Łukašenka choča pabudavać druhuju AES na patreby Rasii i akupavanych ukrainskich terytoryj. Ale jaho čakaje siurpryz
Enierhiju druhoj AES Łukašenka choča pradavać u Branskuju vobłaść i «novyja rehijony RF» — akupavanyja ŭkrainskija terytoryi. Jaŭhien Makarčuk, śpiecyjalist adździeła enierhietyčnaj biaśpieki mižnarodnaj inicyjatyvy iSANS, prakamientavaŭ «Našaj Nivie» novuju ideju Łukašenki, a taksama patłumačyŭ, čamu pieršaja AES u Astraŭcy ŭsio jašče nie zrušyła situacyju z zaležnaściu ad rasijskich enierharesursaŭ.
«U Rasii niama niedachopu elektraenierhii. Tam jość atamnyja stancyi, ich dastatkova»
Na dumku Jaŭhiena Makarčuka, nadziei ŭładaŭ — marnyja.
Rasii i akupavanym joj ukrainskim terytoryjam enierhija ad druhoj atamnaj stancyi nie spatrebicca, bo jość svaje krynicy, jakich całkam dastatkova.
«Druhaja pryčyna — vialikaja adlehłaść. Kali Biełaruś nie moža pradać elektraenierhiju ŭ Smalenskuju vobłaść, to jak pieradaść jaje ŭ Rastoŭskuju, naprykład, ci na akupavanyja ŭkrainskija terytoryi?
Kali hlanuć na mapu, to my ŭbačym, što Rasija faktyčna akupavała Zaparožskuju AES, jakaja zaraz nie pracuje. Ale znoŭ ža, što pieraškadžaje jaje zapuścić? Zaparožskaja AES, zdajecca, razy ŭ try mahutniejšaja za biełaruskuju. Kali ŭjavić, što budzie padpisanaje mirnaje pahadnieńnie, to čamu b jaje tady nie vykarystoŭvać?» — kaža jon.
Prydumlajuć, kudy dzieć elektraenierhiju ad pieršaj AES, na jakuju niama spažyŭcoŭ
Z punktu hledžańnia enierhietyki Biełarusi jašče adna atamnaja stancyja nie patrebnaja.
«U krainie prachodzić kampanija pa pavieličeńni spažyvańnia elektraenierhii siarod nasielnictva na patreby aciapleńnia i haračaha vodazabieśpiačeńnia. Dla hetaha ŭviedzieny vielmi nizkija, subsidavanyja taryfy, — tłumačyć Jaŭhien Makarčuk.
— Heta robicca dla taho, kab intehravać pieršuju AES u enierhasistemu Biełarusi. Faktyčna dla jaje štučna stvarajuć popyt na elektraenierhiju. Takim čynam prydumlajuć, kudy dzieć elektraenierhiju, na jakuju niama spažyŭcoŭ. Kali ich niama ŭ pieršaj AES, to navošta druhaja?»
Padobna, što zapyt na pabudovu atamnaj stancyi sychodzić vyklučna ad Administracyi Łukašenki ci samoha palityka. Vyhladaje, što biełaruskija enierhietyki nie ŭ zachapleńni ad hetaj idei. Z boku Rasii pabudovu novaj AES padtrymlivaje «Rasatam» — kampanija, jakaja budavała ŭ Biełarusi pieršuju «atamku» ŭ Astraŭcy.
«Na hetym budaŭnictvie jany zarobiać hrošy, a potym na pastaŭkach paliva, — kaža Jaŭhien. — Dla ich nie važna, što budavać i dzie budavać. Supraćstaić hetaj idei Ministerstva enierhietyki, jakoje razumieje, jakija prablemy buduć u biełaruskaj enierhasistemie paśla budaŭnictva druhoj AES. Jany kažuć, što spačatku treba pahladzieć, chto budzie vykarystoŭvać hetu enierhiju. Voś Łukašenka i znajšoŭ ich — terytoryi, akupavanyja Rasijaj. Ale ž u Rasii niama niedachopu elektraenierhii. Tam užo jość atamnyja stancyi, ich dastatkova».
«Jeŭropa moža pieradavać elektraenierhiju pa ŭsiamu kantynientu»
Biełaruskaja enierhasistema maje techničnyja mahčymaści prytoku enierhii tolki z Rasii. Ukraina adłučyłasia ad jaje na pačatku poŭnamaštabnaha ŭvarvańnia, Litva heta zrabiła ŭ lutym 2025-ha.
