Ekśpiertka padzialiłasia łajfchakam, jak atrymać šenhien chutčej i na bolš praciahły termin

Pa słovach Anastasii Łysakoŭskaj, u hetym vypadku havorka idzie pra haściavuju vizu. Kab na jaje padacca, treba zaprašeńnie ad čałavieka, jaki žyvie ŭ krainie i šenhien ad jakoj vy b chacieli atrymać.

«Sapraŭdy, haściavuju vizu z zaprašeńniem ad hramadzianina z DNŽ, PMŽ abo hramadzianstvam u Šenhienskaj zonie mohuć vydać na bolš praciahły termin. Časta na adzin-dva hady. Choć jość vypadki, što i na daŭžej. Usio zaležyć ad krainy i kankretnych abstavin, — kaža ekśpiertka. — Lepš za ŭsio heta pracuje, kali ŭ hości vas kličuć blizkija svajaki — baćki, dzieci, muž i žonka».

Znajomyja abo dziadźki-ciotki taksama mohuć, ale «heta ŭžo mienš vidavočnyja katehoryi».

«Farmalna takija suviazi nie zaŭsiody pryznajucca dastatkovymi dla «siamiejnaj vizy», — adznačaje Anastasija.

Pa nazirańniach ekśpiertki, Italija pakazvaje «najbolšuju hnutkaść i čałaviečnaść u vizavaj palitycy ŭ adnosinach da biełarusaŭ». Zaprašeńnie moža zrabić čałaviek z PMŽ, hramadzianstvam ci DNŽ, navat kali jon atrymaŭ jaho niadaŭna. Napisać dakumient prosiać ad ruki. Zrabić heta treba pavodle ŭzoru, raźmieščanaha na sajcie konsulstva.

«Kali vas kličuć blizkija svajaki, to zapisacca na padaču na italjanski šenhien možna praz elektronny list u konsulstva. U im paznačajecie danyja taho, chto vas zaprašaje, i svaje, da jaho prykładajecie fota zaprašeńnia (kopiju, a aryhinał lepš dać pry padačy) i prosicie pryznačyć datu. Adkaz zvyčajna prychodzić praz 1-2 tydni. Kali jaho niama, raju pradublavać list», — tłumačyć miechanizm Anastasija. — U vypadku, kali ŭ hości vas kličuć «inšyja asoby» — siabry, dalokija svajaki, znajomyja — zapis prachodzić hetak ža sama, jak i va ŭsich astatnich, heta značyć praz sajt vizavaha centra Italii abo žyvuju čarhu.

Praŭda, varta adznačyć, što rehistracyja praz sajt na hety momant zakrytaja, a žyvaja čarha pieravaliła adznaku ŭ 37 tysiač čałaviek. Prytym što pakul u apracoŭcy dakumienty tych, chto ŭ śpisie z numaram da 20 tysiač. Dumaju, kali ŭ vas niama zaprašeńnia, ciapier samy najlepšy sposab zapisacca tut na padaču — heta kupić tur u Italiju praz ahienctva: u ich jość kvoty dla tych, kaho jany viazuć u padarožža».

Anastasija adznačaje, što mahčymaść pasprabavać atrymać vizu pa zaprašeńni jość i ŭ inšych krainach.

«Naprykład, Francyja. Zapis na haściavy šenhien robicca praź list u konsulstva niezaležna ad taho, chto zaprašaje — siabry ci blizkija. Terminy vydačy roznyja, sustrakajucca admovy. Hiermanija afarmlaje takija vizy ŭ ahulnym paradku. Dla hetaha čałaviek zapaŭniaje zajaŭku na sajcie konsulstva i čakaje ŭ ahulnaj čarzie, — pieraličvaje surazmoŭca. —

U Polščy zapis na vizu dla naviedvańnia rodnych ci siabroŭ idzie praz sajt vizavaha centra. Statystyka vydačy dobraja, u vypadku blizkaha svajactva možna atrymać šenhien na termin da 5 hadoŭ. Pry hetym jość adno ale. Paklikać vas da siabie moža tolki čałaviek z PMŽ abo hramadzianstvam».

Na dumku surazmoŭcy, jość u śpisie krain z afarmleńniem haściavoj vizy i tyja, kudy jana b iści nie rekamiendavała. Na biahučy momant heta Ispanija.

«Ciapier tut nazirajecca šmat admovaŭ, — kaža ekśpiertka. — Pryčyna, jak mnie zdajecca, u tym, što konsulstva rasceńvaje takija vizy jak sprobu zastacca ŭ krainie, a mienavita — niametavaje vykarystańnie».

• 1
• 1
• 1
• 3
• 1
• 2
• 0
• 0