«Adčuŭ siabie kałabkom». 22-hadovy biełarus źbieh z vojska, pažyŭ na niekalkich kantynientach, ale ciapier jamu treba hrošy
Rusłanu Kaścieviču ź vioski Horki Červieńskaha rajona było 19 hadoŭ, kali jon dźzierciravaŭ. Heta było ŭ 2022-m. Biełarusy sabrali jamu hrošy praz «Bajsoł». Za try hady paśpieŭ pažyć u Hruzii, Polščy, Indyi, Brazilii i Arhiencinie. Dzie i kim tolki ni pracavaŭ, pabačyŭ śviet, ale ciapier šukaje stabilny zarobak anłajn.
Rusłana pryzvali ŭ armiju ŭ mai 2021-ha. Paśla taho jak va Ukrainie pačalisia bajavyja dziejańni, ich čaść ź Viciebskaj vobłaści adpravili ŭ Jelski rajon, da miažy.
Chłopiec nie chacieŭ udzielničać u vajnie, tamu samavolna pakinuŭ miesca słužby. U vyniku jon apynuŭsia pad kryminalnaj spravaj i vyrašyŭ źjechać ź Biełarusi.
Kala hoda biełarus pravioŭ u Hruzii. Hrošy jamu na pieršy čas sabrali ludzi praz «Bajsoł».
Paźniej jon padpracoŭvaŭ na fryłansie. Nienadoŭha Rusłan vyjazdžaŭ u Polšču. Adnak:
«Polšča mnie nie zajšła. Ja adčuvaŭ ad palakaŭ niejkaje pahardlivaje, prynižalnaje staŭleńnie da pryjezdžych ź Biełarusi, Ukrainy», — zhadvaje chłopiec.
Prafiesii, adukacyi ŭ chłopca niama. Paśla škoły biełarus nie pastupaŭ va ŭniviersitet: nie vyznačyŭsia sa śpiecyjalnaściu, a ŭvahu chłopca zachaplali płejtesty — teściravańni hulniaŭ.
Partał probusiness.io pisaŭ, što ŭ školnyja časy Rusłan praktykavaŭsia ŭ pradprymalnictvie. Naprykład, zapuściŭ svoj prajekt dla pošuku pracy LiteJob i prodažu suchafruktaŭ Lifam. Pra Rusłana-školnika navat dziaržaŭnaje telebačańnie zdymała siužet. U 2018 hodzie kanał «Biełaruś 1» raskazaŭ, jak junak arhanizavaŭ dla školnikaŭ ekskursii pa biełaruskich kampanijach.
U emihracyi chłopiec padumvaŭ ab pastupleńni va ŭniviersitet, ale taksama nie skłałasia. Ź Jeŭropy jon vyjechaŭ biez dypłoma.
«Ja byŭ vielmi niezadavoleny školnaj sistemaj adukacyi i čuŭ, što va ŭniviersitetach nie lepš. I ja prosta nie viedaŭ, jaki kirunak vybrać. Dumaŭ, moža być, ekanomiku. A što tołku było b? Pastupiŭ by, moža, u vojska nie pajšoŭ by. Ale, chutčej za ŭsio, vyjechaŭ by ź Biełarusi, tamu što žyć u takim režymie było b niemahčyma», — razvažaje biełarus.
«I ad babuli źbieh, i ad dziaduli źbieh»
Z Hruzii chłopiec dalacieŭ da Indyi, kab sieści na tanny rejs da Brazilii. Uvieś hety čas biełarus padzarablaŭ na nieskładanym dyzajnie ci vykonvaŭ zadačy asistenta — dapamahaŭ z dakumientami, stvaraŭ prezientacyi.
Niestandartny vybar krainy jon tłumačyć prosta: u Jeŭropie jon moh zastacca tolki ŭ Polščy ci Hiermanii, ale nie chaciełasia.
Adrazu razhladaŭ dla emihracyi Arhiencinu, a jaho znajomy padkazaŭ, što «ŭ Brazilii toje samaje» staŭleńnie da tych, chto padajecca na prytułak. Praz dva miesiacy Rusłan padaŭsia tam na ŭciakactva.
