Bajden choča paśpieć vykraślić Kubu sa śpisu sponsaraŭ teraryzmu ŭ abmien na vyzvaleńnie palitviaźniaŭ
Administracyja Džo Bajdena ŭ aŭtorak paviedamiła Kanhresu pra namier vykraślić Kubu sa śpisu dziaržaŭnych sponsaraŭ teraryzmu. Jak zajavili ŭ Biełym domie, hetaje rašeńnie pryniata ŭ miežach pahadnieńnia, jakoje było dasiahnuta pry pasiarednictvie Katalickaj carkvy dla vyzvaleńnia palityčnych viaźniaŭ na vostravie, piša Associated Press.
Pa słovach vysokapastaŭlenych čynoŭnikaŭ ZŠA, jakija paviedamili AP hetuju infarmacyju na ŭmovach ananimnaści, «mnohija dziasiatki» palityčnych viaźniaŭ i inšych asob, jakich Złučanyja Štaty ličać niezakonna zatrymanymi, buduć vyzvalenyja da zakančeńnia terminu paŭnamoctvaŭ Bajdena 20 studzienia.
ZŠA taksama źmiakčać ekanamičny cisk na Kubu, a taksama niekatoryja zachady, pryniatyja ŭ 2017 hodzie tahačasnym prezidentam Donaldam Trampam, jakija pastrožyli pazicyju ZŠA adnosna Kuby.
Adnak ž, jak adznačajecca, rašeńnie Bajdena, chutčej za ŭsio, budzie admieniena ŭžo na nastupnym tydni, kali na pasadu znoŭ zastupić toj ža Donald Tramp, a pasadu dziaržsakratara pry im zojmie Marka Rubia, jaki maje kubinskija karani.
Pry hetym cikava, što ŭ śpis sponsaraŭ teraryzmu Kubu Tramp uklučyŭ taksama ŭ samym kancy svajho pieršaha prezidenckaha terminu, 11 studzienia 2021 hoda. Heta rašeńnie admianiła papiaredniaje, pryniataje padčas paciapleńnia adnosin pamiž Kubaj i ZŠA ŭ druhi termin prezidenctva Baraka Abamy. Abhruntavańniem takoha kroku tady stała padtrymka Kubaj lidara Vieniesueły Nikałasa Madura, admova vydać kałumbijskich paŭstancaŭ uładam Kałumbii i praciah chavańnia asob, jakija šukajucca amierykanskimi ŭładami.
Ad pierachodnaj kamandy Trampa i ofisa Marka Rubia pakul nie pastupała aficyjnych kamientaroŭ adnosna namieraŭ Bajdena. Adnak sienatar Ted Kruz z Techasa, respublikaniec i kaleha Rubia pa kamitecie mižnarodnych adnosin Sienata, rezka raskrytykavaŭ hetaje rašeńnie.
«Teraryzm, jaki padtrymlivajecca režymam na Kubie, nie spyniŭsia. Ja budu pracavać z prezidentam Trampam i maimi kalehami, kab adrazu admianić hetaje rašeńnie i minimizavać škodu», — zajaviŭ jon.
Tramp nie płanuje pakidać Kijeŭ biez padtrymki, bo baicca novaha Afhanistana
«Heta ja źjaviŭsia ŭ centry Kijeva, a nie Pucin». Bajden padvioŭ mižnarodnyja vyniki svajho prezidenckaha terminu
Bieły dom abjaviŭ pra ŭviadzieńnie samych maštabnych sankcyj suprać rasijskaha enierhietyčnaha siektara
82-hadovy prezident ZŠA Džo Bajden staŭ pradziedam
Ciapier čytajuć
Małady biełarus nie chacieŭ siadzieć u Rasii za narkotyki, tamu prydumaŭ, jak chutka vyjści z kałonii — i vyjšaŭ na ŭkrainskija pazicyi pad Pakroŭskam44
Kamientary