«Ja amal zaŭsiody ŭ darozie». Historyja biazdomnaj biełaruski, jakaja žyvie ŭ padarožžach
Usio pačałosia ŭ 2020 hodzie. Paśla prezidenckich vybaraŭ i pratestaŭ Julija pakinuła Biełaruś. Pieršym prypynkam stała Varšava, jak jana sama kaža, «heta pieršy punkt na šlachu da svabody». Užo bolš za hod u biełaruski niama navat arendnaha žylla, jana ŭvieś čas pierajazdžaje, padarožničaje i pakul nie źbirajecca spyniacca dzieści nadoŭha, piša Ex-press.live.
A čamu b nie pavandravać?
«Ja pryjechała amal ni z čym. Adrazu źniała pakoj ź siabrami — takimi ž, jak ja, emihrantami. Było trochi strašna i vielmi chvalujuča. Novy horad, novyja praviły. Ale ja chutka asvoiłasia», — uspaminaje jana.
U Polščy Jula atrymała časovy dazvoł na žycharstva, uładkavałasia na addalenuju pracu i pačała budavać novaje žyćcio. Varšava joj spadabałasia, asabliva vialikaja supolnaść biełarusaŭ, aktyŭnaje kulturnaje žyćcio i niedarahija pradukty.
«Ja navat uciahnułasia ŭ hetuju hulniu z akcyjami ŭ supiermarkietach. Pastaviła ŭsie mahčymyja dadatki, vydatkoŭvała na ježu minimalna», — śmiajecca Jula.
Ale viasnoj 2024 hoda situacyja źmianiłasia. Haspadar kvatery, dzie jana žyła, vyrašyŭ jaje pradać. I zamiest taho kab šukać novaje žyllo, Jula vyrašyła… pajechać dalej.
«Napieradzie było leta. Ja pracuju anłajn, nie pryviazanaja da miesca, narmalna viedaju inhliš. I ja padumała: a čamu b nie pavandravać?»
Z tych časoŭ Varšava dla Julii — heta tolki «horad dla vizitaŭ pa spravach». Uvieś astatni čas jana pravodzić «pamiž harami i vakzałami, fiestyvalami i čužymi kuchniami».
Chaŭśsicinh — kali čužy dom stanovicca tvaim
Siońnia Jula nie płacić za arendu. Jana chaŭśsitar — žyvie ŭ damach ludziej, jakija źjazdžajuć u adpačynak, kamandziroŭku abo na vakacyi, i sočyć za paradkam:
«U mianie byŭ dom u Bierlinie, lecišča ŭ Limožy, kvatera ŭ Afinach. Usio biaspłatna. Naŭzamien ja palivała kvietki, karmiła katoŭ, prybirała. Časam prosta žyła ŭ pustym domie».
Adnojčy haspadary kvatery pakinuli joj płejlist z ulubionaj muzykaj… sabaki.
Julija pierasoŭvajecca pa Jeŭropie ź minimalnymi vydatkami. Časam kuplaje tannyja kvitki praź śpiecyjalnyja dadatki. Ale čaściej — padarožničaje aŭtastopam:
«Niechta skaža: strašna. A ja skažu: čaroŭna. Asabliva kali ciabie padvozić maŭklivy dalnabojščyk, a ŭ kałonkach hraje stary polski džaz, rok-opiera abo hienijalny palak biełaruskaha pachodžańnia Česłaŭ Nieman».
Časam Jula načuje ŭ ludziej praz kaŭčsiorfinh — servis, dzie chosty prymajuć padarožnikaŭ biaspłatna. Hałoŭnaje — uzajemny davier i cikavaść:
«Ja spała ŭ pakoi z čyrvonymi firankami ŭ Ryzie, na raskładancy ŭ Vienie, na padłozie ŭ Lijonie — pobač z prajektaram, jaki pa načach tranślavaŭ artchaŭs».
«Choć ja i nie bahataja, ale svabodnaja»
Julija nie tolki žyvie ŭ darozie, ale i aktyŭna ŭdzielničaje ŭ fiestyvalach i vałanciorskich prajektach. Jana dapamahała na ŭvachodzie, vydavała branzalety, myła kufli, a potym tančyła ŭ natoŭpie pad Linkin Park.
«Ja ničoha nie płaciła. Navat pajeła smačna», — uspaminaje jana.
Jašče Jula ŭdzielničała ŭ adukacyjnych i ekałahičnych abmienach. U Litvie razam ź inšymi dziaŭčatami i chłopcami pisała prajekty, žyła ŭ kampusie, hulała pa daždžlivaj Vilni:
«Heta jeŭrapiejski adpačynak, tolki z karyściu».
Adna z najvažniejšych apor u padarožžach — ziemlaki. Znajomyja biełarusy žyvuć pa ŭsioj Jeŭropie. A jašče Jula znachodzić haradskija čaty, dzie možna paprasić parady, damovicca pra načleh ci prosta paznajomicca:
«U Hiermanii my hulali pa lesie. Piać siabrovak, zaplečniki, termas, BČB-ściah. Usio było smačnaje, viasiołaje i trochi sumnaje. Tamu što dadomu — nielha».
Julija pryznajecca: hrošaj u jaje niašmat. Čamadanaŭ Louis Vuitton taksama niama. Ale jość svaboda i sapraŭdnaje žyćcio.
«Padarožničać biez hrošaj — mahčyma. Takich, jak ja, šmat. Choć ja i nie bahataja, ale svabodnaja. A jašče ŭ mianie jość historyi, jakija možna raskazvać cełymi dniami», — kaža jana.
Jak miedsiastra z Barysava adpačyvaje amal biez hrošaj
«Ja byŭ u takoj dupie, ale pahladzicie na mianie». Staŭki daviali biełarusa da dna — jon raskazvaje, jak vybraŭsia nazad
«Heta šlach adzinočki». Biełarus bolšuju častku žyćcia pravodzić u vandroŭkach — naviedaŭ užo amal 500 abjektaŭ JUNIESKA
«U takuju ž haleču, dy jašče i chałodnuju, pakistancy nie pajeduć». Biełarus piać tydniaŭ pravioŭ u Pakistanie — voś što jaho ŭraziła
Ciapier čytajuć
A my vam kazali: «nie dumajcie, što heta kapiejki»! Stali viadomyja źviestki, kolki padachodnaha biełarusy Litvy pieraličyli roznym hramadskim strukturam2929
Kamientary