Novym lidaram kiroŭnaj Libieralnaj partyi Kanady abrany były kiraŭnik Banka Anhlii Mark Karni. Jon źmienić na pasadzie premjer-ministra krainy Džaścina Trudo, jaki ŭ studzieni hetaha hoda zajaviŭ pra namier pajści ŭ adstaŭku, piša Bi-bi-si.
Karni byŭ adzinym kandydatam na pasadu lidara partyi, jaki nie ŭvachodziŭ va ŭrad Trudo. Pavodle vynikaŭ hałasavańnia jon nabraŭ 85,9%.
Akramia zaciataha zmahańnia z apazicyjaj na ŭsieahulnych vybarach, jakija adbuducca ŭ hetym hodzie, novamu premjeru taksama daviadziecca vieści składanyja pieramovy z ZŠA ab taryfach na fonie terytaryjalnych pretenzij Donalda Trampa.
U svaim vystupie paśla pieramohi Karni abvinavaciŭ Trampa ŭ imknieńni zachapić Kanadu. Hetaja sproba, pavodle jaho słoŭ, pavinna być adbitaja.
«Amierykancam patrebnyja našy resursy, naša vada, naša ziamla, naša kraina, — zajaviŭ jon. — Kali b im heta ŭdałosia, jany b źniščyli naš ład žyćcia».
«Amieryka — heta nie Kanada. Kanada nikoli nie budzie častkaj Amieryki ni ŭ jakim vyhladzie, ni ŭ jakoj formie», — dadaŭ Karni.
59-hadovaha Marka Karni ŭžo šmat hadoŭ ličyli patencyjnym lidaram libierałaŭ, hałoŭnym čynam dziakujučy jaho reputacyi ŭ finansavaj śfiery.
Jon pazicyjanavaŭ siabie jak aŭtsajdar, jaki nie ŭvachodzić u niepapularny ŭrad Trudo, i adznačaŭ, što choča zasiarodzicca na palapšeńni ekanamičnaj situacyi ŭ krainie.
Trudo abviaściŭ pra svaju adstaŭku pierad ahulnanacyjanalnym źjezdam Libieralnaj partyi. Tam pavinna było vyrašacca pytańnie ab pieravybrańni partyjnaha kiraŭnictva, i premjer, jak miarkujuć, chacieŭ paźbiehnuć situacyi, kali ŭłasnyja adnapartyjcy źnimuć jaho z pasady lidara.
Novaha lidara pavinny byli vybirać kala 400 tys. členaŭ Libieralnaj partyi. U vyniku svaje hałasy padali kala 150 tys. čałaviek.
Apošnim časam Libieralnaja partyja prykmietna straciła papularnaść. Apytańni hramadskaj dumki pradkazvajuć jaje paražeńnie na ŭsieahulnych vybarach, jakija pavinny adbycca nie paźniej za 20 kastryčnika.
Abjaŭlajučy pra svaju adstaŭku, Trudo pryznaŭ, što ŭ krainie ŭźnik raskoł, parłamient faktyčna paralizavany niekalki miesiacaŭ, a kirujučuju partyju raździrajuć unutranyja batalii.
«Kanadzie treba pieravieści duch, a kanadcy zasłuhoŭvajuć prava sapraŭdnaha vybaru na nastupnych vybarach», kazaŭ Trudo.
Chto taki Mark Karni
Karni — kanadziec i viadomy ekanamist. Jon byŭ kiraŭnikom Banka Kanady ŭ 2008—2013 hadach, u pieršyja hady paśla suśvietnaha finansavaha kryzisu.
Zatym, u 2013—2020 hadach, jon uznačalvaŭ Bank Anhlii, i jaho słužba na hetaj pasadzie prypała na burnyja hady breksitu.
«Ja ŭdzielničaŭ u vyrašeńni mnohich kryzisaŭ i vyratavańni dvuch ekanomik. Ja viedaju, jak pracuje biźnies, i ja viedaju, jak prymusić jaho pracavać na vas», — kazaŭ Karni, abviaščajučy pra vyłučeńnie svajoj kandydatury ŭ svaim rodnym horadzie Edmantan.
U apošnija niekalki miesiacaŭ Karni słužyŭ daradcam Trudo pa ekanomicy, ale paśla staŭ krytykavać byłoha premjera za jaho dziejańni ŭ hetaj śfiery.
«Ja — nie adziny člen Libieralnaj partyi ŭ Kanadzie, jaki ličyć, što premjer-ministr i jaho kamanda zanadta časta adciahvalisia ad ekanomiki», — kazaŭ Karni.
Kamientary