Ramašeŭskaja adkazała na intervju Łuniovaj: Ź joj nie chacieli pracavać

Ahnieška Ramašeŭskaja

Čytajcie: Lehiendarnaja žurnalistka Luboŭ Łuniova raskazała pra Viktara Łukašenku i adnakurśnikaŭ, stvareńnie «Viasny» i palityčny bamond

«Jana dobra spraŭlałasia z karotkimi navinami — naprykład, pajści na demanstracyju, źniać repartaž. Heta — tak. Ale z bolš składanymi materyjałami ŭźnikali ciažkaści. Byli vypadki, kali infarmacyja akazvałasia niedakładnaj. Sumnievy ŭźnikali i ŭ tych, chto pracavaŭ ź joj, — Ihar Kulej, Alaksiej Dzikavicki. U jaje ŭvieś čas byli niejkija pretenzii: to, maŭlaŭ, da jaje nie tak pastavilisia, to zapłacili mienš, čym treba, to jašče niešta. Pry hetym jaje kiraŭniki tłumačyli mnie, što heta nie tak: jana, naprykład, zanadta pozna zdała materyjał, ci prosta niemahčyma było vykanać u patrebny termin», — patłumačyła «Našaj Nivie» Ahnieška Ramašeŭskaja.

Jana zhadvaje, što napružańnie ŭ stasunkach uzrasło paśla taho, kali ŭ 2020-m na biełaruskim telebačańni pakazali zapis razmovy Lubovi Łuniovaj z kalehaj z «Biełsata». 

«Chutčej za ŭsio, heta była prasłuchoŭka śpiecsłužbaŭ — ja ŭpeŭnienaja, što ofis «Biełsata» ŭ Minsku prasłuchoŭvaŭsia, — kaža Ahnieška Ramašeŭskaja. — U razmovie Luba hruba vykazvałasia ab kalehach. Paśla Luba pačała raspaŭsiudžvać čutki, što zapis zrabiła sama kaleha i što jana nibyta ahient KDB. Pačalisia intryhi i abvinavačańni. Paźniej jana źjechała va Ukrainu, a zatym z našaj dapamohaj — u Polšču, kalehi pryvieźli jaje. 

Potym ja sprabavała ŭładkavać dla jaje niejkuju pracu — heta ŭžo maja asabistaja adkaznaść. Jaje kateharyčna nie chacieli bačyć u adździele navin. Mnie naŭprost kazali: «Tolki nie jana, my nie chočam ź joj bolš pracavać». Ale ja ŭsio ž starałasia niejak dapamahčy. Kazała: «Nu, joj ža treba na niešta žyć. Niachaj niešta zarobić». Prapanoŭvała: moža, jana budzie pisać dla našaha partała. Tam taksama nie asabliva hareli žadańniem, ale ŭ vyniku pahadzilisia — chaj pracuje. A jana amal ničoha nie pisała. Ja niejak sama ŭbačyła ŭ jaje ŭ fejsbuku niejkuju natatku i pytaju: «Čamu ty nie mahła heta aformić u karotki artykuł i adpravić nam?» A ŭ adkaz: «Nie, heta nie padychodzić, ja nie mahu». I potym mnie ŭžo kalehi kažuć: «A jak my joj možam płacić, kali jana nie piša?» I heta ŭsio ŭ vyniku stała ŭžo majoj asabistaj prablemaj». 

Na pytańnie, ci była akazana dapamoha Łuniovaj u lačeńni nahi paśla pierałomu, byłaja dyrektarka «Biełsata» kaža, što «ŭpieršyniu čuje, što traŭma była na pratestach». 

«Kali b heta było tak, to pavinna była źviarnucca da mianie. Ja ŭ kursie, što jana złamała nahu — i tady niekatory čas nie pracavała. Ale, nakolki mnie viadoma, heta nie było na pratestach. 

Što tyčycca zatrymak pa vypłatach — tak, jany sapraŭdy byli, ale nie tolki ŭ jaje. Heta datyčyłasia ŭsich, tamu što Polskaje telebačańnie pieryjadyčna zatrymlivała płaciažy. Ja ŭvieś čas z hetym zmahałasia. Ale heta była sistemnaja prablema, nie nakiravanaja asabista suprać jaje. Pa jaje kankretnych skarhach ja sama sprabavała razabracca. Paŭtarusia: asabista. Ale ź joj prosta niemahčyma było pryjści da niejkaha kanstruktyvu. Jana žyła ŭ kvatery kala paŭhoda, mnie zdajecca, potym jaje vietliva paprasili vyzvalić, bo patrebna było miesca dla inšych. Jość śviedki, usio zadakumientavana.

Asabliva kryŭdna, što jana pačała ŭsio heta ŭspaminać tolki zaraz — paśla ŭsiaho, što my dla jaje zrabili. Ja asabista starałasia jaje padtrymać, navat kali jana amal nie pracavała, kab jana mahła niejak vyžyć. A zaraz, kali ja ŭžo nie dyrektar i novaje kiraŭnictva da mianie niełajalna, jana raptam pačała ŭzdymać staryja historyi», — tłumačyć Ahnieška. 

• 10
• 3
• 0
• 8
• 0
• 4
• 0
• 0