Trochmiesiačnaje pieramirje ŭ suśvietnaj handlovaj vajnie Donalda Trampa padychodzić da kanca, i naviny dla amierykanskaha prezidenta sumnyja. Ni adna z troch metaŭ ataki Trampa na kankurentaŭ i sajuźnikaŭ ZŠA nie dasiahnutaja, a času zastałosia mienš za miesiac, piša VVS.
Što pajšło nie tak?
Apošnija dva miesiacy pakazali, što taryfnyja vojny nie dapamahajuć, a škodziać amierykancam: ceny rastuć, deficyt nie źnižajecca, akcyi i ablihacyi tańniejuć, dalar padaje. Zapužać zamiežnikaŭ taksama nie ŭdałosia — ni adna kraina pakul nie kapitulavała pad pahrozaj taryfaŭ Trampa.
Nie spužalisia
U pačatku krasavika Tramp uvioŭ padatak na impart tavaraŭ z usiaho śvietu ŭ ZŠA z tryma metami. Pa-pieršaje, sabrać ź imparcioraŭ hrošy ŭ biudžet i za košt hetaha źnizić padatki. Pa-druhoje, stvaryć ciapličnyja ŭmovy dla adradžeńnia amierykanskaj pramysłovaści, abaraniŭšy jaje mytami ad zamiežnych kankurentaŭ. I pa-treciaje, prymusić inšyja krainy pajści na sastupki — handlovyja, ekanamičnyja, palityčnyja — pad pahrozaj stracić dostup na bahaty amierykanski rynak.
Hihanckija myty doŭha nie prastajali — Tramp u toj ža dzień pastaviŭ ich na 90-dzionnuju paŭzu, bo biznes i finansisty ŭ samoj Amierycy choram zahałasili pra nadzvyčajny kryzis, a inviestary pačali vyvodzić hrošy z ZŠA.
Dalar u čakańni kryzisu nie vyras, a pačaŭ padać. U śviecie zahavaryli pra zakat amierykanskaj valuty i blizki kaniec amierykanskaj ekanamičnaj i finansavaj hiehiemonii na płaniecie.
Bieły dom paśpiašaŭsia ŭsich supakoić: Tramp tolki pałochaje ŭsich vysokimi taryfami, a nasamreč heta — pieramoŭnaja taktyka, i razburać suśvietny handal jon nie źbirajecca.
Tramp — majstar zaklučać ździełki, kazała jahonaje asiarodździe, i jaho ahresiŭnaja pieramoŭnaja taktyka prymusić usich handlovych partnioraŭ ZŠA pryjechać u Vašynhton z darami i sastupkami.
Bieły dom abiacaŭ 90 ździełak za 90 dzion pieramirja.
Prajšło 60 dzion — i pakul ździełka zaklučanaja tolki adna, ź Vialikabrytanijaj. I taja papiaredniaja, i kali za astatni miesiac pieramirja jaje kančatkova nie padpišuć, to i nie budzie nijakaj ździełki.
Da taho ž, heta mienavita ździełka, a nie ŭsiebakovaje handlovaje pahadnieńnie. Jaje nie ŭchvalajuć parłamienty, i Tramp moža adnym podpisam adklikać damoŭlenaści.
Inšyja ž partniory pačali pieramovy, ale za čas hetych pieramoŭ vyśvietliłasia, što Tramp nie taki strašny, jak jaho malujuć.
Usio tamu, što Tramp atrymaŭ dva balučyja paražeńni ŭ svajoj handlovaj vajnie. Adno — na kitajskim froncie. Druhoje — u tyle, ad amierykanskich praciŭnikaŭ jahonaha taryfnaha chaosu.
