Biełaruski režysior raskazaŭ, jak u maładości paznajomiŭsia ŭ ZŠA z adnym z samych upłyvovych ukraincaŭ
U 1999 hodzie biełaruski režysior-dakumientalist Maksim Švied jeździŭ u ZŠA pa prahramie Work and Travel. Tam jon paznajomiŭsia z budučym ukrainskim ministram abarony Rustemam Umieravym. Zhadać tyja časy režysioru dapamoh stary plonačny zdymak.
Rustem Umieraŭ ź vieraśnia 2023 pa lipień 2025 hoda byŭ ministram abarony Ukrainy. Jon ža ŭznačalvaŭ ukrainskuju delehacyju na pieramovach u Stambule.
Maksim Švied zapomniŭ Umierava jašče junakom, kali tamu było ŭsiaho 17 hadoŭ. Paznajomilisia jany ŭ ZŠA: Švied jeździŭ tudy pa prahramie Work and Travel, a Umieraŭ — pa prahramie abmienu.
Sustrelisia jany doma ŭ amierykanca Majkła, ź jakim paznajomiŭsia Švied i jaki akurat u toj čas prymaŭ u siabie studentaŭ z Ukrainy i Hiermanii. Spačatku biełaruski režysior skazaŭ ukraincu, što jon z Čechii, tamu što nie chacieŭ razmaŭlać pa-rusku, ale paźniej raskryŭ praŭdu.
«Pamiataju, što ŭraziŭ jon mianie tym, što viedaŭ piersidskuju movu, choć sam byŭ z Kryma, i ŭ jaho byŭ załaty «Roleks», jaki tady asacyjavaŭsia z krutoj krutaściu», — apisaŭ toje znajomstva Maksim Švied.
Umierava jon zapomniŭ jak vielmi pazityŭnaha i vietlivaha čałavieka, na jakim časta možna było pabačyć uśmiešku. Kala tydnia jany praviali razam i paśla bolš nie stasavalisia.
Niekalki hadoŭ tamu, pačuŭšy pra pryznačeńnie novaha ministra abarony Ukrainy, Švied padumaŭ: «Padajecca, ja takoha čałavieka viedaju». Zahuhliŭ — i sapraŭdy, supadała apisańnie bijahrafii, rysy tvaru, raskazaŭ jon «Našaj Nivie».
«Nie viedaju, kolki šansaŭ było spynić niedzie pasiarod piensilvanskaha lesu mašynu, jakaja ŭ vyniku pryviazie mianie da takoha mahutnaha pocisku ruki, ale ja vieru, što ŭsie sustrečy ŭ žyćci nie vypadkovyja», — napisaŭ Švied u fejsbuku.
Kamientary