Izrail zajaviŭ pra likvidacyju pres-sakratara CHAMAS Abu Ubejdy

Ministr abarony Izraila Israel Kac pavinšavaŭ izrailskuju armiju i raźviedku z «biezdakornaj» apieracyjaj. Jon nie paviedamiŭ padrabiaznaściaŭ pra čas abo miesca jaje praviadzieńnia, ale Armija abarony Izraila raniej zajaviła, što jaje samaloty atakavali «klučavoha terarysta» ŭ rajonie Al-Rymal u horadzie Haza ŭ subotu, paśla čaho ŚMI paviedamili, što metaj byŭ Ubejda.

CHAMAS aficyjna nie paćvierdziŭ jaho śmierć, ale zajaviŭ, što ŭ vyniku izrailskich udaraŭ pa žyłym budynku ŭ horadzie Haza zahinuli i atrymali ranieńni dziasiatki mirnych žycharoŭ.

U niadzielu Kac papiaredziŭ, što šmat inšych «złačynnych saŭdzielnikaŭ» Ubejdy stanuć mišeńniu ŭ suviazi z «uzmacnieńniem kampanii ŭ Hazie», majučy na ŭvazie niadaŭna zaćvierdžany Izrailem płan pa zachopie horada Haza.

CACHAŁ i izrailskaja śpiecsłužba Šyn-Bet pradstavili bolš padrabiaznuju infarmacyju pra subotnija ŭdary, metaj jakich byŭ Abu Ubejda. U sumiesnaj zajavie jany paviedamili, što apieracyja «stała mahčymaj dziakujučy raźvieddanym, sabranym [Šyn-Bet] i raźviedvalnym upraŭleńniem CACHAŁ», jakija vyjavili schovišča Ubejdy.

Piać rakiet adnačasova z dvuch roznych napramkaŭ trapili ŭ druhi i treci pavierchi šaścipaviarchovaha žyłoha doma. Kvatera, na jakuju byŭ ździejśnieny napad, vykarystoŭvałasia jak stamatałahičny kabiniet. Vočy śviedki raspaviali, što ŭ vyniku avijaŭdaru pa pavietry raźlacielisia banknoty na sotni tysiač dołaraŭ. Paviedamlajecca, što bujnyja sumy byli razrabavanyja, ale paśla viernutyja bajevikam CHAMAS.

Zabojstva Chutajfy al-Kachłuta, bolš viadomaha pad svaim bajavym psieŭdanimam Abu Ubejda, stanie značnym simvaličnym udaram dla hrupoŭki.

Zaŭsiody chavaŭšy tvar pad paleścinskim šalem i viadomy svaimi šmatsłoŭnymi tyradami suprać Izraila i akupacyi, Abu Ubejda byŭ adnoj z apošnich viadomych fihur vajennaha kryła CHAMAS, što vyžyli ŭ Hazie, i kumiram prychilnikaŭ CHAMAS pa ŭsim Blizkim Uschodzie.

U sumiesnaj zajavie Armii abarony Izraila i Šyn-Bet havorycca, što Ubejda «byŭ publičnym tvaram terarystyčnaj arhanizacyi CHAMAS» i «raspaŭsiudžvaŭ prapahandu CHAMAS».

U svajoj apošniaj pramovie ŭ piatnicu Abu Ubejda, jakomu mierkavana było kala 40 hadoŭ, skazaŭ, što astatnich izrailskich zakładnikaŭ napatkaje taja ž dola, što i bajevikoŭ CHAMAS, i papiaredziŭ Izrail pra nastupstvy zapłanavanaha ŭvarvańnia ŭ horad Haza.

U subotu CHAMAS abvinavaciŭ CACHAŁ va ŭdary pa žyłym budynku ŭ ščylna zasielenym rajonie Al-Rymal u horadzie Haza.

Miascovyja žurnalisty paviedamili, što ŭ vyniku pa mienšaj miery siem čałaviek zahinuli i 20 atrymali ranieńni, u tym liku dzieci.

CACHAŁ zajaviŭ, što pierad atakaj «była praviedziena cełaja sieryja mieraŭ dla źnižeńnia vierahodnaści pryčynieńnia škody hramadzianskamu nasielnictvu, uklučajučy prymianieńnie vysokadakładnaj zbroi, pavietranaje nazirańnie i dadatkovuju raźviedvalnuju infarmacyju».

• 3
• 0
• 0
• 0
• 0
• 0
• 0
• 0