Kitajskija pakuty Trampa
Adkłaŭšy myty suprać usich, Tramp zasiarodziŭ nastup na kitajskim froncie. Jon uvioŭ suprać hałoŭnaha vajskovaha i ekanamičnaha kankurenta ZŠA zabarončyja myty ŭ 145% i zapatrabavaŭ, kab staršynia KNR Si Czińpin patelefanavaŭ jamu, uzhadniŭ umovy kapitulacyi i pasłaŭ delehacyju ŭ Vašynhton padpisać jaje.
Si nie patelefanavaŭ, delehacyja nie pryjechała. Kitaj uźniaŭ svaje myty suprać amierykanskich tavaraŭ i abmiežavaŭ ekspart redkaziamielnych mietałaŭ. Supraciŭ zajšoŭ u tupik — handal pamiž dźviuma najbujniejšymi ekanomikami śvietu faktyčna spyniŭsia.
Kitajcy Trampa pieražyli.
«My mirhnuli pieršymi», — kaža Bił Rajnš, były čynoŭnik Ministerstva handlu ZŠA.
Kitaj nie zhadžaŭsia na pieramovy pad dułam pistaleta, i Tramp u vyniku vykanaŭ usie try hałoŭnyja kitajskija ŭmovy: źniać zabarončyja myty, sustrecca na niejtralnaj terytoryi i spynić publičnyja napadki na Kitaj.
Pakul Tramp maŭčaŭ, jaho ministry sustrelisia ŭ mai z kitajcami ŭ Ženievie i ŭzhadnili pieramirje na 90 dzion. Tramp źniziŭ taryfy da 30% zamiest 145%, a Kitaj pahadziŭsia źniać svaje i admianić zabaronu na ekspart redkaziamielnych mietałaŭ.
«My zrabili kitajcam bolš sastupak, čym jany nam, — pryznajecca Rajnš, ciapier ekśpiert pa kitajskim handli ŭ daśledčym centry CSIC. — Adnak heta ŭsio adno dobryja naviny. Usio, što mienš za 145%, — dobryja naviny».
Pieramirje chutka akazałasia pad pytańniem. Tramp vyrašyŭ zabaranić pastaŭki prahramnaha zabieśpiačeńnia ŭ Kitaj i paabiacaŭ «ahresiŭna» pazbaŭlać viz kitajskich studentaŭ u ZŠA. Kitaj u adkaz prypyniŭ afarmleńnie ekspartu redkich mietałaŭ. Straści siahnuli kulminacyi, i Tramp abvinavaciŭ Si ŭ zryvie damoŭlenaściaŭ.
Kitaj viarnuŭ abvinavačańnie, i Tramp znoŭ nie vytrymaŭ pieršym. U piatnicu jon patelefanavaŭ Si Czińpinu i paŭtary hadziny abmiarkoŭvaŭ ź im handlovyja adnosiny. Jany zaprasili adzin adnaho ŭ hości, a Kitaj śćviardžaje, što Tramp jašče i pieradumaŭ zabirać vizy dy ciapier «vitaje pryjezd kitajskich studentaŭ na vučobu ŭ ZŠA».
Žarści na kitajskim froncie na čas ścichli.
Tramp pieraklučyŭ uvahu na zachodni jeŭrapiejski front, dzie daŭno bieź źmienaŭ. Jon pačaŭ nastup na ES, pahražajučy ŭvieści myty ŭ 50% z 1 červienia, kali Jeŭrasajuz nie voźmie siabie ŭ ruki i nie pačnie aktyŭnyja pieramovy — inakš da 90-dzionnaha dedłajnu na pačatku lipienia ZŠA nie paśpiejuć zaklučyć ździełku z najbujniejšym handlovym, ekanamičnym i abaronnym partnioram.
ES paabiacaŭ paskorycca, i Tramp źmianiŭ hnieŭ na miłaść. Na jeŭrapiejskim froncie znoŭ zapanavała cišynia.
Ale nie prajšło i troch dzion, jak pryjšła novaja biada. 28 maja Tramp panios samaje surjoznaje paražeńnie za ŭsie časy handlovaj vajny. I nie za miažoj, a ŭ tyle — u ZŠA.
