Što za 17-hadovy startapier, jaki vyliŭ cebar chłuśni na Libiera na radaść biełaruskim śpiecsłužbam
Baranavicki padletak ź siamji, źviazanaj ź siłavikami, vydaŭ siabie za prahramista «Novaj Biełarusi» i razam z błohieram Siarhiejem Piatruchinym vystaviŭ abvinavačvańnie Paŭłu Libieru, prykryŭšysia sfabrykavanymi skrynšotami. Raskazvajem detali fiejeryčnaj historyi.
Błohier Siarhiej Piatruchin vystupiŭ z hučnym vykryćciom, atakavaŭšy ajcišnika Paŭła Libiera ŭ svaim novym vypusku. Na paru ź Piatruchinym u kadry źjaviŭsia ŭradženiec Baranavič Alaksiej Burbicki, jakomu jašče miesiac da 18-hodździa.
Siarhiej Piatruchin dziakuje chłopcu, jaki «adkryta pahadziŭsia raspavieści ab prablemie, nie chavajučy tvaru».
«Z 2024 hoda ja pracavaŭ u prahramie Paŭła Libiera «Novaja Biełaruś», — pačynaje padletak, jaki ŭ nazvanym hodzie tolki vypuściŭsia sa škoły. Svaje ŭjaŭnyja abaviazki jon apisvaje abstraktnaj frazaj: «Administravańnie asobnych błokaŭ i raspracoŭka nievialikich prahramnych modulaŭ».
Burbicki dadaje, što «vałancioryŭ za nievialikija hrošy» da momantu, pakul jaho nie vyhnali, tamu što jon daviedaŭsia niazručnuju praŭdu.
Kali skaracić historyju, to 6 studzienia 2025 hoda na elektronnuju poštu «Novaj Biełarusi», da jakoj nibyta byŭ dostup i ŭ Burbickaha, pryjšoŭ list z patrabavańniem vypłaty adnaho bitkojna za viartańnie dostupu da prahramy: maŭlaŭ, usie piersanalnyja danyja byli vykradzienyja chakierami, ludzi ŭ Biełarusi akazalisia ŭ niebiaśpiecy.
Burbicki patrabavaŭ hałosnaści, ale Pavieł Libier nibyta pad pahrozaj departacyi z Polščy zabaraniŭ jamu (i nienazvanym inšym) vynosić situacyju ŭ publičnuju śfieru, a potym, kab schavać ślady, pierajmienavaŭ prahramu z «Novaj Biełarusi» ŭ «Svae».
Burbicki namiakaje, što Libier hrošy chakieram usio ž taki zapłaciŭ. «Paraiŭšysia sa svaimi kuratarami», — tłumačyć łohiku dziejańniaŭ Libiera chłopiec.
Uvieś tekst, napisany pratakolnaj movaj, jon začytaŭ z ekrana, svaimi słovami chłopiec nie skazaŭ ničoha. «Narodny reparcior» Siarhiej Piatruchin nie zadaŭ jamu nivodnaha ŭdakładniajučaha pytańnia, navat u vidavočna tonkich miescach.
Svaju historyju Burbicki padmacavaŭ sfabrykavanymi skrynšotami pierapiski ź Libieram i jahonym bratam.
Možna było b skončyć hetuju historyju kamientaryjem samoha Paŭła Libiera, jaki tłumačyć, što Burbicki nikoli nie pracavaŭ, nie vałancioryŭ i nie byŭ pobač z «Novaj Biełaruśsiu», a pryviedzienaja infarmacyja ab uzłomie lohka praviarajecca — u «Novaj Biełarusi» prosta niama čaho ŭzłamvać, sama łohika płatformy ŭ tym, kab biełaruski biznes za miažoj pakidaŭ źviestki pra svaje pasłuhi, a emihranty viedali, dzie kuplać u svaich.