Sprava, adnak, nie ruchałasia — praź jašče siem miesiacaŭ u mihracyjnym adździaleńni skazali, što pakul navat nie mohuć paklikać jaho na intervju. Pačytaŭ čaty ruskamoŭnych u Brazilii: tam kazali, što čakańnie moža doŭžycca i da čatyroch hadoŭ. I Rusłan pierajechaŭ u Arhiencinu.
«Adčuŭ siabie kałabkom. Ja i ad babuli źbieh, i ad dziaduli źbieh. Ciažka ŭsie hetyja hady — pierajezdy. Try hady emihracyi. Ale treba niejak spraŭlacca.
Tut mnie adrazu vydali dakumienty i jość termin try miesiacy — paśla jany pavinny buduć vyklikać mianie na intervju».
«Što značyć źbierahać?»
Ciapier Rusłan dazvołu na pracu nie maje. Da taho ž, chłopiec nie razmaŭlaje na ispanskaj movie. Tamu Rusłan šukaje pracu anłajn.
U Brazilii jon byŭ znajšoŭšy pracu na prajekcie pa chutkim zarobku — treba było znachodzić błohieraŭ u tvitary i damaŭlacca ź imi na rekłamnyja dopisy.
Rusłanu na toj pracy abiacali płacić pa 5 tysiač dalaraŭ na miesiac, ale heta chutka skončyłasia. Biełarus nie zmoh pieraklučycca na pracu z kryptavalutami, kampanija zaznała ciažkaści ź pieravodami praz płaciežnuju sistemu Strajp, a načalnik sfakusavaŭsia na inšym prajekcie, jaki prynosiŭ bolš hrošaj.
Tak u 22 hady chłopiec zastaŭsia biez pracy ŭ Baryłoče — horadzie arhiencinskaj pravincyi Rya-Niehra. Kaža, što ŭ takoj situacyi apynuŭsia ŭ tym liku praź niapravilnaje raźmierkavańnie finansaŭ.
«Pryčyna, napeŭna, u pierapadzie dachodaŭ. Nie možaš adaptavacca, pastajanna źmianiajucca tvaje dachody. U hetym miesiacy ty zarablaješ 1500 dalaraŭ, a ŭ nastupnym — 700 dalaraŭ. U trecim — jak ź influjensierami — zarablaješ 5-6 tysiač. A potym znoŭ tysiaču. Niama stabilnaści. Nie možaš adčuć, što ty možaš nabyvać, što nie možaš», — tłumačyć jon.
Źbierahać hrošy chłopiec nie ŭmieje:
«Jak źjavicca, što adkładvać, ja pastarajusia. Chacia ni razu taho nie rabiŭ. Što značyć adkładvać? Navat pry vialikich dachodach ja ŭmudraŭsia mocna nie adkładvać. To-bok ja naŭmysna nie adkładvaŭ, u mianie prosta niešta zastavałasia. Niešta ja nie paśpiavaŭ patracić», — kaža jon.
Ciapier u sacyjalnych sietkach Rusłan prosić jamu dapamahčy z hrošami i znajści pracu. Śćviardžaje, što finansavaja situacyja takaja krytyčnaja, što treba źbirać na arendu i na rečy. U jaho, prykładam, złamaŭsia kampjutar — chłopiec kaža, što praz toje, što vyhružaŭ ź jaho dadzienyja pa prodažach u internecie.
Biełarus robić mantaž dla videa, vučycca pracy z sacsietkami — dla taho navat teściravaŭ rekłamu na svaich asabistych dopisach i zmoh nakrucić łajki — tamu stužka i vyhladaje nienaturalna. U emihracyi, tłumačyć biełarus, daviałosia zhadać usio, što pačynaŭ rabić u škole.
«Ja ŭmieju markietynh, HR, dystancyjnaje asistavańnie, hrafičny dyzajn i UI/UX-dyzajn u Figma, videamantaž u Sony Vegas Pro i stvareńnie stylnych prezientacyj u PowerPoint», — piša chłopiec.
Ciapier čytajuć
Piać pytańniaŭ, jakija zastajucca paśla śmierci eks-vykładčyka BNTU Ščukina, što ŭciakaŭ ad milicyi7
Kamientary
Vučyś tančyć Žyćcie pracavać prymusić ci navučyt
Hety padletak za 5 hod ni žadaje vučycca a kali prymušaje " Padajcie dziezierciru?? ..Jakoha ?
Adzin raz dapamahli na 5 hod chapiła .
Andruś kaža .ni suŕjezny chłopiec