Tramp: U roście cen na bienzin vinavatyja Ukraina i amierykanskija demakraty
Prezident ZŠA Donald Tramp znoŭ źviazaŭ rost suśvietnych cen na paliva z udarami Ukrainy pa rasijskich naftapierapracoŭčych zavodach. Pavodle jaho słoŭ, takija ataki skaračajuć prapanovu paliva na suśvietnym rynku. Hetym razam Tramp taksama nazvaŭ adnoj z pryčyn rostu cen zakryćcio naftapierapracoŭčych mahutnaściaŭ u štatach ZŠA, dzie kirujuć demakraty.
«Što zaraz padymaje ceny na bienzin — heta ŭžo nie Armuzski praliŭ, bo tam amal kožny dzień prachodzić rekordnaja kolkaść baralaŭ nafty, a słova «naftapierapracoŭčyja zavody». Rasijskija zavody ŭzryvaje Ukraina, a našy zakryvajuć demakraty ŭ sinich štatach, naprykład u Kalifornii», — napisaŭ Tramp u svajoj sacsietcy Truth Social.
Tramp užo nieadnarazova źviazvaŭ prablemy na rynku paliva z ukrainskimi atakami na rasijskuju naftavuju infrastrukturu. U siaredzinie vieraśnia jon zajaviŭ, što Ukrainie varta spynić takija ŭdary, bo, na jaho dumku, jany spryjajuć suśvietnamu deficytu dyzielnaha paliva.
28 vieraśnia Tramp raskazaŭ, što abmiarkoŭvaŭ hetaje pytańnie z prezidentam Ukrainy Uładzimiram Zialenskim. Pavodle jaho słoŭ, jon paprasiŭ Zialenskaha asłabić udary pa rasijskich NPZ, a ŭ adkaz pačuŭ, što Ukraina, vierahodna, tak i zrobić. Adnak 30 vieraśnia Tramp znoŭ zajaviŭ, što asnoŭnaja pryčyna prablem na rynku dyzielnaha paliva źviazanaja nie ź Blizkim Uschodam, a z padziejami ŭ Rasii.
Ukraina paśla hetaha praciahnuła nanosić udary pa rasijskich naftapierapracoŭčych pradpryjemstvach i nie abviaščała pra adnabakovaje spynieńnie takich atak. Zialenski prapanoŭvaŭ pry pasiarednictvie ZŠA damovicca ab uzajemnym spynieńni ŭdaraŭ pa enierhietyčnych abjektach. Kijeŭ byŭ hatovy abmiežavać ataki na rasijskuju naftavuju halinu ŭ abmien na spynieńnie Maskvoj udaraŭ pa ŭkrainskaj enierhietycy i krytyčnaj infrastruktury, ale Rasija na takuju prapanovu nie pahadziłasia.
Pry hetym pieraboi z pastaŭkami paliva na Blizkim Uschodzie byli bolš značnymi, čym skaračeńnie rasijskich pastavak. Pavodle raźlikaŭ Bloomberg, z sakavika pa žnivień pastaŭki dyzielnaha paliva ź Blizkaha Uschodu skaracilisia prykładna na 770 tysiač baralaŭ u sutki, tady jak pastaŭki z Rasii — prykładna na 350 tysiač baralaŭ u sutki.
Tramp padčas telefonnaj razmovy ź Zialenskim nastojliva patrabavaŭ spynić udary pa rasijskich NPZ
Naftaviki ZŠA papiaredzili, što miechanizmy strymlivańnia suśvietnaha paliŭnaha kryzisu vyčarpanyja
«Bolš nie budzie tak, što pakutuje tolki kraina, na jakuju napali». Zialenski adkazaŭ na zaklik Trampa spynić vajnu
The Atlantic: Tramp padtrymaŭ ideju źmiakčeńnia sankcyj suprać Rasii ŭ abmien na vyzvaleńnie palitviaźniaŭ
Kamientary