Ci mahła b jašče adna AES vycieśnić rasijski haz i čamu pieršaja «atamka» jašče nie zrušyła situacyju z zaležnaściu ad rasijskich enierharesursaŭ?
«Pieršaja AES pryviała da skaračeńnia spažyvańnia pryrodnaha hazu z Rasii. Heta nielha admaŭlać. Ale skaracić spažyvańnie hazu jašče bolš za košt druhoj AES naŭrad ci atrymajecca. Kali jość elektrastancyi na hazie, jakija mohuć być zamieščany na atamnuju enierhiju, to budaŭnictva druhoj atamnaj stancyi dazvoliła b zamiaścić haz. Ale takich stancyj niama.
Atamnaja enierhija nie moža zamianić elektraenierhiju z CEC (ciepłaelektracentralej, jakija vyrablajuć elektryčnuju i ciepłavuju enierhiju adnačasova), bo tady spažyŭcy ciepłavoj enierhii zastanucca biez aciapleńnia. A hazavyja elektrastancyi zaraz i tak pracujuć na minimalnych mahutnaściach, u hetym prablema», — tłumačyć jon.
U ES kala čverci enierhii vypracoŭvajecca z dapamohaj AES, bolš za pałovu hetaj doli — u Francyi. Usiaho ŭ 13 z 27 krain-členaŭ Jeŭrasajuzu pracujuć 103 reaktary.
«U Francyi jość pobač šmat krain, jakim jana moža addavać enierhiju, naprykład, u Hiermaniju, dzie niama AES, tut šyroki rynak. Asabliva nočču, kali značna padaje spažyvańnie elektraenierhii, možna pradavać pa nizkim košcie. Uvohule Jeŭropa moža pieradavać elektraenierhiju pa ŭsim kantyniencie.
Polšča źbirajecca pabudavać čatyry błoki, ale ŭ ich enierhasistema značna bolšaja za biełaruskuju. To bok tut pytańnie ŭ tym, što jość niejki peŭny pamier mahutnaści AES, jaki možna ŭstalavać u enierhasistemu, kab pry hetym zamiaścić inšaje paliva i kab sistema zastałasia narmalna pracavać. Biełaruskaja AES užo pieravysiła hety pamier. Asablivaść atamnaj u tym, što jana nie źmianiaje mahutnaść. Kali ŭ nas spažyvańnie źnižajecca, elektrastancyja pavinna skaračać svaju vytvorčaść, a AES hetaha rabić nie moža.
Jość jašče, kaniešnie, taki momant, što jany havorać pra budaŭnictva atamnaj stancyi, ale nichto nie kaža pra zapusk novaha błoka raniej za 2035 hod (z ulikam, što jana 10 hadoŭ budujecca). Dapuścim, da hetaha času ŭzraście elektraspažyvańnie na stolki, što hety błok budzie dobra ŭpisany. Ale dać harantyju, što nastolki vyraście spažyvańnie elektraenierhii, nichto nie moža. Prablema intehracyi pieršaj AES źjaviłasia tamu, što prahnoz elektraspažyvańnia na 2020 hod byŭ 47 miljardaŭ kiłavat hadzin, a pa fakcie akazałasia 40», — padsumoŭvaje jon.
Ciapier čytajuć
Jak vyhladaje znutry rezidencyja Łukašenki «Krasnasielskaje»13
Kamientary
stratehičnyja nacyjanalnyja intaresy:
Stratehičnyja nacyjanalnyja intaresy Biełarusi na ciapierašnim histaryčnym etapie:
1) Acaleć jak nacyi i źbierahčy našu dziaržavu Biełaruś.
2) Nie dać zaciahnuć Biełaruś u čužuju vajnu.
3) DAMOVICCA PAMIŽ SABOJ/Spynić hramadzianskuju vajnu , Razmaŭlać Ŭ CHACIE RODNAJ MOVAJ
4) zmahacca ź impieryj 7/24
I Jeŭropa prybiažyć da dyktatara, kali ŭłada źmienicca i Ficy-Orbany stanuć mejnstrymam.
Tamu nia treba łuchtu naŭprostavuju pisać pa vidavočnym temam.