U 2024 hodzie na tysiaču žančyn prypała kala 7 abortaŭ, a dvaccać hadoŭ tamu hety pakazčyk byŭ utraja bolšy. Za apošnija hady ahulnaja kolkaść abortaŭ źnižajecca štohod — letaś było zroblena 14,5 tysiačy, na 1,4 tys. mienš, čym u papiarednim hodzie, i na 50 tysiač mienš, čym u 2006-m, piša vydańnie «Biełorusy i rynok».
Skaračeńnie tłumačycca nie tolki źmianšeńniem kolkaści žančyn fiertylnaha ŭzrostu, ale i ahulnym źnižeńniem doli abortaŭ na dušu nasielnictva. Kali ciapier heta 6,8 na tysiaču žančyn, to ŭ 2005 hodzie było 22,6.
Asnoŭnaja kolkaść abortaŭ pa-raniejšamu prypadaje na žančyn va ŭzroście 25—34 hady. Ale ŭ paraŭnańni ź minułymi dziesiacihodździami amal źnikli aborty siarod dziaŭčat 15—19 hadoŭ: ciapier usiaho 2 vypadki na tysiaču, chacia ŭ 2005 hodzie — 16.
Situacyja ŭ roznych rehijonach roznaja. U Minsku i Minskaj vobłaści — najbolš spryjalnaja: 4,5 aborty na tysiaču žančyn. U Viciebskaj i Homielskaj — udvaja bolšaja: 10—11.
Choć ułady i hramadskija inicyjatyvy ŭsio čaściej asudžajuć aborty ŭ ramkach kansiervatyŭnaj rytoryki, statystyka śviedčyć, što kolkaść abortaŭ źmianšajecca i biez asablivaha źniešniaha ŭmiašańnia.
Asnoŭnymi pryčynami źnižeńnia stali rost uzroŭniu žyćcia i adukacyi, raspaŭsiudžańnie kantracepcyi i, razam z hetym, skaračeńnie naradžalnaści. U 2024 hodzie na adnu žančynu prypadała ŭsiaho 1,08 naradžeńnia, tady jak u 2016 hodzie — 1,7. Tamu možna vykazać zdahadku, što biełaruski prosta radziej zaciažarvajuć, a značyć — radziej i robiać aborty.
Kamientary