Myty pa-za zakonam
Amierykanski sud pastanaviŭ, što myty Trampa niezakonnyja. I nie adzin sud, a adrazu dva.
Niezakonnymi pryznali nie ŭsie myty, ale samyja hałoŭnyja. Ich Tramp uvioŭ pa zakonie paŭviekavoj daŭniny, što delehuje prezidentu peŭnyja paŭnamoctvy ŭvodzić sankcyi suprać inšaziemcaŭ u vypadku nadzvyčajnych situacyj.
Mienavita hety akt IEEPA staŭ hałoŭnym instrumientam handlovaj vajny Trampa. Jon abjaŭlaje NS — i ŭvodzić myty.
Tak, Tramp abjaviŭ nadzvyčajnaj situacyjaj deficyt handlovaha bałansu, ź jakim Amieryka žyvie ŭžo niekalki dziesiacihodździaŭ, i ŭvioŭ adnačasovyja myty suprać usiaho śvietu — minimum 10%, ale dla mnohich bolš. Pavyšanyja taryfy jakraz patrapili ŭ pačatku krasavika pad maratoryj na 90 dzion. Ale staŭka ŭ 10% na ŭsich pa-raniejšamu dziejničaje.
Ciapier jana pa-za zakonam, jak i 25% myty suprać Mieksiki i Kanady — susiedziaŭ ZŠA, i 20% suprać Kitaja, uviedzienyja pad padstavaj inšaha NS — kantrabandy narkotykaŭ.
Trampu padabajecca IEEPA tym, što pa hetym zakonie jon moža ŭvodzić sankcyi imhnienna, biez ahladańnia na Kanhres, biznes i hramadskuju dumku. Inšyja instrumienty handlovaj palityki bolš abciažaranyja i patrabujuć doŭhich miesiacaŭ rasśledavańnia, uzhadnieńnia i kansultacyj.
Ale sudy zaniali adnaznačnuju pazicyju: zakon pisaŭsia dla inšaha, handlu jon nie datyčycca, i ni ŭ jakim razie nie delehuje prezidentu zapytanyja Trampam šyrokija paŭnamoctvy dla praviadzieńnia padatkovaj i handlovaj palityki.
«Sud źviarnuŭ uvahu, što kanstytucyja nadaje Kanhresu, a nie prezidentu, vyklučnyja paŭnamoctvy ŭstanaŭlivać i źbirać padatki, zbory, myty i akcyzy, a taksama rehulavać handal z zamiežnymi dziaržavami», — adznačaje Džyn Chili z Cato Institute.
«Administracyja Trampa pieratvaryła źniešniepalityčny zakon ab sankcyjach va ŭniviersalnuju zbroju handlovaj vajny. Da siońnia nijaki prezident nie vykarystoŭvaŭ IEEPA, kab uvieści maštabnyja taryfy suprać sajuźnikaŭ i handlovych partnioraŭ», — piša jon.
Rašeńnie suda pakul nie ŭstupiła ŭ siłu, bo Bieły dom padaŭ apielacyju. Sprava, chutčej za ŭsio, dojdzie da Viarchoŭnaha suda. Akramia taho, ŭ Trampa jość inšyja instrumienty, i jon nieadkładna skarystaŭ adzin ź ich, padniaŭšy myty na stal i aluminij, uviedzienyja pavodle inšaha zakona.
Adnak škoda ŭžo niepapraŭnaja. Trampu budzie ciažej vieści pieramovy z pazicyj siły, kali jahony ŭłasny sud pastanaviŭ, što taryfy niezakonnyja.
«Inšaziemcam dali nadzieju na toje, što amierykanskija sudy ŭrešcie abmiažujuć mahčymaści Trampa radykalna mianiać amierykanskuju taryfnuju palityku na padstavie nadzvyčajnaj situacyi», — piša ekśpiert Amierykanskaj rady pa mižnarodnych adnosinach Bred Setsier.
