Minski ipešnik, jaki pisaŭ ananimki na kankurentaŭ, akazaŭsia dyrektaram turfirmy, jakaja nie daviezła turystaŭ u Ryhu
Dniami Hienprakuratura nakiravała ŭ sud kryminalnuju spravu ŭ dačynieńni da 41-hadovaha žychara Minska, jakoha abvinavačvajuć u «zaviedama iłžyvych danosach na kankurentaŭ pa biznesie i ŭłasnych klijentaŭ». Jak stała viadoma «Anłajnieru», havorka idzie pra mužčynu, jaki ŭ razmovie z žurnalistam pradstaviŭsia kiraŭnikom turapieratara Bytravel.by — toj samaj kampanii, jakaja niadaŭna arhanizavała niaŭdały tur u Ryhu. Žurnalisty daviedalisia padrabiaznaści, a taksama ŭdakładnili ŭ Respublikanskaj asacyjacyi turystyčnych ahienctvaŭ, ci moža turapieratar mianiać maršrut padčas ekskursijnaha tura.
Pra hetuju pajezdku stała viadoma na minułym tydni. Bolš za 30 pasažyraŭ pavinny byli adpravicca ŭ aŭtobusny tur na vychadnyja 26-28 krasavika. Turysty praviali ŭ aŭtobusie 36 hadzin, ale ŭ Jeŭropu tak i nie trapili. Zamiest prapusknoha punkta «Hryharoŭščyna — Paternijeki» na biełaruska-łatvijskaj miažy aŭtobus byŭ nakiravany na prapuskny punkt «Burački — Cierachava» (rasijska-łatvijskaja miaža). Doŭhaje čakańnie i pilnaja pravierka skončylisia anulavańniem viz u kiroŭcaŭ. Hrupa była vymušanaja raźviarnucca i pajechać dadomu.
«Zamiest prabačeńniaŭ my atrymali tolki pahrozy i abvinavačvańni»
U turystaŭ zastałosia mnostva pretenzij da arhanizacyi tura: ad niezapraŭlenaha aŭtobusa, jaki spyniŭsia za 70 km ad Minska i prastajaŭ 3 hadziny, da raptoŭnaj źmieny maršrutu (pasažyry zapeŭnivajuć, što ich pra heta da pačatku tura nie papiaredžvali).
Taksama ŭdzielnikam hrupy nie spadabałasia ahresiŭnaja maniera kamunikacyi kiraŭnika turfirmy — na heta źviartali ŭvahu ŭsie turysty, ź jakimi «Anłajnieru» ŭdałosia pahutaryć (nie mienš za piać čałaviek).
Surazmoŭcy raskazali, što prabačeńniaŭ ad turapieratara nie było. Turysty stali pisać pretenzii z patrabavańniem viarnuć košt tura, a taksama kampiensavać maralnuju škodu.
Da pajezdki turysty płacili tolki pa 100 rubloŭ z čałavieka za turystyčnuju pasłuhu. Jak vyśvietliłasia, bolšaści pasažyraŭ hetuju sumu ŭžo viarnuli. Niekalki čałaviek pa-raniejšamu znachodziacca ŭ čakańni — naprykład, pasažyrka, jakaja padarožničała ŭ Ryhu razam z ankałahična chvorym mužam.
«Pieramovy praciahvajucca z 30 krasavika. Kali telefanavała, praz telefon jon [dyrektar kampanii] mnie skazaŭ, što rychtuje sustrečny pazoŭ, — ździŭlajecca jana. — Ja padała zajavu ŭ transpartnuju inśpiekcyju, taksama nakiravała ŭ turfirmu pretenziju z patrabavańniem pakryć maralnuju škodu. Čakaju adkaz, a dalej budu kansultavacca z advakatam, jak pravilna rabić».
