«Ultraekzotyka dla samotnaha turysta». Ci zacikavić Iran biełarusaŭ i ci pajeduć turysty ź Irana ŭ Biełaruś
Ułady Irana i Biełarusi damovilisia ŭzajemna skasavać vizy dla turystaŭ i zapuścić prostyja avijarejsy pamiž dźviuma krainami. «Svaboda» raspytała biełaruskaha padarožnika i śpiecyjalista ŭ turyźmie ab pierśpiektyvach takoha kirunku padarožžaŭ.
20 žniŭnia ministar turyzmu Iranu Reza Salechi Amery paviedamiŭ, što ŭłady Biełarusi i Iranu pahadzilisia skasavać vizy pamiž dźviuma krainami. Taksama baki nibyta damovilisia adkryć prostyja avijarejsy pamiž Iranam i Biełaruśsiu dla palahčeńnia turystyčnych pajezdak — da troch rejsaŭ na tydzień.
Jak siońnia možna trapić u Iran i ci jeździać tudy biełarusy
Iran — 17-ja pavodle terytoryi kraina ŭ śviecie (1,6 miljona km2). Kraina maje vychad da Kaśpijskaha mora i Persydzkaj zatok ŭ Arabijskim mory.
U Iranie znachodzicca 28 pomnikaŭ spadčyny UNESCO, heta 1,8% ad ich ahulnaj kolkaści. Dziaržaŭnaja relihija ŭ Iranie — isłam, bolšaść nasielnictva — musulmanie-šyity (85%). Pamiatka ab mierach biaśpieki ŭ Iranie ad MZS Biełarusi ŭklučaje dva dziasiatki papieradžalnych punktaŭ.
U Iranie zabaronieny alkahol, a žančyny musiać u publičnych miescach nasić chidžab. Na 25 žniŭnia prostych rejsaŭ pamiž Iranam i Biełaruśsiu niama. Možna trapić tudy ź pierasadkaj. Naprykład, dalacieć da Maskvy, adkul jość prosty rejs «Aerofłota» ŭ Tehieran.
Taki pieralot praz Maskvu budzie kaštavać pad 900 rubloŭ i zojmie bolš za 9 hadzinaŭ z ulikam pierasadki.
Pieralot praz Dubaj u adzin bok budzie kaštavać jašče daražej — bolš za 2400 rubloŭ.
Taksama ŭ Iran ź Biełarusi možna trapić turam. Pajezdka na 9 dzion i 8 načej z vyletam z Maskvy budzie kaštavać 3428 rubloŭ z ulikam apłaty turystyčnaj pasłuhi.
Prapanujuć naviedać pałacavy kompleks Hulistan u stalicy, Persepalis — byłuju stalicu imperyi Achemenidaŭ, inšyja prykmietnaści.
Trapić u Iran bieź vizy biełarusy mahli jašče ź lutaha minułaha hodu. Termin znachodžańnia — da 15 dzion. To bok ciapierašnija damoŭlenaści bolš tyčacca turystaŭ ź Iranu.
Iran pakul nia staŭ pryjarytetnym kirunkam dla biełaruskich turystaŭ. U statystycy prosta nie padajuć kolkaści turystaŭ, jakija naviedali Iran, bo ich niašmat. Naprykład, sioleta ŭ červieni, padčas ataki Izrailu, ź Iranu evakuavali praź biełaruskija konsulskija słužby 23 čałavieki.
«Adzinkavyja vypadki pajezdak»
Pavodle błohiera, u minułym uładalnika turystyčnaha biznesu Alaksandra Libiera, Iran nia stanie dla biełaruskich turystaŭ papularnym kirunkam. Heta chutčej «ultra-ekzotyka» dla błohieraŭ i adzinkavyja vypadki.
«Kali navat u Azerbajdžan (heta najbližejšaja analohija z hledzišča lahistyki, navizny i vizavaj sytuacyi), dzie servis časta havoryć na zručnych dla biełaruskaha turysta movach i dzie pa vulicach nia jeździać tanki, nia ŭźnik masavy patok, to razvažać pra Iran jak pra surjozny turystyčny kirunak siońnia niemahčyma. Moža być, «Biełavija» i ryzyknie pastavić tudy dadatkovyja rejsy, a dziaržaŭnyja turaperatary sfarmujuć prahramy, ale chto tudy realna pajedzie ŭ ciapierašnich umovach — zusim niezrazumieła. Na hetaj dumcy pahadžajecca bolšaja častka turystyčnaj supolnaści Biełarusi, ź jakoju ja padtrymlivaju kantakt», — kaža surazmoŭca.
Što da iranskich turystaŭ, jakija mahli b pryjechać u Biełaruś u miežach biaźvizu, to jany abirajuć inšyja kirunki, bolš papularnyja dla Iranu.
«Kali abapiracca na statystyku, to jany addajuć pieravahu Tureččynie, Emiratam, Hruzii, Armenii, Azerbajdžanu — tut dobra čytajucca nastroi, dzie prachałodnaj Biełarusi budzie niaprosta znajści miesca ŭ sercach irancaŭ. Dla vučoby časta vybirajuć krainy Azii, a dla haściavych vizytaŭ — Niamieččynu, Francyju i ZŠA. Tamu ciažka ŭjavić, jakija mienavita kaštoŭnasnyja zruchi pavinny adbycca, kab masava źmianiłasia lahistyka pajezdak, pahatoŭ u takim tradycyjnym i kanservatyŭnym hramadztvie», — kaža surazmoŭca.