A z ulikam taho, što i sam Tramp pastajanna adychodzić ad hučnych taryfnych abjaŭ, dalejšy scenaryj handlovaj vajny z kožnym dniom stanovicca ŭsio bolš nievyraznym.
«Tramp ciapier viedaje, što ŭ jaho reputacyja čałavieka, zaŭsiody hatovaha adyści nazad, — adznačaje Setsier. — A śviet viedaje, što Tramp moža stracić ulubiony instrumient handlovaj vajny pa voli amierykanskich sudoŭ».
Pramiežkavyja vyniki handlovaj vajny
Tramp nie źbirajecca zdavacca, asabliva ciapier. Jahonaja handlovaja vajna pakul tolki naškodziła i amierykanskaj ekanomicy, i adnosinam ZŠA z sajuźnikami dy klučavymi handlovymi partniorami. A abiacanyja dyvidendy nie pryniesła — administracyja Trampa zapeŭnivaje, što jany buduć, ale paźniej.
Na hetym tydni kłub bahatych krain Ahienctva ekanamičnaha supracoŭnictva i raźvićcia (OECD) papiaredziŭ, što taryfnyja barjery zrobiać śviet biadniejšym, čym jon byŭ by bieź ich. I pierš za ŭsio paciarpiać sami ZŠA.
Prahnoz rostu suśvietnaj ekanomiki OECD paniziła da 2,9% z 3,1%, a voś amierykanskaj jašče bolš — da 1,6% z 2,2%.
Pieramirje źniało da pačatku lipienia zabarončyja handlovyja barjery Trampa, ale tyja, što zastalisia, pa-raniejšamu biesprecedentnyja dla sučasnaj historyi, tamu ekanamisty i panižajuć prahnozy rostu dabrabytu va ŭsim śviecie.
Jašče na pačatku hoda siaredni padatak na impart tavaraŭ u ZŠA nie pieravyšaŭ 2,5%. Ciapier jon dasiahaje 15%, padličyli ekanamisty banka UBS, jakich cytuje Bloomberg. Heta — istotnaje pavyšeńnie padatkaŭ dla amierykancaŭ, da 1,5% VUP, što procilehłaje zajaŭlenaj mecie Trampa skaracić padatkovy ciažar za košt impartnych mytaŭ i zamiaścić vypadajučyja dachody zborami impartnych mytaŭ.
Pakul spravy iduć to ŭleva, to ŭprava. Pavodle papiaredniaj statystyki, amierykanskaja ekanomika pierastała raści i skaraciłasia ŭ pieršym kvartale na 0,2% u hadavym vyražeńni — upieršyniu z časoŭ kryzisu COVID.
Biznes ža tym časam pavyšaje ceny, što skaračaje dachody spažyŭcoŭ — ruchavik ekanomiki ZŠA.
A hrošy, sabranyja ŭ biudžet ad novych mytaŭ, u vyniku, mahčyma, daviadziecca viarnuć — kali Viarchoŭny sud nie admienić rašeńni nižejšych instancyj.
Takim čynam, ni da adnoj z abvieščanych metaŭ handlovaj vajny Tramp pakul nie nabliziŭsia. Dachody ad mytaŭ pad pytańniem, biznes nie kvitnieje, a skardzicca, a handlovyja partniory nie iduć na sastupki.
«Padychod administracyi Trampa da handlovaj palityki pa-raniejšamu žudasny, jany ŭsiudy pasiejuć poŭnuju niavyznačanaść, i nijakija handlovyja ździełki nie dapamohuć, bo niama nijakich harantyj, što ZŠA nie parušać ich», — papiaredžvaje ekśpiert daśledčaha centra ECIPE Devid Chienih.
Ciapier čytajuć
Vučniaŭ, jakija z matam parvali ekzamienacyjnyja bilety pa historyi Biełarusi, prymusili vybačacca kala manumienta Pieramohi41
Kamientary