U pačatku lipienia harnizonny vajskovy sud Rastova-na-Donie pryhavaryŭ praparščyka adnoj ź miascovych vajskovych častak Siefierbieha Hadžyjeva da piaci z pałovaj hadoŭ kałonii za raspaŭsiudžvańnie «fejkaŭ» pra rasijskuju armiju (punkt «a» častki 2 artykuła 207.3 KK), piša «Mieduza».
Pavodle viersii śledstva, Hadžyjeŭ, budučy načalnikam źmieny ŭzvoda vajskovaj kamiendatury, «vioŭ paraženčyja razmovy z sasłužyŭcami» 7 i 11 vieraśnia 2024 hoda — jon, «žadajučy napałochać padnačaleny jamu asabovy skład ź liku varty», vyrašyŭ «uvieści jaho ŭ zman adnosna vykanańnia zadač».
U razmovie Hadžyjeŭ, jak śćviardžajecca, «pierabolšvaŭ pośpiechi praciŭnika na terytoryi DNR» i «niehatyŭna aceńvaŭ dziejańni ŭzbrojenych sił RF».
Hadžyjeŭ, jak skazaŭ jaho advakat, pryznaŭ vinu, i ŭ padadzienaj paśla rašeńnia suda apielacyi nie prasiŭ apraŭdańnia abo admieny prysudu, a ŭkazvaŭ na parušeńni — u tym liku na toje, što jon vioŭ pryvatnuju hutarku, i ŭ jaho dziejańniach adsutničała prykmieta ŭčynieńnia złačynstva «z vykarystańniem słužbovaha stanovišča».
U vyniku trojka sudździaŭ u Paŭdniovym akruhovym vajennym sudzie vyrašyła, što Hadžyjeŭ uvohule «nie byŭ inicyjataram złačynnych razmoŭ», a razmova «nasiła pobytavy charaktar» i na asabistuju pazicyju jaho surazmoŭcaŭ adnosna vajny nie paŭpłyvała.
Hadžyjevu zamianili termin na štraf 2,5 miljona rasijskich rubloŭ (30 tysiač dalaraŭ) i viarnuli vajskovaje zvańnie. Adrazu paśla rašeńnia suda jaho vyzvalili ź SIZA.
Ciapier čytajuć
«Ja hatovaja stać ministram ekanomiki Biełarusi». Novy tvar u Kabiniecie Alisa Ryžyčenka — pra karupcyju na karyść Łukašenak, Zareckuju i reformy11
Kamientary