«Heta nie pra masavy turyzm»
Biełaruski padarožnik Alaksandar Hojšyk byvaŭ u Iranie dvojčy, apošni raz pravioŭ tam bolš za miesiac, heta było ŭ 2016 hodzie. Na jahonuju dumku, tam šmat cikavych abjektaŭ dla turyzmu, ale heta krajaznaŭčy turyzm.
«Heta dla padarožnikaŭ, jakim cikava adkryć dla siabie staražytnuju Persiju, Persepalis, staražytnyja vietrałovy, miačeci dy inšyja abjekty. Adnak heta nie pra masavy turyzm. Heta isłamskaja kraina z surovymi praviłami. Tam niama adpačynku «ŭsio ŭklučana», dzie ty valajeśsia na plažy i ničoha tabie nie zabaroniena. Tam zabaronieny alkahol, prablemy z suviaźziu, blakavańniem internetu, valutaj, viedańniem anhielskaj movy», — pryvodzić prykłady surazmoŭca.
Pavodle Alaksandra Hojšyka, taksama i turystam ź Iranu Biełaruś budzie mała cikavaja. Turysty, jakija mohuć pajechać u Biełaruś, — heta adzinkavyja vypadki takoha ž krajaznaŭčaha turyzmu.
«U irancaŭ pad bokam jość Tureččyna, kudy jany mohuć jeździć «adryvacca». Vielmi papularnyja tury ŭ Armeniju. Z Tehieranu jany lotajuć u Jerevan. Navošta im lacieć u daloki Miensk, kali ŭ ich pad bokam usio jość. Niekatoryja irancy jeździać u Biełaruś, ale ź inšymi metami: vučoba ci inšyja vuzkaspecyjalizavanyja intaresy», — raskazvaje padarožnik.
Viadoma, što letaś ź Biełarusi vyjaždžali 617 990 turystaŭ. Asnoŭnyja kirunki: Tureččyna (32,1%), Ehipiet (20,7%), Abjadnanyja Arabskija Emiraty (14%), Hruzija (8,5%), Italija (4,3%), Kitaj (2,3%). Inšyja krainy — 18,1%.
Biełaruś naviedali za minuły hod 366 732 turysty. U asnoŭnym jany byli z nastupnych krain: Łatvija (42%), Tureččyna (15,7%), Kitaj (7,8%), Litva (5,4%), Estonija (5,1%),
Niamieččyna (3,6%). Inšyja krainy — 20,4%. Iran u hetaj statystycy nia zhadvajecca.
Zhodna z servisam visaindex.com, na 2025 hod biełarusy mohuć trapić zusim biaź vizy ŭ 44 krainy. Sajt biełaruskaha MZS pryvodzić 43 krainy, ale ź niuansami.
Naprykład, u Meksyku možna trapić biaź vizy tolki ź vizami Šenhienskaj prastory, Kanady, ZŠA ci Japonii. U Salvador možna trapić pry padobnych umovach, a taksama majučy rasiejski časovy dazvoł na žycharstva. Ad 30 vieraśnia biaźvizavych krain dla biełarusaŭ stanie mieniej, bo biaźviz ź Biełaruśsiu vyrašyła skasavać Albanija.
Sioleta z 1 krasavika vizy dla Biełaruśsiu vyrašyli ŭvieści taksama Namibija, Vijetnam i Ŭschodniaja Libija. Pra mahčymy vizavy režym dla biełarusaŭ u kancy 2024 hodu paviedamili ŭłady Čarnahoryi.
Akramia Iranu, ułady Biełarusi damovilisia ab skasavańni vizaŭ z Kalumbijaj.
Ciapier čytajuć
«Ja byŭ suprać, kab mianie mianiali na 20 rasijskich vajskoŭcaŭ. Nie zmoh by hladzieć u vočy ludziam, syny jakich siadziać»: pieršaje intervju eks-mera Chiersona22
Kamientary
Dla turyzmu kraina vydatnaja, šmat afihiennych histaryčnych abjektaŭ i adsutnaść kradziažoŭ. Inhliš viedajuć usio i źviartajucca "sier", "mister", pačuvaješsia peram - meram.
Patrabavańni relihijnyja minimalnyja, jak i luboj krainie, jość praviły dla miascovych i dla turystaŭ, dla turystaŭ mienš žorstkija.
Turystaŭ ź ES dafiha i bolš. Samyja masavyja turysty - palaki, aŭtobusnyja tury niemcaŭ, bačyŭ hrupu kielckich bratoŭ z Dublina.
Prajechaŭ dziasiatki krain (viało i nie tolki) i Iran u samym topie krain pa siervisie i cikavych miescach.
Dla irancaŭ ja b pradavaŭ by mahčymaść pabadziacca hustymi lasami, jak u kazkach Hofmana - pad brendam "Jeŭrapiejskija džunhli". Paleśsia, naprykład. Hetaha im mocna padabacca i nie chapaje ŭ tych krainach, što dastupnyja. Nu, i tannaje buchło, viadoma. I načnyja kłuby, kazino.. Heta mocny turystyčny mahnit. Dla turkaŭ, darečy, taksama.
I, darečy, Iran znachodzicca na płato 2000+ mietraŭ, i siaredniaja hadavaja tempieratura bolš prachałodnaja, čym tut.