Rasśledavalniki dali novuju acenku zahinułych rasijskich vajskoŭcaŭ na vajnie va Ukrainie
Hałoŭny dla RF vynik troch hadoŭ vajny: kraina raspłačvajecca za napad na Ukrainu sotniami žyćciaŭ za dzień. Apublikavanaja novaja acenka strat ad «Mieduzy» i «Miedyjazony».
Poŭnamaštabnaja vajna Rasii z Ukrainaj doŭžycca roŭna try hady. Za avanturu, raspačatuju Uładzimiram Pucinym, rasijskaje hramadstva zapłaciła vializnuju canu.
Na vajnie zahinuli ŭžo kala 160-165 tysiač sałdat, aficeraŭ, kantraktnikaŭ, mabilizavanych i inšych rasijan.
Heta ličba — statystyčnaja acenka zališniaj mužčynskaj śmiarotnaści za pieryjad vajny, atrymanaja kamandaj «Mieduzy» i «Miedyjazony».
Za try hady vajny jaje charaktar mianiaŭsia, što adbivałasia jak na dynamicy prasoŭvańnia bakoŭ, tak i na stratach, jakija jaho supravadžali, pišuć rasśledavalniki.
Samaja ahulnaja vysnova, jakuju možna zrabić pa vynikach trochhadovaha supraćstajańnia, składajecca ŭ tym, što straty rasijskaha boku pavialičvalisia z hoda ŭ hod. Za try pieršyja miesiacy vajny Uzbrojenyja siły RF hublali zabitymi kala 40-60 čałaviek u dzień, a za toj ža pieryjad minułaha hoda — užo pa 250 čałaviek. Na karcie bajavych dziejańniaŭ takaja dynamika strat pry hetym praktyčna nijak nie adbivałasia. Sumarna kraina hublała zabitymi ŭ kožnym nastupnym hodzie amal udvaja bolš, čym letaś.
U 2022 hodzie na vajnie zahinuła kala 20 tysiač rasijan.
U 2023-m da ich dabavilisia prykładna 50 (ad 47 da 53) tysiač zahinuŭšych.
U 2024-m kolkaść strat nabliziłasia da 100 tysiač.
Apošniaja acenka, najmienš dakładnaja z usich pryviedzienych, u budučyni jana jašče moža być udakładniena — heta źviazana z asablivaściami mietadu — čym bolš času prachodzić z momantu bajavych dziejańniaŭ, tym bolš nazapašvajecca danych i tym dakładniej možna acanić zališniuju mužčynskuju śmiarotnaść.
Acenka, zroblenaja kamandaj «Mieduzy» i «Miedyjazony», źjaŭlajecca vynikam supastaŭleńnia i analizu kankretnych dakumientaŭ: pajmiennych śpisaŭ zahinułych, jakija składajucca vałanciorami z pačatku ŭvarvańnia, i Rejestra spadčynnych spraŭ, u jakim publikujecca infarmacyja ab usich rasijskich spadčynadaŭcach.
U acenku nie ŭklučany hramadzianie inšych krain, jakija vajavali na baku Rasii, — u tym liku žychary Łuhanskaj, Danieckaj i inšych abłaściej Ukrainy.
Kolkaść taksama abmiežavana zahinułymi i nie ŭklučaje paranienych. Niahledziačy na ŭsie abmiežavańni, hetaja acenka — samaje nadziejnaje z taho, što možna skazać ab ahulnych stratach Rasii na siońnia. Pra toje, jak jana atrymana, čamu joj možna daviarać, a taksama inšyja ličby padrabiazna možna pračytać tut.
Kamientary