Admova ad makarony, bulby i chleba ŭsiaho dva dni na tydzień moža dać toj ža efiekt, što i intervalnaje haładańnie

U apošnija hady intervalnaje haładańnie stała adnoj z najpapularniejšych dyjet u śviecie. Pavodle apytańnia 2022 hoda, jaho praktykuje kala 10% darosłych amierykancaŭ. U Biełarusi takaja statystyka adsutničaje, ale mnohija śviadoma prapuskajuć śniadanki dziela padtrymańnia svajho vaśmihadzinnaha «akna ježy».

Taki padychod sapraŭdy maje stanoŭčyja nastupstvy. Jak tłumačyć śpiecyjalisty, intervalnaje haładańnie moža dapamahčy arhanizmu pieraklučycca sa spalvańnia ježy na vykarystańnie zapasaŭ tłušču. Heta spryjaje źnižeńniu vahi, rehulacyi ŭzroŭniu cukru ŭ kryvi i pavyšeńniu ahulnaj enierhii ciaham dnia.

Adnak hety mietad maje i niedachopy. Hadziny čakańnia da nastupnaha pryjomu ježy časta supravadžajucca vostrym pačućciom hoładu, razdražnionaściu, stomlenaściu. A pracoŭny hrafik časta robić niemahčymymi rannija viačery, nieabchodnyja pry intervalnym haładańni.

Navukoŭcy z Univiersiteta Sureja prapanujuć alternatyvu. Jak tłumačyć kiraŭnik daśledavańnia, vyniki jakoha apublikavanyja ŭ European Journal of Nutrition, doktar Adam Kolinz u kamientaryi dla The Telegraph, niadaŭniaja praca jaho kamandy pakazała, što

źnižeńnie kolkaści makarony, bulby i chleba ŭ racyjonie i pierachod na nizkavuhlavodnuju dyjetu moža dać tyja ž pieravahi, što i časovaje abmiežavańnie ŭ charčavańni.

Najbolš istotna toje, što arhanizm pačynaje spalvać tłušč zamiest ježy jak krynicu enierhii, što, u svaju čarhu, moža panizić uzrovień cukru i zapalenčyja reakcyi, a taksama źmienšyć ryzyku sardečnych zachvorvańniaŭ i dyjabietu ŭ doŭhaterminovaj pierśpiektyvie.

«Skaračeńnie spažyvańnia vuhlavodaŭ usiaho na niekalki dzion na tydzień moža stać bolš ustojlivaj, ale nie mienš efiektyŭnaj stratehijaj palapšeńnia mietabaličnaha zdaroŭja, — dadaje jon. — Heta moža nahadvać dyjetu 5:2, dzie čałaviek zvyčajna charčujecca piać dzion na tydzień, a ŭ astatnija dva abmiažoŭvajecca adnoj stravaj abo 500—600 kałoryjami».

Jak prachodziŭ ekśpierymient

U daśledavańni ŭdzielničali 32 čałavieki ź lišniaj vahoj. Ekśpierymient prachodziŭ u try asobnyja dni, pamiž jakimi byli piacidzionnyja pierapynki. U pieršy dzień udzielniki charčavalisia zvyčajna, atrymlivajučy patrebnuju kolkaść kałoryj (1800—3000 kkał u zaležnaści ad masy i połu).

U druhi dzień ekśpierymientu jany spažyvali prykmietna mienš kałoryj (žančyny — kala 550, mužčyny — kala 650) i maksimum 50 hramaŭ vuhlavodaŭ (heta prykładna stolki, kolki ŭ maleniečkaj porcyi zvaranaj makarony).

U treci dzień udzielniki mahli jeści stolki kałoryj, kolki patrabujecca arhanizmu, ale kolkaść vuhlavodaŭ taksama zastavałasia na ŭzroŭni da 50 hramaŭ.

U vyniku daśledavańnia navukoŭcy adznačyli palapšeńnie mietabaličnych pakazčykaŭ u abodvuch nizkavuhlavodnych dniach: arhanizm pierachodziŭ u stan spalvańnia tłušču i lepš pierapracoŭvaŭ ježu z vysokim utrymańniem tłušču. Inšymi słovami, efiekty byli takija ž, jak i pry intervalnym haładańni, tolki ŭdzielniki nie haładali, a prosta jeli mienš vuhlavodaŭ.

Navukoŭcy padkreślivajuć, što daśledavańnie nie staviła metaj vymierać straty vahi — heta niemahčyma paśla adnaho dnia. Ale ŭ realnym žyćci, kali čałaviek jeść mienš vuhlavodaŭ, jon, jak praviła, spažyvaje i mienš kałoryj, što i viadzie da źnižeńnia vahi.

Pavodle Kolinza, časovyja abmiežavańni ŭ vuhlavodach mohuć być nie tolki srodkam dla pachudzieńnia, ale i važnym faktaram padtrymki zdaroŭja. Asabliva heta tyčycca ludziej z parušeńniami mietabalizmu abo schilnaściu da dyjabietu.

Kali arhanizm rehularna atrymlivaje bolš ježy, čym jamu treba, jon pierastaje spalvać tłušč i pierachodzić u stan chraničnaha pierasyčeńnia, što pavialičvaje ryzyki sardečnych zachvorvańniaŭ, dyjabietu i atłuścieńnia. Pieraklučeńnie na spalvańnie tłušču — mietabalična zdarovy režym, jaki dazvalaje praduchilić hetyja nastupstvy.

U čym pieravahi nizkavuhlavodnych dzion

U paraŭnańni ź intervalnym haładańniem, nizkavuhlavodny padychod maje vidavočnyja pieravahi, bo niama ryzyki ŭźniknieńnia deficytu vitaminaŭ i mikraelemientaŭ, jaki moža ŭźniknuć pry intervalnym haładańni.

Jość i hrupa ludziej, dla jakich taki režym asabliva vyhadny. Havorka idzie pra žančyn u pierymienapaŭzie i mienapaŭzie, dla jakich intervalnaje haładańnie moža parušyć harmanalny bałans i ŭzmacnić fizijałahičny stres. U takich vypadkach dyjeta z čarhavańniem dzion ź nizkim užyvańniem vuhlavodaŭ moža stać bolš miakkaj, ale efiektyŭnaj alternatyvaj, jakaja zabiaśpiečvaje častku tych ža pieravah, što i haładańnie, ale bieź jaho pabočnych efiektaŭ.

Da taho niekalki nizkavuhlavodnych dzion mohuć być dobrym sposabam padtrymlivać vahu, asabliva dla tych, chto ŭžo jaje źniziŭ. Heta składanaja zadača, i, jak pryznaje doktar Kolinz, efiektyŭnych instrumientaŭ dla takich ludziej pakul mała.

Ci jość ryzyki?

Śpiecyjalisty-nutrycyjołahi adznačajuć, što abmiežavańnie vuhlavodaŭ moža nieści ŭ sabie i ryzyki, asabliva kali jany zamianiajucca pieravažna tłuščami, što moža škodzić sercu. Taksama mahčymyja inšyja niehatyŭnyja efiekty, jakija pakul nie daśledavanyja.

Tamu jany rajać nie apuskać spažyvańnie vuhlavodaŭ nižej za 100 hramaŭ u dzień biez nahladu śpiecyjalista. Taksama lepš aryjentavacca na «čystyja vuhlavody», adymajučy z ahulnaj kolkaści klatčatku, jakuju arhanizm nie zasvojvaje. Mienavita hetyja vuhlavody ŭpłyvajuć na ŭzrovień cukru ŭ kryvi.

• 0
• 0
• 0
• 0
• 0
• 0
• 0
• 0