Na miažy ź Biełaruśsiu litoŭskija pamiežniki zaviarnuli rekordnuju kolkaść nielehalnych mihrantaŭ
Doŭhi čas mihrantaŭ na miažy amal nie było.
U minułyja sutki litoŭskija pamiežniki zaviarnuli na biełaruskaj miažy rekordnuju kolkaść nielehalnych mihrantaŭ — 48 čałaviek. Vyjavić ich dapamoh viertalot pamiežnikaŭ, piša Delfi.
Pavodle Słužby achovy dziaržaŭnaj miažy (SADM), z kastryčnika 2023 hoda heta rekordnaja kolkaść zaviernutych mihrantaŭ — tady ich było 54 čałavieki.
Mihranty padzialilisia na hurty ad 4 da 12 čałaviek, u niekatorych ź ich byli nažnicy dla razrazańnia kancerciny.
Zamiežniki pradstavilisia hramadzianami Afhanistana, dakumientaŭ pry ich nie było, dapamohi ŭ litoŭskich pamiežnikaŭ jany nie prasili, paviedamlaje SADM. «Jany raspaviali, što biełaruskija pamiežniki nibyta ich vieźli i zabrali dakumienty», — dadali ŭ Słužbie.
Sioleta litoŭskija pahraničniki papiaredzili praniknieńnie 72 nielehalnych mihrantaŭ u Litvu ź Biełarusi.
Niekatory čas, pryblizna kala 20 dzion, litoŭskija pamiežnyja słužby nie fiksavali sprobaŭ nielehalnych mihrantaŭ trapić u Litvu.
U 2024 hodzie litoŭcy nie ŭpuścili 1002 nielehalnych mihranta ź Biełarusi. U 2023 hodzie — 2643. U 2022 hodzie litoŭskija pamiežniki zaviarnuli 11 211 mihrantaŭ ź Biełarusi, jakija sprabavali niezakonna patrapić na terytoryju Litvy.
Usiaho z pačatku mihracyjnaha kryzisu, spravakavanaha biełaruskim režymam, litoŭskija pamiežniki nie ŭpuścili ŭ krainu 23034 imihrantaŭ, jakija sprabavali zrabić heta nielehalna.
Ciapier čytajuć
U Estonii aryštavany Aleh Maisiejeŭ, kažuć jaho znajomyja. Heta były kiroŭca Cichanoŭskaj, jaki z časam staŭ jaje zaciatym krytykam23
Kamientary