Vajskovyja vydatki Rasii, jakija paśla ŭvarvańnia va Ukrainu vyraśli ŭ 4 razy i dasiahnuli rekordnaha z časoŭ SSSR uzroŭniu, mohuć być istotna vyšejšyja za aficyjna viadomyja ličby. Heta śćviardžaje Krejh Kienedzi, inviestbankir, jaki ŭ minułym zajmaŭ pasadu namieśnika staršyni rady dyrektaraŭ Bank of America Merrill Lynch, piša The Moscow Times.
Pavodle acenki Kienedzi, u dadatak da 22 trłn rubloŭ (kala $215 młrd), jakija na artykuł «Nacyjanalnaja abarona» vydzieliŭ fiederalny biudžet Rasii, jašče kala 25 trłn rubloŭ ($249 młrd) na vajskovyja patreby pajšło praz rasijskija banki, jakija aktyŭna kredytavali pradpryjemstvy VPK, pieraviedzienyja ŭ trochźmienny režym dla zborki tankaŭ, snaradaŭ i rakiet.
Kienedzi źviartaje ŭvahu na toje, što ź siaredziny 2022 hoda abjomy karparatyŭnaha kredytavańnia ŭ Rasii ŭźlacieli na biesprecedentnyja 71%, abo kala $450 młrd u hrašovym vyražeńni. Z 50% da 60% hetych pazyk dastałasia źviazanym z abaronaj halinam, śćviardžaje ekśpiert sa spasyłkaj na halinovuju statystyku Centrabanka.
«Heta kredyty, jakija dziaržava prymusiła banki vydzielić u asnoŭnym niekredytazdolnym pradpryjemstvam APK na lhotnych umovach. U vyniku pazabiudžetnaje finansavańnie [vajny] praktyčna zraŭniałasia z płyniami, jakija išli praź fiederalny biudžet», — piša Kienedzi.
Pamier «patajemnaha» vajskovaha biudžetu Kramla, jak vynikaje z acenak ekśpierta, moh skłaści ŭ siarednim kala $83 młrd u hod, abo kala $228 młn u dzień, a sumarna za try hady praktyčna zraŭniaŭsia ź niezamarožanaj častkaj reziervaŭ Centrabanka RF (krychu bolš za $300 młrd) i pieravysiŭ hadavy VUP takich krain, jak Hrecyja ($238 młrd), Katar ($235 młrd) abo Vienhryja ($212 młrd). Heta stvarała iluziju ŭstojlivaści vajskovaj mašyny Rasii i schiem jaje finansavańnia, miarkuje Kienedzi.
Anałahičnuju pazabiudžetnuju schiemu Kreml užo vykarystaŭ raniej, choć i ŭ mienšych maštabach, nahadvaje ekśpiert: praź ilhotnyja bankaŭskija kredyty ŭ 2010-ja hady finansavałasia hihanckaja dziaržprahrama ŭzbrajeńniaŭ koštam 20 trłn rubloŭ, u ramkach jakoj prezidentu Uładzimiru Pucinu abiacali pastavić u vojski dyvizijony tankaŭ «Armata», 600 samalotaŭ i tysiačy viertalotaŭ, pavialičyŭšy dolu sučasnych uzbrajeńniaŭ u vojsku da 70%.
Tady dasiahnieńni VPK zastalisia tolki na papiery, a ŭradu pryjšłosia śpisać kredyty abaronnym zavodam na sotni miljardaŭ rubloŭ. Hetaja situacyja moža paŭtarycca znoŭ, ale ŭžo ŭ kudy bolšym maštabie, ličyć Kienedzi.
Vydača pazyk niepłaciežazdolnym pradpryjemstvam VPK stvaraje «pieradumovy dla sistemnaha kredytnaha kryzisu» ŭ Rasii», piša jon: u kančatkovym vyniku dziaržavie, mahčyma, pryjdziecca ratavać jak sami abaronnyja zavody, tak i banki, jakija ich kredytavali.
Akramia taho, praciahvaje Kenedzi, napampoŭka siektara VPK hrašyma ŭžo stała hałoŭnaj pryčynaj razhonu inflacyi, na jaki CB RF adreahavaŭ pavyšeńniem pracentnaj staŭki da 21% — uzroŭniu, jakoha ekanomika nie bačyła z pačatku 2000-ch.
Usio heta, padkreślivaje ekśpiert, daje Zachadu dadatkovyja ryčahi ŭpłyvu na Uładzimira Pucina, jaki znachodzicca pierad ciažkaj dylemaj: čym daŭžej jon adkładaje pačatak pieramoŭ pa Ukrainie, tym bolšaja ryzyka, što raptoŭny bankaŭski kryzis moža rezka asłabić jaho pieramoŭnyja pazicyi.
U biudžet 2025 hoda rasijski ŭrad zakłaŭ dalejšy rost abaronnych vydatkaŭ — na 22%, da 13,2 trłn rubloŭ (kala $130 młrd). Letaś na artykuł «Nacyjanalnaja abarona» było zakładziena 10,8 trłn rubloŭ ($106 młrd), u 2023 hodzie — 6,8 trłn ($67 młrd), a ŭ 2022-m — 4,7 trłn ($46 młrd).
Fica prapanavaŭ Zialenskamu sustrecca i abmierkavać tranzit hazu. Toj adkazaŭ łakanična
Šviejcaryja zajaviła pra hatoŭnaść pryniać sustreču Pucina i Trampa pa rasijska-ŭkrainskaj vajnie
«Rasija nikoli nas nie padmanvała, u adroźnieńnie ad Ukrainy». Słavacki premjer pahardliva vykazaŭsia pra Zialenskaha i ŭkraincaŭ
Pucin płanuje abmierkavać z Trampam nieŭstupleńnie Kijeva ŭ NATO
«Mnie tak škada jaho. Jon nie razumieje, što adbyvajecca». Były tvar prakramloŭskaj moładzi vykazaŭsia pra Pucina
Kamientary