U minskaj Kamiennaj Horcy dvoje maładych chłopcaŭ nanieśli mužčynu bolš za 130 udaraŭ
U Minsku dvuch maładych chłopcaŭ, 17 i 18 hadoŭ, asudzili na 5,5 hoda pazbaŭleńnia voli kožnaha za toje, što jany žorstka źbili nieznajomaha mužčynu, piša ahienctva «Minsk-Naviny».
Incydent adbyŭsia nočču na vulicy Niomanskaj. Chłopcy paśla śviatkavańnia dnia naradžeńnia išli dadomu pjanyja. Kala padjezda adzin ź ich vypadkova sutyknuŭsia ź minakom. Zaviazałasia svarka, a paśla chłopcy paprasili zakuryć, ale atrymali admovu.
Mužčyna pajšoŭ da taksi, ale padletki dahnali jaho, schapili za kapiušon, adciahnuli da padjezda i pačali źbivać. Toj sprabavaŭ uciačy, ale jany praciahvali nanosić udary — usiaho bolš za 130 udaraŭ rukami i nahami pa hałavie i ciele. Mužčyna niekalki razoŭ padaŭ i ŭstavaŭ, ale jaho znoŭ dahaniali. U vyniku jon atrymaŭ ciažkija traŭmy, straciŭ šmat kryvi i trapiŭ u reanimacyju.
Padazravanych chutka zatrymali. U sudzie jany pryznali vinu i raskajalisia. Jak paviedamili ŭ prakuratury, adzin ź ich užo stajaŭ na ŭliku ŭ inśpiekcyi pa spravach niepaŭnaletnich.
Sud pryznaŭ abodvuch vinavatymi ŭ naŭmysnym pryčynieńni ciažkaha cialesnaha paškodžańnia, jakoje mieła niebiaśpieku dla žyćcia i pryviało da psichičnaha parušeńnia, a taksama razhladajecca jak katavańnie z chulihanskich matyvaŭ.
Starejšy budzie adbyvać pakarańnie ŭ kałonii ahulnaha režymu, maładziejšy — u vychavaŭčaj kałonii. Akramia hetaha, jany abaviazany razam vypłacić paciarpiełamu 35 tysiač rubloŭ u jakaści kampiensacyi maralnaj škody.
Dźmitryj Łukašenka choča pastavić pad kantrol usie mabilnyja telefony11
Kamientary