«Heta hulnia ŭ dva baki». «Kibierpartyzany» raskazali, što ich ździviła ŭ sistemach «Aerafłota» i što budzie z danymi pasažyraŭ

«Vialikaja kolkaść resursaŭ budzie nakiravanaja na pakryćcio strat»

— Jak vy aceńvajecie, «Aerafłot» zmoža lotać najbližejšym časam?

— Ź niejkimi pierabojami — zmoža. U pryncypie, tut važna zaŭvažyć, što ataka nie była nacelenaja na biaśpieku avijaznosin. Usio, što było atakavana, nijak nie ŭpłyvaje na vylety i pryloty samalotaŭ. Tym nie mienš, kalehi rajać u najbližejšyja tydni-miesiacy nie karystacca pasłuhami «Aerafłota». Tamu što ciapier u ich vielizarnaja kolkaść resursaŭ budzie nakiravanaja na pakryćcio strat, sprobu adnaŭleńnia danych. Adpaviedna, niejkija pamyłki mohuć adbyvacca. Tamu voś takaja parada.

Ale jašče raz paŭtaru, na avijacyjnuju biaśpieku hetaja ataka nie była nacelenaja. U pieršuju čarhu heta ŭdar pa infarmacyjnaj i finansavaj častcy.

— Jość niejkaja acenka, kolki času spatrebicca na adnaŭleńnie?

— Kalehi kažuć, što prykładna tydni, kab adnavić bazavuju funkcyjanalnaść. I miesiacy, kab reanimavać niejkija bazy danych. Ale častka danych była całkam stračanaja.

— U čatach śpiecyjalistaŭ cikaviacca, ci byli reziervovyja kopii bazaŭ danych?

— Dzie nie było — tam da pabačeńnia. Bolš i nie budzie.

— Heta značyć, dzieści jany byli, a dzieści nie było?

— Nakolki kalehi bačyli — tak.

«U pieršuju čarhu imknulisia nanieści straty»

— Chaču spytać pra pasažyraŭ, jakija ŭ minułym mahli karystacca pasłuhami «Aerafłota». Hetaja ataka niasie dla ich niejkuju niebiaśpieku?

— «Kibierpartyzany» vielmi akuratna staviacca da danych hramadzian. U rasśledavańniach mohuć być vykarystanyja tolki infarmacyja pra tych, chto maje dačynieńnie da režymu. Ale nie zvyčajnych hramadzian, jakija nijak nie źviazanyja z vajskova-pramysłovym kompleksam, ahienturnaj dziejnaściu, režymnaj dziejnaściu. Heta značyć, u ahulnuju prastoru źviestki, atrymanyja «Kibierpartyzanami», nie buduć vykładacca. My budziem u hetym płanie pracavać tolki z pravieranymi žurnalistami.

Što tyčycca prasłuchoŭki supracoŭnikaŭ, a taksama ich pošty, to miarkuju, što heta budzie vykładziena. Heta praca na režym, na dziaržpradpryjemstva režymu. I tut navat, u pryncypie, u kantekście biaśpieki samich supracoŭnikaŭ budziem analizavać, ci naohuł zakonna było zapisvać ich razmovy. Heta značyć znoŭ ža pakažam mašynu rasijskich represij i kantrolu.

— Atrymlivajecca, «Aerafłot» zapisvaŭ razmovy ŭłasnych supracoŭnikaŭ?

— Tak.

— Heta šarahovyja rabotniki ci kiraŭnictva?

— Pakul nie mahu skazać, heta ŭsio budzie analizavacca.

— Vy paśpieli vyvučyć źmieściva pracoŭnych poštaŭ?

— Pakul nie mahu kamientavać. Budziem analizavać. […] U pieršuju čarhu imknulisia nanieści straty, jak kažuć kalehi, «hrochnuć usie». A spampavać — heta była nie asnoŭnaja meta. Što atrymałasia, toje spampavali.

«Pieršy krok byŭ dosyć prosty»

— Jak uvohule ŭdałosia prakraścisia ŭ hetuju sistemu? Sprava była ŭ słabym paroli hiendyrektara?

