystupaje na baku TikTok, padkreśliŭ, što zabarona na samuju papularnuju ŭ amierykancaŭ płatformu dla znosin moža taksama adkryć akno mahčymaściej dla cenzury. Jon nastojvaŭ, što «urad nie moža abmiažoŭvać svabodu słova, kab abaranić nas ad samoha słova». «Ale mienavita heta i robić hety zakon ad pačatku da kanca», — zajaviŭ jon.

Džefry Ł. Fišer, prafiesar prava Stenfardskaha ŭniviersiteta, jaki pradstaŭlaje intaresy stvaralnikaŭ kantentu, zajaviŭ sudu, što kraina histaryčna sutykałasia z «ideałahičnymi kampanijami zamiežnych praciŭnikaŭ». Adnak, na jaho dumku, u adpaviednaści ź Pieršaj papraŭkaj prostyja idei nie ŭjaŭlajuć saboj pahrozu nacyjanalnaj biaśpiecy ZŠA.

Za čas słuchańniaŭ sudździ nieadnarazova viartalisia da pytańniaŭ nacyjanalnaj biaśpieki i svabody słova.

«Ci pavinny my ihnaravać toj fakt, što kančatkovaja maciarynskaja kampanija sapraŭdy abaviazana zajmacca raźviedvalnaj dziejnaściu dla kitajskaha ŭrada?» — spytaŭ kansiervatyŭny staršynia Viarchoŭnaha suda Džon Robierts u vystupajučaha na baku TikTok Noela Francyska.

Sudździa Bret Kavana źviarnuŭ asablivuju ŭvahu na aściarohi, jakija ŭrad ZŠA vykazvaje nakont danych, što źbirajucca dadatkam pra svaich karystalnikaŭ, i taho, jak hetyja danyja mohuć być vykarystany. «Hetyja ryzyki vyhladajuć jak vielizarnaja pahroza dla budučyni krainy», — skazaŭ jon.

• 4
• 0
• 0
• 0
• 0
• 0
• 0
• 0