«U mianie zapytalisia numar rachunku, kab viarnuć 100 rubloŭ. A pa pretenzii ab kampiensacyi maralnaj škody skazali, što budzie piśmovy adkaz, — raskazvaje Alena, jana taksama čakaje viartańnia hrošaj. —Jašče z nami pahutaryŭ pieravozčyk [nie turfirma, a kampanija «Ryč baj», jakaja dała aŭtobus. — Zaŭv. «Anłajniera»]. Kiraŭnik prynios svaje prabačeńni za toje, što skončyłasia paliva, i prapanavaŭ usim adnadzionny tur pa Biełarusi. Heta prykład taho, jak narmalnyja kampanii staviacca da svaich pamyłak. Kali b kiraŭnik turfirmy adrazu adreahavaŭ hetak ža sama, patłumačyŭ, što adbyŭsia fors-mažor, u nas naŭrad ci ŭźnikli b pretenzii. A ŭ našym vypadku zamiest prabačeńniaŭ pieršyja dni byli tolki pahrozy i abvinavačvańni».
«Mnie jon skazaŭ, što budzie na nas padavać u Jeŭrapiejskuju kamisiju za niametavaje vykarystańnie viz. Choć našy vizy jon nie bačyŭ, usio afarmlałasia anłajn. I ź vizami ŭ nas poŭny paradak, jany turystyčnyja», — raskazvaje pasažyrka Taćciana.
Hrošy za turpasłuhu joj viarnuli daŭno, ale žančyna nie maje namieru stavić kropku ŭ hetaj historyi.
U razmovie z žurnalistam «Anłajniera» pradstaŭnik turapieratara Bytravel.by abvinavaciŭ u zryvie tura pasažyraŭ, jakija, ź jahonych słoŭ, «pravakavali pamiežnikaŭ łatvijskaha boku» i «palityzavali situacyju». Mužčyna spačatku padrabiazna prakamientavaŭ situacyju, ale paźniej ad svaich słoŭ admoviŭsia. Taksama ŭ razmovie jon abviaściŭ pra namier źviarnucca ŭ Ministerstva infarmacyi i KDB.
«Vyrašyŭ stvaryć štučnyja pieraškody kankurentam»
Jak stała viadoma «Anłajnieru», u najbližejšy čas kiraŭnika Bytravel.by (PUP «KSAŁ-praf») čakaje sud pa kryminalnaj spravie ab rableńni zahadzia chłuślivych danosaŭ. Hetuju infarmacyju paćvierdziŭ dyrektar kampanii «Kaktus-tur», jaki prachodzić pa spravie ŭ jakaści paciarpiełaha.
U turfirmie admovilisia ad padrabiaznych kamientaroŭ da suda (pasiadžeńnie pryznačanaje na 16 traŭnia), ale adznačyli, što historyja doŭžyłasia ciaham dvuch hadoŭ. Infarmacyju pra budučy sud žurnalistam paćvierdzili taksama jašče ŭ adnoj turystyčnaj kampanii, jakaja pracuje na rynku aŭtobusnych pieravozak.
Pavodle infarmacyi, apublikavanaj na sajcie Hienprakuratury, abvinavačany zajmajecca kamiercyjnaj dziejnaściu ŭ śfiery mižnarodnych aŭtobusnych pasažyrskich pieravozak u krainy Jeŭrasajuza.
«Imknučysia minimizavać kolkaść kankurentaŭ i pryciahnuć bolšuju kolkaść hramadzian u jakaści ŭłasnych klijentaŭ, jon vyrašyŭ stvaryć štučnyja pieraškody inšym pieravozčykam u pierasiačeńni mytnaj miažy Biełarusi, čym pryčyniŭ kankurentam i ich pasažyram maralnyja pieražyvańni, materyjalnyja i reputacyjnyja straty, — adznačajecca na sajcie viedamstva. — U pryvatnaści, u pieryjad z sakavika 2023 hoda pa luty 2024 hoda abvinavačany vyrabiŭ i nakiravaŭ poštaj u pravaachoŭnyja orhany i inšyja dziaržaŭnyja ŭstanovy Biełarusi ananimnyja zajavy, u jakich utrymlivalisia zahadzia chłuślivyja źviestki ab ździajśnieńni pieravozčykami — kankurentami-kiraŭnikami, zasnavalnikami, ułaśnikami i najomnymi rabotnikami, a taksama ich klijentami roznych złačynstvaŭ, u tym liku adniesienych da ciažkich i asabliva ciažkich. U liku inšaha abvinavačany zahadzia chłuśliva paviedamlaŭ pra pieravozku praź miažu narkatyčnych srodkaŭ, psichatropnych rečyvaŭ, ahniastrelnaj zbroi, ździajśnieńni złačynstvaŭ karupcyjnaj i ekstremisckaj nakiravanaści».
