Dziaržsakratar ZŠA: My pravierym, nakolki ščyra ŭ Kramli chočuć spynieńnia vajny

Rubia adznačyŭ, što hałoŭnym u pracy nad hetaj damovaj z amierykanskaha boku byŭ ministr finansaŭ Skot Biesent, jaki, pavodle jaho słoŭ, «prarabiŭ vielizarnuju pracu», i ciapier «da finišu zastaŭsia apošni ryvok», piša «Hołas Amieryki».

«Tak što my blizkija da mety, i heta dobra, — skazaŭ Rubia. — My pa-raniejšamu chočam pakłaści kaniec hetaj vajnie».

Dziaržsakratar ZŠA nie staŭ kamientavać publikacyi roznych ŚMI pra razychodžańni pamiž Donaldam Trampam i Uładzimiram Zialenskim i adsutnaść kamunikacyi pamiž imi, ale paćvierdziŭ, što «pahavaryŭšy z Pucinym, ź jakim jon (Tramp) nie razmaŭlaŭ čatyry hady, prezident Tramp adrazu ž patelefanavaŭ Zialenskamu».

«Ja prysutničaŭ pry abiedźviuch razmovach, — raskazaŭ Rubia. — Tramp biez pramarudžańnia patelefanavaŭ Zialenskamu, a paśla Zialenski sustreŭsia z našym ministram finansaŭ, potym sa mnoj i vice-prezidentam, a potym z Kiełaham… Tamu kazać pra toje, što my nie ŭzajemadziejničajem ź imi, — heta prosta niapraŭda».

Marka Rubia pryznaŭsia, što da kanca nie ŭpeŭnieny, nakolki ščyra ŭ Kramli žadajuć spynieńnia vajny.

«My heta pravierym, — zajaviŭ dziaržsakratar ZŠA. — My spytali ich: pasłuchajcie, siabry, vy chočacie pakłaści kaniec vajnie ci praciahvać jaje? Kali vy chočacie spynić vajnu, my možam abmierkavać, što dla hetaha treba… Kali vy chočacie praciahvać vajnu, tak i skažycie. I jany pahadzilisia praciahnuć abmierkavańnie… Kali toje, na čym jany nastojvajuć, nierealistyčnaje, to my zrazumiejem, što jany nasamreč nie aceńvajuć situacyju realistyčna».

Rubia padkreśliŭ, što prezident ZŠA Donald Tramp «umieje damaŭlacca» i «nie dazvolić uciahnuć siabie ŭ niavyhadnuju ździełku».

U hetym intervju kiraŭnik Dziarždepartamienta jašče raz paŭtaryŭ, što jeŭrapiejskija krainy-členy NATA «pavinny inviestavać u svaju nacyjanalnuju biaśpieku».

«Adnak jany hetaha nie robiać, — skazaŭ Rubia. — Hetyja krainy traciać na heta ad paŭtara da adnaho pracenta (svajho VUP), i my prosta nie možam praciahvać subsidavać usio heta. Heta niespraviadliva i bolš nie moža tak praciahvacca. Bo adzinaje, što stavić NATA pad pahrozu, — heta toje, što ŭ niekatorych našych sajuźnikaŭ pa NATA amal niama ŭzbrojenych sił, albo jany nie vielmi bajazdolnyja, tamu što na praciahu 40 hadoŭ jany ŭvohule nie ŭkładvali srodki ŭ heta. NATA — heta byli ZŠA».

• 3
• 1
• 3
• 4
• 1
• 0
• 0
• 0