Vydańnie «Lusterka» vyvučyła, jakija supracoŭniki Słužby biaśpieki supravadžajuć palityka ŭ jahonych pajezdkach apošnija paŭhoda. Pra ich udałosia daviedacca pry dapamozie Belpol i «Kibierpartyzan».
Eks-desantnik, jaki chodzić pa śladach
Samaja niadaŭniaja zamiežnaja «vyłazka» Łukašenki — pajezdka ŭ Maskvu na parad 9 maja. U hetym padarožžy «cieniem» palityka byŭ ciełaachoŭnik Pavieł Łahun. Mienavita jon sustrakaŭ svajho načalnika z samalota i aŭtamabila, znachodziŭsia pobač padčas razmovy z žurnalistami i stajaŭ za trybunaj, pakul palityk naziraŭ za demanstracyjaj vajskovaj techniki.
U toj ža dzień palityk viarnuŭsia ŭ Miensk i vystupiŭ užo na «svaim» paradzie. Kali paśla mierapryjemstva Łukašenka adpraviŭsia pahutaryć z vajskoŭcami, Łahun znoŭ znachodziŭsia za jaho śpinaj.
Mienavita Łahun, darečy, byŭ pobač z Łukašenkam 30 śniežnia 2020 hoda, kali toj naviedvaŭ vajskovuju čaść minskaha AMAPa i dziakavaŭ siłavikam «za mužnaść, stojkaść, viernaść prysiazie i svajmu narodu». Jaho možna było zaŭvažyć na zdymkach pres-słužby palityka i ŭ nastupnyja hady.
Pavieł — uradženiec Baranavičaŭ, jamu 39 hadoŭ, vynikaje sa źviestak Belpol. U minułym jon słužyŭ u vajskovaj čaści 92700, jakaja ŭvachodzić u skład 38-j asobnaj hvardziejskaj desantna-šturmavoj bryhady z Bresta. Taksama jon pracavaŭ u Biełaruskaj vajskovaj akademii, ličyŭsia tam namieśnikam načalnika i načalnikam kursa. Kali jon dałučyŭsia da słužby biaśpieki Łukašenki, z dastupnych źviestak nieviadoma.
Majstar sportu chutkaha reahavańnia
Da hetaha Łukašenka lotaŭ da Pucina na nieanansavanuju sustreču «sam-nasam» u krasaviku hetaha hoda. U pajezdcy jaho supravadžaŭ supracoŭnik słužby biaśpieki Dźmitryj Čapla.
Dźmitryju 34 hady, jon prapisany ŭ Minsku. Pa danych «Kibierpartyzan», u słužbie biaśpieki jon znachodzicca z 2016 hoda, da hetaha słužyŭ u śpiecyjalnym atradzie chutkaha reahavańnia (vajskovaja čaść 3032) i ŭ śpiecnazie MUS (v/č 3214), dzie kamandavaŭ uzvodam.
U 2018 hodzie Dźmitryj atrymaŭ zvańnie majstra sportu ŭ dyscyplinie «šmatborje ciełaachoŭnikaŭ».
Vielmi daśviedčany achoŭnik
Jašče čaściej pobač z Łukašenkam možna zaŭvažyć Mikałaja Bajaryna. Jon achoŭvaŭ palityka padčas majskaj pajezdki ŭ Maskvu, taksama zaśviaciŭsia na kadrach za 13-14 sakavika 2025 hoda, kali palityk lotaŭ u Kreml na pieramovy z Pucinym.
Bajaryna možna ŭbačyć pobač z Łukašenkam i padčas vizitaŭ unutry krainy. Naprykład, jon išoŭ za načalnikam padčas pracoŭnaj pajezdki ŭ Aršanski rajon u krasaviku hetaha hoda.
Ciapier Mikałaju 41 hod, jon prapisany ŭ Minsku, vynikaje sa źviestak «Kibierpartyzan». U vajskovaj čaści 01549, jakaja adkazvaje za biaśpieku Łukašenki, Bajaryn ličycca jak minimum z 2006 hoda — heta značyć užo amal 20 hadoŭ.
U dastupnych bazach danych jość infarmacyja pra vučobu ŭ siaredniaj škole, adnak nie zachavałasia nijakaj inšaj infarmacyi pra jaho adukacyju abo pracu.
Chakieist i spadarožnik na pradpryjemstvach
Jašče adzin ciełaachoŭnik, jaki supravadžaje Łukašenku ŭ pajezdkach pa krainie, — Andrej Parchimovič. Mienavita jon razam z palitykam naviedvaŭ chram u Tałačynie na Vialikdzień, ahladaŭ zavod «Intehrał» u lutym hetaha hoda i vyvučaŭ novyja stancyi mietro napiaredadni Novaha hoda.
Parchimoviču 39 hadoŭ, va ŭciekłych bazach danych zachavalisia jahonyja adrasy ŭ Minsku i Fanipali. Pavodle infarmacyi «Kibierpartyzan», jon słužyć u słužbie biaśpieki jak minimum z 2010 hoda. Da hetaha jon ličyŭsia ŭ dabračynnym fondzie «Pamiać Afhana».
Taksama Andrej hulaje ŭ chakiej u kamandzie «Lehijon» na pazicyi abaroncy. Jana debiutavała ŭ amatarskim chakiejnym čempijanacie Minska ŭ 2024 hodzie, 23 z 29 jaje hulcoŭ — byłyja abo dziejnyja supracoŭniki Słužby biaśpieki Łukašenki.
Były sabraviec, jaki zaŭsiody pobač
Taksama padčas pajezdak Łukašenki pa krainie na videa traplaje jašče adzin ciełaachoŭnik. Heta Dźmitryj Hierasimčyk. Jon supravadžaŭ palityka padčas vizitaŭ u Aršanski i Škłoŭski rajony ŭ krasaviku hetaha hoda, a taksama na zavod «Intehrał» u lutym.
Dźmitryju 31 hod, jon zarehistravany ŭ Minsku, vynikaje sa źviestak «Kibierpartyzanaŭ». Minułaje miesca jaho słužby — śpiecyjalny atrad chutkaha reahavańnia (vajskovaja čaść 3032), tam jon značyŭsia bajcom. Kali jon pierajšoŭ na ciapierašniuju pasadu ŭ achovie Łukašenki — z dastupnych źviestak nieviadoma.
Jak achoŭvajuć Pucina — novaje rasśledavańnie
Były supracoŭnik Słužby biaśpieki Łukašenki staŭ vykanaŭčym dyrektaram u Biełhazprambanku
Dla hałoŭnaha achoŭnika Łukašenki prydumali kiraŭničuju pasadu ŭ Biełarusbanku
Što za čamadan nosić kala Łukašenki jahony achoŭnik? Nie, tam nie jadziernaja knopka
Zamach na Łukašenku i źnikły ciełaachoŭnik: sakrety samaj zakrytaj śpiecsłužby Biełarusi
Ciapier čytajuć
«Škada, što ludzi mianie ličać takim idyjotam». Dziadok raskazaŭ, jak jaho zmahli vysačyć paśla piaci miesiacaŭ padpolla3
Kamientary