Čytajcie: 17-hadovy startapier zajaviŭ, što bazu karystalnikaŭ «Novaj Biełarusi» ŭzłamali. Libier adkazvaje: abvinavačvańnie absurdnaje
Ale jość inšyja zajmalnyja padrabiaznaści pra maładoha startapiera.
Niaprostaja siamja
Chto taki hety Alaksiej Burbicki? Čym jon zajmajecca ŭ Polščy? Dla čaho vyrašyŭ abyłhać Libiera? Niekatoryja adkazy mohuć dać padrabiaznaści jahonych pryhodaŭ u Varšavie, a taksama infarmacyja «Biełpoła», «Bajpoła» i analiz sacyjalnych sietak jahonych svajakoŭ.
Chłopiec naradziŭsia ŭ Baranavičach u červieni 2007 hoda ŭ siamji pradprymalnika Siarhieja Burbickaha i padatkovaha inśpiektara Śviatłany Burbickaj (Čarniaŭskaj).
Čym ciapier zajmajecca Śviatłana, niezrazumieła, a Siarhiej zarablaje vyrabam rastavych kvietak u Baranavičach.
U ich taksama jość starejšy syn Pavieł, jaki žyvie ŭ Varšavie. Pavieł Burbicki akazvaje pasłuhi pa pieravozcy pasyłak z Polščy ŭ Biełaruś i Rasiju, a taksama — pa pieravozcy žyviołaŭ jak polski indyvidualny pradprymalnik z handlovaj markaj PetsTrans. Hetaj dziejnaściu Pavieł zaniaŭsia viasnoj 2022-ha. Pavieł naviedvaje kanfierencyi pieravozčykaŭ u Rasii.
Ahułam siamja Burbickich vialikaja, i bolšaść mužčyn starejšaha pakaleńnia vybrali słužbu ŭ vojsku.
Adzin ź dziadźkaŭ pa baćku — Alaksandr Burbicki — padpałkoŭnik milicyi zapasa, słužyŭ u Lachavičach. Na piensiju vyjšaŭ u 2016-m.
Inšy dziadźka, Ryhor Burbicki, žyvie ŭ Rasii i zajmajecca patryjatyčnym vychavańniem kursantaŭ rasijskich vajskovych vučelniaŭ.
Ciotka Hanna Burbickaja paet.
«Russkaja baba silna i mohuča,
Vmih uletajet navoznaja kuča.
Kaši navarit, barak ubieriet,
a jeśli buchniet, to i ryło nab́jet», — takimi radkami jana supravadziła svajo fota ŭ Adnakłaśnikach za 2022 hod.
Apošni dopis, jaki łajknuła ŭ «Adnakłaśnikach» mama junaha prahramista, 8 maja 2025-ha, heta paradny łuk padpałkoŭnika Ihara Viatkina, da niadaŭniaha času — vajskoŭca hałoŭnaj vajennaj inśpiekcyi Ministerstva abarony Biełarusi i baranavickaha vajskovaha kamisara, a ciapier, imavierna, «kadravika» 558-ha avijaramontnaha zavoda.
Ihar Viatkin, miarkujučy pa jahonaj aktyŭnaści, źjaŭlajecca daŭnim i blizki siabram siamji Burbickich: jon adznačyŭ padabajkami mnohija siamiejnyja fota. Słužbu Viatkin pačynaŭ jak supracoŭnik palitadździeła VČ 52735.
U 2020—2022 hadach nichto z Burbickich nie zatrymlivaŭsia i nie mieŭ administracyjnych pratakołaŭ.
Jak ža samy małodšy ź ich pryjšoŭ da «antydziaržaŭnaj» dziejnaści ŭ «Novaj Biełarusi»? Bo pa ciapierašnim biełaruskim represiŭnym zakanadaŭstvie praca Alaksieja Burbickaha na «ekstremisckaje farmavańnie» moža skončycca kryminalnaj spravaj na jaho.