— Tak, jak napisana na našym sajcie. Pieršasny dostup byŭ praz parol hiendyrektara. Zrazumiełaja reč, paśla spatrebiŭsia čas na toje, kab dabracca da jadra infrastruktury, da tak zvanaj Tier 0 — hałoŭnaha kiraŭnickaha kantrolu, i zastavacca niezaŭvažanymi šmat miesiacaŭ. Tamu, viadoma, heta ŭsio adno juvielirnaja praca. Ale pieršy krok — tak, byŭ davoli prosty.

— Jak u cełym aceńvajecie miery infabiaśpieki ŭ sistemach «Aerafłota»?

— Nie vielmi vysoka. Napeŭna, navat dzieści ździŭlenyja. My pryvykli da taho, što vielmi mocna dziravyja sietki ŭ kampanijach biełaruskaha režymu. Ličycca, što ŭ rasijskaha niejkija sietki abaraniajucca lepš. Ale voś z «Aerafłotam» bačym, što jon davoli «dziravy».

Heta pakazvaje ŭzrovień mahčymaściaŭ «biaśpiečnikaŭ» i naohuł, jakim čynam u Rasii abaraniajecca krytyčnaja infrastruktura. Jak i biełaruskim uładam, rasijskim pa vialikim rachunku naplavać. Tamu što heta ŭ pieršuju čarhu tyčycca zvyčajnych ludziej, a nie sačeńnia za apazicyjanierami, sproby dyskredytavać ukrainskija siły, ukrainskich palitykaŭ i hetak dalej.

— Paśla taho jak stała viadoma pra ŭzłom, vy nazirali niejkuju reakcyju va ŭnutranych sistemach?

— Ja nie mahu kamientavać, ci znachodziacca tam usio jašče «Kibierpartyzany» i ci mohuć jany tudy viarnucca, kali nie znachodziacca. Što tyčycca niejkaj reakcyi z boku rasijskaha režymu ŭ naš bok, pakul ja ničoha takoha nie bačyła.

— Dniom źjavilisia naviny pra toje, što «ŭ Kramli ŭstryvožanyja chakierskaj atakaj». Ź jakimi emocyjami vy nazirajecie za takimi reakcyjami?

— Z pazityŭnymi, viadoma. Heta hulnia ŭ dva baki. Nie tolki rasijskija chakiery, rasijski režym moža atakavać zachodnija i ŭkrainskija kampanii. My ŭ hetuju hulniu taksama zdolnyja hulać.

Adpaviedna, lubaja dziaržustanova, lubaja kampanija, jakaja pracuje na rasijskija ŭłady, dapamahaje vajskova-pramysłovamu kompleksu, jość cellu dla ataki. Tamu ŭsim varta zadumacca šmat razoŭ pra toje, kab dapamahać zabivać ukraincaŭ, zachoplivać ziemli i akupavać nie tolki Ukrainu, ale i Biełaruś. I spadziajemsia, što heta moža ŭ niejkaj stupieni natchnić rasijskich ajcišnikaŭ i hramadzian RF supraćdziejničać tamu, što robić ich režym. My bačym jaho «dziravaść», my bačym, jak jamu ŭsio adno na svaich ułasnych hramadzian. Tamu pahladzim, da čaho heta moža pryvieści. Viadoma, my tolki z radaściu za hetym nazirajem.

— U Rasii raspačali kryminalnuju spravu pa śladach hetaj ataki pa artykule «niepravamierny dostup da kampjutarnaj infarmacyi». Nakolki dla vas važny hety fakt?

— My pakul nie viedajem, na mianie asabista, na supracoŭnikaŭ ci na hiendyrektara [«Aerafłota»] heta [sprava] była zaviedzienaja. Tamu budziem sačyć za navinami.

U pryncypie, biez roźnicy, chaj zavodziać. Hałoŭnaje — heta našy vyniki. Hałoŭnaje-kolki miljonaŭ dalaraŭ zamiest vajskova-pramysłovaha kompleksu im daviadziecca nakiravać na «Aerafłot», kab pakryć straty, jakija nanieśli «Kibierpartyzany» i Silent Srow.

• 38
• 0
• 4
• 0
• 0
• 0
• 0
• 1