Tramp pryvitaŭ Pucina na Alascy bambardziroŭščykami, što bambili Iran
Paśla vychadu Uładzimira Pucina ź jaho samalota Donald Tramp nie tolki patrymaŭ jaho za ruku na čyrvonaj darožcy i advioz na svaim limuzinie.
Rasijskamu lidaru taksama prademanstravali, adnačasova nienaviaźliva i asensavana, samyja sučasnyja srodki amierykanskich VPS, u tym liku tyja, što zusim niadaŭna nanosili ŭdary pa padziemnych bunkierach u Iranie, piša Moscow Times.
Paśla taho, jak Tramp i Pucin pryvitalisia adzin z adnym na avijabazie «Ełmiendorf-Ryčardsan», nad ich hałovami pralacieli piać bambardziroŭščykaŭ. A na kadrach, jakija raźmiaściŭ u sacyjalnych sietkach pamočnik prezidenta ZŠA, bačna, jak limuzin, kudy sieli Tramp z Pucinym, prajazdžaje mima pašychtavanych vajskovych samalotaŭ i viertalotaŭ.
Nad aeradromam pralacieli čatyry samaloty F‑35 z bazy VPS «Ejelsan» na Alascy i bambardziroŭščyk‑stełs B‑2 z bazy «Uajtmien» u Misury, raspavioŭ CBS News znajomy z padrychtoŭkaj miniparadu amierykanski čynoŭnik.
B‑2 vykarystoŭvalisia dla bambardziroŭki ŭ červieni padziemnych jadziernych abjektaŭ u Iranie. Tudy jany vylecieli jakraz z bazy ŭ Misury, kab ažyćciavić, jak heta acharaktaryzavali amierykanskija vajskoŭcy, «najbujniejšy apieratyŭny ŭdar z prymianieńniem B‑2 u historyi ZŠA».
Pucin byŭ ździŭleny, kali nad im pralacieli piać samalotaŭ, piša viadučy aŭstralijski navinavy sajt news.com.au. Jon taksama pryvodzić kamientary karystalnikaŭ sacyjalnych sietak, jakija nazyvali takuju «demanstracyju pieravahi» i vajennaj siły. «Kali heta nie zapužvańnie, to ja nie viedaju, jak heta nazvać», — napisaŭ adzin. «Tramp demanstruje majstar‑kłas pa pijary», — adznačyŭ inšy.
ZŠA pravodziać na Alascy dva bujnyja vajskovyja vučeńni; u abodvuch vykarystoŭvajecca baza «Ełmiendorf‑Ryčardsan», adznačyła Financial Times. Vučeńni Arctic Edge 2025, u jakich taksama ŭdzielničajuć Vialikabrytanija i Danija, «majuć na mecie pavysić hatoŭnaść, prademanstravać mahčymaści i palepšyć apieratyŭnuju sumiaščalnaść sajuźnikaŭ i abjadnanych sił u Arktycy», havorycca ŭ zajavie Paŭnočnaha kamandavańnia ZŠA.
Inšyja vučeńni, Northern Edge, pravodziacca Inda‑Cichaakijanskim kamandavańniem ZŠA i praduhledžvajuć, pavodle jaho infarmacyi, «vysokaefiektyŭnuju, realistyčnuju padrychtoŭku bajavych źniščalnikaŭ». U hetych vučeńniach udzielničajuć tysiačy amierykanskich vajskoŭcaŭ, a taksama karabli i samaloty na Alascy i ŭ jaje vakolicach.
Ciapier čytajuć
Prakuratura pra śmierć Miełkaziorava: žurnalist mieŭ chraničnuju chvarobu6
Prakuratura pra śmierć Miełkaziorava: žurnalist mieŭ chraničnuju chvarobu
Fiaduta — Kaleśnikavaj: Mašańka, ci viarniciesia na Miesiac, ci nie vučycie žyć tych, chto stamiŭsia nabivać huzy ad čarhovaha nastupańnia na hrabli2727
Kamientary