Rasija prapanuje nieraźmiaščeńnie «Arešnika» ŭ Biełarusi ŭzamien na nieraźmiaščeńnie amierykanskich balistyčnych rakiet siaredniaj dalokaści ŭ Jeŭropie

Dakumient byŭ pieradadzieny vydańniu adnoj ź jeŭrapiejskich raźviedak i byŭ aformleny prykładna za tydzień da pieršych pieramoŭ ZŠA i Rasii ŭ Er-Ryjadzie 18 lutaha. U dakumiencie vykładzieny maksimalisckija patrabavańni Maskvy, biez najmienšaha namioku na kampramis.

Asnoŭnyja pałažeńni dakumienta

Rasija adchilaje ideju Donalda Trampa zaviaršyć vajnu «za 100 dzion», ličačy jaje nierealnaj. Pavodle rasijskaj pazicyi, mirnaje ŭrehulavańnie niemahčymaje raniej za 2026 hod.

Meta Rasii — padzialać ZŠA i ich sajuźnikaŭ, asłablajučy pazicyju Vašynhtona ŭ pieramovach pa Ukrainie. Taksama Kreml sprabuje ŭzmacnić napružanaść pamiž ZŠA i Kitajem. Maskva vykarystoŭvaje nie tolki cisk, ale i «padarunak» — naprykład, prapanuje ZŠA karysnyja vykapni, u tym liku na akupavanych terytoryjach Ukrainy.

Padzialajučy zachodnija krainy, Maskva choča narmalizavać adnosiny z ZŠA, u tym liku praz adnaŭleńnie pracy ambasad.

Rasija kateharyčna adchilaje ideju raźmiaščeńnia miratvorcaŭ va Ukrainie i nastojvaje na pryznańni Zachadam rasijskaha suvierenitetu nad akupavanymi terytoryjami.

Rasija nie zhodnaja navat na pieršapačatkovy płan Kiełaha-Flejca, jaki dapuskaŭ zachavańnie akupavanych terytoryj za Rasijaj pry ŭmovie, što Ukraina nie budzie sprabavać viarnuć ich siłaj u budučyni.

Lubaja praciahłaść pastavak zbroi Ukrainie paśla mirnaha pahadnieńnia «absalutna nieprymalnaja». Akramia taho, Rasija patrabuje skaračeńnia kolkaści Uzbrojenych sił Ukrainy.

Biez aficyjnaha pryznańnia akupavanych terytoryj Kreml ličyć «vielmi vierahodnym» adnaŭleńnie bajavych dziejańniaŭ u siarednieterminovaj pierśpiektyvie — naprykład, paśla nastupnych vybaraŭ u ZŠA.

Rasija choča pašyryć «bufiernuju zonu» ŭ pamiežnych z Branskaj i Biełharadskaj abłaściami rehijonach Ukrainy (Čarnihaŭskaja, Sumskaja, Charkaŭskaja vobłaści), a taksama damahajecca demilitaryzacyi ŭkrainskaha Pryčarnamorja, uklučajučy Adeskuju vobłaść.

Nijakija palityčnyja sastupki Ukrainy (admova ad NATO, vybary z udziełam prarasijskich partyj) niedastatkovyja dla pieramoŭ. Rasija patrabuje «poŭnaha rasfarmavańnia» ciapierašniaha ŭkrainskaha ŭrada, choć u dakumiencie pryznajecca, što źmianić jaho znutry niemahčyma.

Rasija nie bačyć sensu ŭ źniaćci sankcyj u abmien na mirnaje pahadnieńnie. U dakumiencie havorycca: «Nie zusim zrazumieła, jakaja ad hetaha karyść Rasii», a taksama adznačajecca, što efiekt ad sankcyj pierabolšany.

Maskva prapanuje nieraźmiaščeńnie rasijskaha kompleksu «Arešnik» u Biełarusi ŭ abmien na admovu ZŠA ad raźmiaščeńnia balistyčnych rakiet siaredniaj dalokaści ŭ Jeŭropie.

Rasija prapanuje spynić pastaŭki zbroi «niedružalubnym da ZŠA krainam» u abmien na spynieńnie pastavak zbroi Ukrainie. Ale ŭ dakumiencie pryznajecca, što Maskvie budzie ciažka vykanać hetaje abiacańnie, bo jana maje ščylnyja suviazi z sajuźnikami.

Vysnovy ekśpiertaŭ The Washington Post

Pucin naŭrad ci adkryta skaža Trampu «nie» — heta zanadta vialiki ryzyka dla patencyjnaha sajuza z Vašynhtonam. Chutčej za ŭsio, Pucin budzie demanstravać «hnutkaść i adkrytaść», padkreślivajučy, što jon razumieje Trampa, ale nie moža pajści na sastupki biez surjoznaha abmienu.

Rasija budzie maksimalna zaciahvać pieramovy. Prosta spynić ahoń, jak taho choča Tramp, nie ŭvachodzić u intaresy Kramla. I, mahčyma, Tramp hetaha nie razumieje.

• 1
• 0
• 6
• 0
• 0
• 0
• 0
• 0