Ciapier, razumiejučy kantekst, možna zasiarodzicca i na sapraŭdnaj aktyŭnaści maładoha «vykryvalnika Libiera».
Sproba deananimizavać markietołahaŭ «Novaj Biełarusi»
Kali i jak niepaŭnaletni Alaksiej Burbicki apynuŭsia ŭ Varšavie — niezrazumieła. U 2015 hodzie — zusim małym, — jon pačaŭ vieści staronku ŭ instahramie, jakuju potym zakinuŭ i zavioŭ novuju, jakaja ciapier uvohule pustaja.
Ale viasnoj 2025-ha źjaviŭsia IT-pradprymalnik, startapier z pretenzijaj na jeŭrapiejski rynak, «stvaralnik budučyni» Aleksy Burbicki.
U čym była zaduma startapa? U stvareńni markietpłejsa, barachołki dla ruskamoŭnych u Jeŭropie, EuroMarket.
Ci byŭ, ułasna kažučy, sam startap? Nie, nijakaha techničnaha rašeńnia nie było, byli tolki karcinki z apisańniem idei.
Z hetymi karcinkami Burbicki pajšoŭ u Biełaruski moładzievy chab u Varšavie, raskazaŭ pra vialikuju kamandu raspracoŭščykaŭ pa ŭsioj Jeŭropie, z adnoj metaj — kab tam jamu dapamahli paznajomicca z prahramistami i markietołahami «Novaj Biełarusi».
Pradukty ž padobnyja, maŭlaŭ, spatrebicca parada i ekśpiertyza.
«Pieradusim jamu patrebny byli markietołahi, jakija prasoŭvali dadatki «Novaja Biełaruś» i Svae», — kaža adzin sa śviedkaŭ kamunikacyi z Burbickim.
Burbicki paprasiŭ placoŭku dla prezientacyi startapa, zaprasiŭ tudy supracoŭnikaŭ «ekstremisckaha farmiravańnia», kab pravieści prezientacyju svajho nieisnujučaha pradukta.
Jana prajšła 18 krasavika 2025 hoda ŭ Varšavie.
«Nichto ź cikavych jamu ludziej nie pryjšoŭ, ale sam Burbicki pryjšoŭ z… fatohrafam», — dadaŭ surazmoŭca «Našaj Nivy».
Zdymkaŭ fatohrafa my nie majem, zapisaŭsia na sustreču jon jak Yaraslau Zhda.
Aproč hetych dvuch ludziej i supracoŭnikaŭ «Chaba», na sustrečy bolš nikoha nie było.
Pra siabie 17-hadovy Alaksiej raskazvaŭ u sacsietkach, što vyjechaŭ ź Biełarusi, «tamu što ŭciakaje ad pryzyvu ŭ vojska».
Adnačasova z hetym chłopiec bambiŭ sacyjalnyja sietki Paŭła Libiera, kab toj ź im sustreŭsia i vysłuchaŭ. Toj adkazaŭ, što startapaŭ nie aceńvaje.
«Naša Niva» taksama źviarnułasia pa dadatkovy kamientar da samoha Alaksieja. Jon admoviŭsia adkazvać na pytańni redakcyi:
«Usio, što ŭ mianie było, ja ŭsio raskazaŭ Siarhieju Piatruchinu, jakomu daviaraju. Bolš mnie dadać niama čaho. Usie dokazy ja jamu taksama daŭ».
Admoviŭsia jon i paćvierdzić fakt listavańnia z Paŭłam Libieram.
Treba adznačyć, što pieršymi historyju nibyta ŭzłomu «Novaj Biełarusi» napačatku 2025-ha stali raspaŭsiudžvać kanały, źviazanyja ź biełaruskaj milicyjaj, a taksama błohier-kanśpirołah Kandracienka (Virus). Tady hetu infarmacyju abvierhli, ale novaje žyćcio hetamu ŭkidu daŭ Siarhiej Piatruchin.
Kamientary