Paŭtara dziasiatka biełarusaŭ i rasijan zatrymali za machinacyi z darahoj maskoŭskaj nieruchomaściu
Ab raskryćci mižnarodnaj sietki šerych ryełtaraŭ paviedamiŭ SK.
Historyja pačałasia z taho, što 59‑hadovy ŭradženiec Minščyny z bahatym kryminalnym minułym, sudzimy za rabavańni, zhvałtavańnie i kradziažy, paśla čarhovaha terminu pierabraŭsia ŭ Rasiju. Tam jon vykarystaŭ svaje suviazi ŭ kryminalnym śviecie i sabraŭ bandu.
Pieršapačatkova saŭdzielniki zarablali na padrobkach: jany vyrablali ŭ Biełarusi padroblenyja piačatki, štampy i dakumienty, a zatym adpraŭlali ich kurjerami pakupnikam u Rasiju.
Z časam złačyncy pierajšli da bolš bujnych maštabaŭ. Padrobki stali vykarystoŭvać u Rasii, kab afarmlać spadčynu na kvatery pamierłych albo tych ludziej, jakija vielmi doŭha adsutničali.
Metaj była elitnaja maskoŭskaja nieruchomaść, a roli svajakoŭ vykonvali padstaŭnyja asoby.
Takim čynam banda paśpieła zachapić čatyry kvatery ŭ Maskvie ahulnaj vartaściu kala 3,2 miljona biełaruskich rubloŭ, adnak pradać ich i zarabić na hetym fihuranty nie paśpieli.
Na terytoryi Biełarusi byli zatrymanyja čatyry ŭdzielniki bandy. U dačynieńni da ich zaviali kryminalnyja spravy za stvareńnie złačynnaj arhanizacyi albo ŭdzieł u joj, što pahražaje terminam da 13 hadoŭ źniavoleńnia. Astatnich, uklučajučy samoha lidara bandy, uziali pad vartu ŭ Rasii. Usiaho siłaviki vykryli 16 udzielnikaŭ hetaj kryminalnaj sietki.
Kamientary