Hubka dla myćcia posudu — raj dla bakteryj. Što ž rabić, kab nie plažyć svajo zdaroŭje?

Šmatlikija vidy bakteryj umiejuć vyžyvać u samych ekstremalnych umovach — u ziamnoj kary, u kipiačych hiejzierach, na viečnaj mierzłacie. Ale kali b u ich byŭ vybar, kuchonnaja hubka zaniała b pieršaje miesca ŭ śpisie žadanych miescaŭ dla žyćcia.

Jak piša VVS, u 2017 hodzie niamiecki mikrabijołah Markus Ehierc (Markus Egert) z Univiersiteta Furtvanhiena daśledavaŭ mikrabijom vykarystanych kuchonnych hubak i vyjaviŭ 362 vidy bakteryj. U niekatorych učastkach ščylnaść bakteryj dasiahała 54 miljardaŭ na kvadratny santymietr — prykładna stolki ž, kolki ŭ čałaviečym kale.

Adnak, jak adznačaje vučony, vialikaja kolkaść bakteryj jašče nie značyć, što hubka niebiaśpiečnaja dla zdaroŭja. Bakteryi jość usiudy: na skury, u hlebie, u pavietry. Nie ŭsie jany škodnyja — mnohija navat karysnyja. Hałoŭnaje pytańnie: ci varta chvalavacca mienavita praz tych, što žyvuć u hubcy?

U svaim daśledavańni Ehierc praanalizavaŭ DNK samych raspaŭsiudžanych vidaŭ. Piać ź dziesiaci byli blizkija da tych, što mohuć vyklikać infiekcyi ŭ ludziej z asłablenym imunitetam. Cikava, što ačystka hubak — naprykład, u mikrachvaloŭcy ci haračaj mylnaj vadzie — nie vielmi dapamahała: častka bakteryj hinuła, ale inšyja, bolš ustojlivyja, vyžyvali i chutka razmnažalisia.

«My miarkujem, što rehularnaja «ačystka» viadzie da naturalnaha adboru bolš ustojlivych štamaŭ, — kaža Ehierc. — U vyniku jany pačynajuć raści jašče chutčej».

Ale važna razumieć: ni adna z znojdzienych bakteryj nie źviazanaja z surjoznymi charčovymi atručvańniami. Kala 90% vypadkaŭ špitalizacyi praz charčovyja infiekcyi vyklikajucca ŭsiaho piaćciu patahienami — siarod ich kišečnaja pałačka i salmanieła. Na ščaście, hetyja vidy redka sustrakajucca ŭ hubkach.

«My znajšli tolki patencyjna patahiennyja bakteryi, niebiaśpiečnyja hałoŭnym čynam dla ludziej z asłablenym imunitetam, dziaciej i pažyłych, — tłumačyć Ehierc. — Dla zdarovaha čałavieka hubka zvyčajna nie niasie pahrozy».

Prafiesarka Dženifier Kuinłan (Jennifer Quinlan) z kalehami ŭ 2017 hodzie sabrała hubki z 100 damoŭ u Fiładelfii. Tolki ŭ 1—2% uzoraŭ byli znojdzieny bakteryi, što vyklikajuć charčovaje atručvańnie, i to — u niaznačnaj kolkaści.

Hetyja vysnovy paćvierdziła i daśledavańnie Solviejh Łanhsrud (Solveig Langsrud) z Narviežskaha instytuta charčovych daśledavańniaŭ Nofima, praviedzienaje ŭ 2022 hodzie. Łanhsrud s kalehami paraŭnoŭvała bakteryjalny skład hubak i ščotak. U abodvuch vypadkach znachodzilisia padobnyja, nie patahiennyja vidy, ale ŭ ščotkach bakteryj było značna mienš.

Pa słovach śpiecyjalistaŭ, bolšaść bakteryj u hubcy nie vyklikajuć zachvorvańniaŭ, ale ź ciaham času jany mohuć pryvieści da taho, što hubka pačynaje drenna pachnuć. A voś kali hubkaj pracirać vadkaść ad syroha miasa ci kurycy — źjaŭlajecca ryzyka, što patahiennyja bakteryi ŭsio ž trapiać u jaje.

Daśledavańnie Łanhsrud pakazała: kali ŭ hubku traplaje salmanieła, jana tam aktyŭna razmnažajecca. U ščotcy ž — chutka hinie. Mahčyma, heta źviazana z tym, što ščotki chutčej sochnuć pamiž vykarystańniami, a hubki časta zastajucca vilhotnymi ŭnutry.

Takija niebiaśpiečnyja bakteryi mohuć lohka pierachodzić z hubki na posud abo kuchonnyja pavierchni.

Dyk što rabić?

Ekśpierty rajać mianiać hubku chacia b raz na tydzień, ale jość sposaby praciahnuć jaje «žyćcio». Hubku možna pakłaści ŭ posudamyjnuju mašynu i pamyć razam z posudam ci źmiaścić u mikrachvaloŭku na chvilinu, pakul nie pojdzie para. Abodva sposaby zabjuć bolšaść patahienaŭ.

Choć, jak pakazała daśledavańnie Ehierta, takaja ačystka z časam spryjaje vyžyvańniu najbolš ustojlivych vidaŭ. Kipień ci dezynfikujučy srodak — taksama efiektyŭnyja mietady, ale i jany nie harantujuć 100% abarony, asabliva ad tych bakteryj, što ŭtvarajuć achoŭnyja lipkija bijaplonki. Ale hety mietad pakazaŭ svaju efiektyŭnaść u baraćbie z takimi patahienami, jak salmanieła.

Inšyja karysnyja parady:

• nie zachoŭvajcie hubku ŭ myjcy — davajcie joj prasychać,

• dobra adciskajcie vilhać i vydalajcie reštki ježy.

Ale, mahčyma, najlepšaje rašeńnie — prosta pierajści na ščotku.

«Ja b naohuł nie vykarystoŭvaŭ hubki na kuchni», — kaža Ehierc. — «Ščotka značna lepšaja: u joj mienš bakteryj, jana chutčej sochnie i jaje lahčej čyścić».

• 16
• 0
• 0
• 3
• 1
• 0
• 0
• 0