Zasłužanaja artystka Biełarusi pryznavałasia ŭ lubovi da Adesy. A ciapier syhrała ŭ prapahandysckim filmie «pra SVA»

U Rasii zaviaršylisia zdymki karciny z patetyčnaj nazvaj «Śvincovyja niabiosy». Aŭtary nazyvajuć svoj tvor «poŭnamietražnym mastackim filmam pra SVA». Jak śćviardžajecca, niekatoryja sceny zdymali ŭ zonie bajavych dziejańniaŭ — na akupavanych rasijanami terytoryjach.

U kastynhu siarod nikomu nie viadomych maładych aktoraŭ vyłučajucca Z-śpiavak Dzianis Majdanaŭ, vajenkar Alaksandr Koc. I, niečakana, Viera Kavalerava — zasłužanaja artystka Biełarusi.

Aktrysie ciapier 74 hady, bolš za 40 ź ich jana addała minskamu Teatru junaha hledača. Tam jana pastupova stała adnoj z hałoŭnych zorak. Kavalerava prasłaviłasia ŭ ampłua travieści, kali žančyna ihraje roli dziaciej i padletkaŭ, a časam i mužčyn. Byŭ u aktrysy navat svojeasablivy rekord: u adnym sa śpiektaklaŭ jana da 58 hadoŭ vykonvała rolu piacihadovaj dziaŭčynki. Kavaleravu chvalili za charakternaść kazačnych piersanažaŭ, jakich jana ihrała. Z teatra aktorka pajšła ŭ žniŭni minułaha hoda pa stanie zdaroŭja.

U kino Kavalerava zdymałasia ź dziacinstva, jašče ŭ 14 hadoŭ jana debiutavała ŭ epizodzie ŭ dziciačym filmie «Horad majstroŭ». Potym byli epizadyčnyja i nie vielmi roli ŭ savieckich, biełaruskich, ukrainskich i rasijskich filmach i sieryjałach. U tym liku ŭ kamiedyi «Na śpinie ŭ čornaha kata», dzie zdymałasia starejšaja ŭnučka Łukašenki Viktoryja. 

Artystku šmat što źviazvała z Ukrainaj. U 1980-ja jana ihrała ŭ teatry va Lvovie, zdymałasia na kijeŭskaj kinastudyi imia Daŭženki. Pajechała Kavalerava i va ŭžo niezaležnuju Ukrainu. U 2017-m jana hrała ŭ sieryjale «Zdajecca domik la mora» i pryznavałasia ŭ lubovi da Adesy.

«Adesa — heta maja maładość. Ja nie była ŭ hetym horadzie 40 hadoŭ, i voś padčas zdymak sieryjała ja znoŭ siudy viarnułasia. Ja vielmi lublu Adesu i adesitaŭ! I hetaja luboŭ pieradałasia i majmu synu, i ŭnučcy», — raskazvała aktrysa ŭ intervju ŭkrainskim žurnalistam.

Praz vosiem hadoŭ byłuju aktrysu lvoŭskaha teatra i prychilnicu Adesy zaniesła ŭ adzin film ź ludźmi, jakija vajujuć suprać Ukrainy i bambiać jaje lubimuju Adesu. Pryčym uziali Kavaleravu ŭ kino biez probaŭ.

«Kaliści ŭ Minsku ja naładžvała proby dla inšaha filma, kudy pryjšła Viera Iljinična. Ja pahladzieła na jaje, my prosta parazmaŭlali — i ja jaje ŭchvaliła. Jana ni słova nie pramoviła z roli — ale ja zrazumieła, što jana zrobić usio, što mnie treba. Na rolu ŭ «Śvincovyja niabiosy» ja taksama ŭziała jaje biez probaŭ. Prosta paprasiła pryvieźci jaje ź Minska. Jana — čaraŭnica!» — raskazvała režysiorka i scenarystka filma Alisa Kurhanskaja. 

Pavialičyć

Scenaryj hetaha kino — rafinavanaja i tapornaja prapahanda. Pavodle siužetu, ukrainskija vajskoŭcy (Kurhanskaja nazyvaje ich «ukranacystami») zamknuli mirnych žycharoŭ i rasijskaha pałonnaha ŭ pravasłaŭnaj carkvie. Ich chočuć vykarystać jak žyvuju ścianu, kab zavabić rasijan u kacioł. Ale pałonnyja padymajuć bunt, zryvajuć apieracyju, a siało ŭ vyniku zachoplivaje rasijskaja armija.

Kaho ŭ hetym kino ihraje byłaja zorka minskaha TIUHa, pakul nieviadoma. U trejlery Kavaleravu nie pakazali. Zatoje pakazali vielmi niajakasnuju karcinku, akciorskuju ihru, ad jakoj chočacca płakać, niesuviazny siužet. I złoha ŭkrainskaha sałdata, jaki pahražaje hierojam u pakoi z nadpisam «Hierojam słava!» na ścianie.

Film napałovu spansiravaŭ rasijski Minkult. Druhuju pałovu hrošaj na postpradakšn aŭtary sprabujuć sabrać praz kraŭdfandynh. Atrymlivajecca nie vielmi: za paŭhoda sabrałasia tolki 13% ad patrebnaj sumy. Režysiorka, darečy, skardziłasia, što takoje kino ŭ Rasii čamuści nichto nie choča finansavać.

«Na žal, vielmi mnohija ludzi, u jakich jość usie mahčymaści i jakija pazicyjanujuć siabie jak patryjoty, admovilisia [dapamahać hrašyma]. <…> Nie chočuć zamacoŭvać, demanstravać svaju pazicyju šyrokaj publicy. Citry mohuć ubačyć usie.

Ja i raniej z takim sutykałasia, kali pisała da SVA scenaryj dla moładzievaj aŭdytoryi na patryjatyčnuju temu. Mnie kažuć: «Heta biznes, heta nie akuplajecca, nas potym nikudy nie puściać», — narakała Kurhanskaja.

• 0
• 1
• 0
• 10
• 1
• 0
• 6
• 0