Anarchistu ŭ Rasii dali 16 hadoŭ za padpał vajenkamata. Jon źbieh u Biškiek, jaho złavili i departavali

Pavodle rašeńnia suda, pieršyja piać hadoŭ jon pavinien adbyć u turmie, astatni termin — u kałonii strohaha režymu, piša Bi-bi-si.

Padpalvańnie adbyłosia 11 sakavika 2022 hoda, kali Ražkoŭ, pracavaŭšy kansultantam u kramie, kinuŭ niekalki kaktejlaŭ Mołatava ŭ budynak vajenkamata ŭ Biarozaŭskim. Pažar byŭ chutka patušany achoŭnicaj i supracoŭnikami DPS, jakija prajazdžali mima. Nichto nie paciarpieŭ.

Pieršapačatkova Ražkova abvinavacili ŭ zamachu na zabojstva, ale paśla pierakvalifikacyi spravy jon byŭ adpuščany pad padpisku ab niavyjeździe. Uvosień 2022 hoda jon pakinuŭ Rasiju i pierajechaŭ u Kyrhyzstan. U traŭni 2023 hoda Ražkova zatrymali ŭ Biškieku i ekstradavali ŭ Rasiju, dzie jon byŭ znoŭ źniavoleny.

Padčas znachodžańnia ŭ SIZA Ražkovu pradjavili novyja abvinavačańni: apraŭdańnie teraryzmu za intervju, dadzienaje prahramie «Chadarkoŭski LIVE», i raspaŭsiud «vajennych fejkaŭ» ab dziejańniach rasijskaj armii va Ukrainie.Psichałahičnaja ekśpiertyza, praviedzienaja ekśpiertam FSB, stała padstavaj dla hetych abvinavačańniaŭ

Na sudzie Ražkoŭ śćviardžaŭ, što jaho dziejańni byli asabistym pratestam suprać vajny ŭ Ukrainie i nie mieli metaj nanieści škodu ludziam. Jon padkreślivaŭ, što nie byŭ zavierbavany i nie mieŭ karyślivych metaŭ. Adnak sud pryznaŭ jaho dziejańni teraktam, abapirajučysia na palityčnuju matyvacyju i vykarystańnie vybuchovych rečyvaŭ. 

Heta sprava stała adnoj ź pieršych u Rasii, kali padpalvańnie vajenkamata było kvalifikavana jak terakt. Rašeńnie suda vyklikała šyroki rezanans i abmierkavańnie ŭ hramadstvie. Choć škoda była minimalnaja — 1256 rasijskich rubloŭ (zaraz kala 14 dalaraŭ)

U Biškieku Ražkoŭ zmoh nieaficyjna ŭładkavacca na pracu ŭ miascovuju rekłamnuju kampaniju i zdymaŭ pakoj u internacie. Uładkoŭvacca na aficyjnuju pracu jon nie chacieŭ, bo dumaŭ, što tak siłavikam budzie praściej jaho znajści, i ŭvohule razumieŭ, što ŭ Kyrhyzstanie jamu moža być niebiaśpiečna z-za ciesnych suviaziaŭ hetaj krainy z Rasijaj.

30 maja 2023 hoda Ražkoŭ pajšoŭ padaŭžać svaju časovuju rehistracyju, a na nastupny dzień da jaho ŭ pakoj uvarvalisia miascovyja siłaviki i advieźli jaho ŭ Dziaržaŭny kamitet nacyjanalnaj biaśpieki Kyrhyzstana.

Tam, jak jon paźniej raspavioŭ svajmu advakatu, jamu pahražali katavańniami, a zatym advieźli ŭ aeraport i adpravili ŭ Rasiju, dzie pieradali FSB.

Pra toje, što jon iznoŭ znachodzicca pad aryštam u rasijskim SIZA, stała viadoma tolki 7 červienia, kali jaho naviedaŭ advakat. Roažkaŭ raspavioŭ jamu, što rasijskija siłaviki paśla jaho viartańnia na radzimu prymianiali da jaho katavańni tokam, a taksama nadziavali miašok na hałavu. Paśla taho, jak Ražkoŭ byŭ schopleny ŭ Biškieku, jaho spravu nakiravali na daśledavańnie, i nieŭzabavie abvinavačańnie pierakvalifikavali na artykuł ab terarystyčnym akcie. Akramia taho, jamu dadadzieli artykuły ab apraŭdańni teraryzmu i «vajennych fejkach».

Znachodziačysia ŭ Biškieku, Ražkoŭ paśpieŭ dać niekalki intervju ŚMI, u adnym ź jakich śledčyja ŭhledzieli apraŭdańnie teraryzmu i raspaŭsiud «fejkaŭ» pra rasijskuju armiju.

Psichołaha-linhvistyčnuju ekśpiertyzu, jakaja lehła ŭ asnovu abvinavačańnia Ražkova pa artykule ab apraŭdańni teraryzmu, pravodziła ekśpiert FSB Śviatłana Mačałava. Raniej jana nieadnarazova rabiła ekśpiertyzy pa «ekstremisckich» spravach, u tym liku paćvierdziła apraŭdańnie teraryzmu ŭ pjesie «Finist jasny sokał» pa spravie suprać režysiorki Jaŭhienii Biarkovič i dramaturhini Śviatłany Piatryjčuk, pa jakoj jany atrymali amal pa šeść hadoŭ pazbaŭleńnia voli.

«Mnie pahražali zabojstvam i seksualnym hvałtam z metaj, kab ja pryznaŭsia ŭ supracoŭnictvie z ukrainskimi śpiecsłužbami», — cytavaŭ Ražkova ŭ sudzie pravaabarončy prajekt «Zona salidarnaści»

U svaim apošnim słovie Ražkoŭ nastojvaŭ na tym, što padpał byŭ jaho asabistaj inicyjatyvaj. «Ja nie supracoŭničaŭ ni z USU, ni z SBU, ni z FSB, ni z kim-niebudź jašče. Skažu bolš, ja b admoviŭsia što-niebudź padpalvać pryncypova, kali b mnie niechta prapanavaŭ za heta hrošy. Absalutna asabistaja inicyjatyva, — kazaŭ jon u sudzie. — Samy vierny sajuźnik ułady — umieńnie advodzić vočy pry vidzie čužoha hora.

Moža z-za vychavańnia, moža školnyja nastaŭniki pastaralisia, ale tak užo atrymałasia, što mnie nieabyjakava da bližniaha svajho i jaho pakut».

• 0
• 0
• 0
• 0
• 0
• 0
• 0
• 0