Pamior były ŭkrainski premjer, jaki padpisaŭ Biełaviežskija pahadnieńni
Pamior pieršy premjer-ministr niezaležnaj Ukrainy Vitold Fokin, paviedamlaje «Ukrainskaja praŭda». Jamu było 92 hady.
Pra śmierć Vitolda Fokina paviedamiła jahonaja ŭnučka ŭ sacsietkach.
Vitold Fokin u saviecki čas zrabiŭ svaju prafiesijnuju karjeru ŭ Dziaržpłanie USSR, a z 24 žniŭnia 1991 hoda pa 1 śniežnia 1992-ha kiravaŭ ukrainskim uradam, staŭšy takim čynam apošnim premjeram savieckaj Ukrainy i pieršym niezaležnaj.
Akurat na čas jahonaha premjerstva prypała padpisańnie Biełaviežskich pahadnieńniaŭ 8 śniežnia 1991 hoda, jakija faktyčna skončyli isnavańnie SSSR «jak hieapalityčnaj realnaści».
Tyja pahadnieńni aficyjna padpisali 6 čałaviek — prezidenty Rasii i Ukrainy Barys Jelcyn i Leanid Kraŭčuk, staršynia Viarchoŭnaha Savieta Biełarusi Stanisłaŭ Šuškievič, premjer-ministry Biełarusi i Ukrainy Viačasłaŭ Kiebič i Vitold Fokin i pieršy namieśnik staršyni rasijskaha ŭrada Hienadź Burbulis.
Da siońniašniaha dnia Vitold Fokin byŭ apošnim, chto z tych padpisantaŭ zastavaŭsia žyvy. Barys Jelcyn pamior u 2007 hodzie, Viačasłaŭ Kiebič — u 2020-m, a Leanid Kraŭčuk, Stanisłaŭ Šuškievič i Hienadź Burbulis — u 2022-m.
Paśla adstaŭki Fokina z pasady premjer-ministra jon pakinuŭ dziaržaŭnuju słužbu. Z 1993 hoda jon byŭ prezidentam Mižnarodnaha fondu humanitarnych i ekanamičnych suviaziaŭ Ukrainy z Rasijskaj Fiederacyjaj, a z 18 žniŭnia pa 30 vieraśnia 2020 hoda vykonvaŭ abaviazki namieśnika pradstaŭnika Ukrainy ŭ kantaktnaj hrupie pa mirnym urehulavańni situacyi na ŭschodzie Ukrainy.
Kamientary