«Ni ježu, ni hatel nie prapanavali». Biełarusy nie zmahli vylecieć z Maskvy ŭ Minsk z-za čarhovych abmiežavańniaŭ
Pieraloty praz Maskvu apošnim časam stanoviacca niepradkazalnymi: aeraporty ŭsio čaściej abviaščajuć pra abmiežavańni praz ataki bieśpiłotnikaŭ. Učora z hetaj pryčyny byŭ skasavany rejs «Biełavija», jaki pavinien byŭ vylatać a 21:55 z aeraporta Damadziedava. Avijakampanija prapanavała pasažyram abmianiać kvitki na nastupnyja rejsy ci viarnuć hrošy i dabiracca da Minska samastojna. Nie ŭsich heta zadavoliła, i čytačy vydańnia «Anłajnier» zadajucca pytańniem: ci majuć jany prava ŭ takich situacyjach na kampiensacyju žylla i charčavańnia?
«Učarašni rejs z Maskvy ŭ Minsk u 21:55 spačatku adkłali, a potym całkam skasavali, — piša adna z pasažyrak, Jaŭhienija. — Pasažyraŭ adpravili na stojku avijakampanii, dzie častku ź ich stali pierasadžvać na nastupnyja rejsy. Na siaredzinie čarhi miescy skončylisia.
Jak zaviaršyłasia historyja ź inšymi pasažyrami, nie viedaju, bo ja kupiła kvitok na «Łastaŭku» i viarnułasia načavać u horad. Pytańnie ŭ tym, što nam adrazu skazali, što ni ježu, ni hatel, ni taksi avijakampanija nie daje».
Jaŭhienija pytajecca, nakolki heta zakonna i jakuju kampiensacyju, akramia viartańnia hrošaj za kvitki, jana maje prava patrabavać ad avijakampanii.
Dźmitryj dubluje pytańnie — jon taksama byŭ siarod pasažyraŭ učorašniaha admienienaha rejsa.
«Rejs spačatku pieranieśli na paŭtary hadziny, potym akazałasia, što jon admienieny całkam, a my možam pamianiać bilet abo atrymać viartańnie srodkaŭ, ale tyja, chto chutka padyšoŭ, paśpieli razabrać dobryja kvitki (u tym liku anłajn). Mnie prapanoŭvali vylet tolki na 17 hadzin [nastupnaha dnia] z Unukava.
Dla viartańnia hrošaj za kvitok treba źviartacca tudy, dzie jaho nabyli. Skazali, što nijakich kampiensacyj za paniesienyja dadatkovyja vydatki (charčavańnie, hatel) nie budzie, bo heta zdaryłasia nie pa ich vinie. Jak ja zrazumieŭ, samalot navat nie pryziamliŭsia ŭ Maskvie, bo aeraport byŭ zakryty.
Ja paličyŭ, što kali žyllo nie dajuć i nie apłačvajuć, to zdymać jaho ŭ Maskvie za svoj košt nie varyjant. Tamu ja, jak i siem inšych pasažyraŭ, pabieh na ciahnik, jaki adpraŭlaŭsia z vakzała ŭ 01:41. Paśpieŭ za 15 chvilin da adpraŭleńnia».
Dźmitryj pierakanany, što padobnyja situacyi z vyletam z Maskvy mohuć paŭtaracca, tamu pasažyram treba być hatovymi da hetaha.
«U mianie asabista, napeŭna, byli zavyšanyja čakańni adnosna abaviazkaŭ avijakampanij u vypadku fors-mažoraŭ», — aburajecca Dźmitryj.
Što kažuć u avijakampanii
Žurnalist «Anłajniera» źviarnuŭsia ŭ avijakampaniju «Biełavija» pa kamientar z nahody admieny rejsaŭ i mahčymych kampiensacyj u takich vypadkach dla pasažyraŭ.
«My sapraŭdy sutykajemsia z vymušanymi źmienami ŭ palotach u aeraporty Maskvy — heta źviazana z uviadzieńniem časovych abmiežavańniaŭ u pavietranaj prastory RF. My razumiejem, nakolki takija momanty niepryjemnyja dla pasažyraŭ, i starajemsia apieratyŭna vyrašać pytańni, jakija ŭźnikajuć.
Varyjanty roznyja i zaležać ad kankretnych abstavin. Kali jość mahčymaść, pasažyra apieratyŭna pierasadžvajuć na inšy rejs. Kali niama abo takoje rašeńnie nie zadavalniaje samoha pasažyra, jamu prapanujuć viarnuć poŭny košt kvitka. Dniami pasažyram viačerniaha rejsa, jakija nie palacieli ŭ Maskvu, prapanavali samastojna vybrać rejs na praciahu nastupnaha dnia i abmianiać kvitki biez dapłat.
Taksama ŭ avijakampanii dziejničajuć normy, praduhledžanyja avijacyjnymi praviłami. Pry admienie rejsaŭ abo zatrymcy bolš čym na dźvie hadziny pasažyram dajuć vadu, zvyš troch hadzin — charčavańnie. Pasažyr moža zapytać raźmiaščeńnie ŭ hateli, kali zatrymka pieravyšaje vosiem hadzin u dzionny čas i šeść u načny. Nakolki nam viadoma, 76 pasažyram hetaha rejsa było vydadziena pa dva vaŭčary: na napoi i na charčavańnie».
U «Biełavija» adznačyli, što ŭ situacyjach, kali z admienaj abo zatrymkaj rejsaŭ za adzin raz sutykajucca šmat avijakampanij, abaviazacielstvy pa charčavańni mohuć być vykananyja sa spaźnieńniem.
«Tut važna padkreślić: avijakampanija nie moža paŭpłyvać na abmiežavańni, jakija ŭvodziacca aeraportami. Dla nas heta niaštatnyja situacyi, jakija ciahnuć za saboj ekstrannaje karektavańnie raskładu, dadatkovyja vydatki na paliva — adnym słovam, surjoznyja straty.
Hrašovyja kampiensacyi pasažyram pa pryčynie zatrymak abo admieny rejsaŭ, jakija adbylisia nie pa vinie avijapieravozčyka, zhodna z ahulnym standartam, nie praduhledžanyja. My prynosim prabačeńni za niazručnaści.
Avijakampanija robić usio mahčymaje, kab pamienšyć dyskamfort pasažyraŭ. Čytačy, u jakich zastalisia niezakrytyja pytańni, mohuć napisać zvarot u avijakampaniju».
Što vydajuć pasažyram u biznes-kłasie «Biełavija»
«Biełavija» abjaviła źnižki na paloty ŭ Dubaj
«Skazali, što tranśfieru nie budzie». «Biełavija» pieranosić niekatoryja rejsy z Batumi ŭ Kutaisi
«Mianie kałaciła, ciakli ślozy». Samalot «Biełavija», jaki lacieŭ z Bresta ŭ Antalju, pryjšłosia raźviarnuć nad Rasijaj
Praź dzieviać miesiacaŭ paśla vyzvaleńnia pamior palitviazień Valeryj Bohdan7
Kamientary