Paviedamlajecca, što niekalki chłuślivych ananimnych zajaŭ mužčyna padaŭ i ŭ dačynieńni da ŭłasnych klijentaŭ z pomsty za kanflikty, jakija adbylisia ź imi. Usiaho pradprymalniku inkryminavana 18 epizodaŭ złačynnaj dziejnaści.
Dziejańni abvinavačanaha kvalifikavanyja pa č. 1 i č. 2 art. 400 Kryminalnaha kodeksa Respubliki Biełaruś. Ciapier da mužčyny ŭžytaja miera strymańnia ŭ vyhladzie padpiski ab niavyjeździe i naležnych pavodzinach.
A ci možna mianiać maršrut padčas ekskursijnaha tura?
Adnoj z hałoŭnych pryčyn kanfliktu pasažyraŭ i kiraŭnika turfirmy stała źmiena maršrutu, a mienavita punkta propusku na miažy. «Anłajnier» vyrašyŭ jašče raz prajaśnić hety momant u Respublikanskaj asacyjacyi turystyčnych ahienctvaŭ (RATA).
«Dla pačatku treba zrazumieć, jaki maršrut byŭ uzhodnieny bakami ŭ prahramie tura. Infarmacyja na sajcie — heta rekłamnyja materyjały. Na momant ža zaklučeńnia damovy baki mohuć dasiahnuć inšych damoŭlenaściaŭ i adlustravać u damovie inšy maršrut.
Časta maršrut tura, zamacavany ŭ damovie, vyhladaje prykładna nastupnym čynam: Minsk — Ryha — Jurmała — Minsk. Mohuć być paznačanyja turystyčnyja abjekty, jakija naviedvajucca. Pry takich umovach damovaj nie zafiksavanyja kankretnyja punkty propusku i nie byŭ praduhledžany bolš detalovy šlach ruchu, tamu kazać pra źmienu maršrutu nie davodzicca.
Kali ž u damovie byŭ prapisany bolš detalovy maršrut, to č. 2 art. 35 Pravił akazańnia turystyčnych pasłuh praduhledžvaje mahčymaść źmieny maršrutu pry peŭnych umovach, a mienavita: kali źmieny vyklikanyja nadzvyčajnymi situacyjami i inšymi abstavinami niepieraadolnaj siły albo patrabavańniami biaśpieki.
Najaŭnaść čarhi na miažy naŭrad ci padpadaje pad luboje z nazvanych abstavin, pa jakich možna źmianić maršrut biez uzhadnieńnia z zakazčykami.
Kali kamuści z turystaŭ, ekskursantaŭ pryncypova važnaje prachodžańnie miažy ŭ peŭnym punkcie propusku, to takim zakazčykam varta źviartać na heta ŭvahu da padpisańnia damovy. Zakazčyk na etapie zaklučeńnia damovy moža prasić vykanaŭcu (abo turahienta, praź jakoha nabyvajecca tur) ab uklučeńni ŭ prahramu tura bolš detalovaha maršrutu turystyčnaha padarožža».
Ipešnik u Minsku pisaŭ ananimki na kankurentaŭ, u tym liku i palityčnyja. Zafiksavana 18 epizodaŭ
Turysty kupili tur u Ryhu, praviali 36 hadzin u aŭtobusie, ale navat nie trapili ŭ Jeŭrasajuz
Rasijskija simki šmat kaho ź biełarusaŭ zabłakujuć, a aŭtobusy ŭ Picier zastanucca biez Wi-Fi
Kiraŭnika viciebskaj turystyčnaj firmy sudziać za avatarki ŭ fejsbuku «Ja TUT» i «My 97%»
Kamientary